ເມືອງໜອງບົກ ຫາລືຈັດງານບວດເນນ

ເພື່ອເປັນການປົກປັກຮັກສາຮີດຄອງປະເພນີອັນດີງາມຂອງພໍ່ແມ່ປະຊາຊົນພາຍໃນເມືອງໜອງບົກທີ່ໄດ້ມີການປະຕິບັດກັນມາໄດ້ຫຼາຍປີ, ໃນວັນທີ 24 ມິຖຸນາ 2019 ຢູ່ທີ່ວັດໃຫຍ່ສີບຸນເຮືອງ ເມືອງໜອງບົກ ແຂວງຄຳມ່ວນໄດ້ມີການຈັດກອງປະຊຸມຄົ້ນຄວ້າປຶກສາຫາລື ກ່ຽວກັບການຈັດງານບວດເນນ ປະຈຳປີ 2019 ຂຶ້ນຢ່າງເປັນທາງການພາຍໃຕ້ການເຂົ້າຮ່ວມຂອງພະ ອາຈານຄຳຜອງສັດຕະມະໂນ ປະທານອົງການພຸດທະສາດສະໜາສຳພັນລາວ ເມືອງໜອງບົກ, ທ່ານ ຊົມພູ ສຸກອຸທອນ ຫົວໜ້າຫ້ອງການຖະແຫຼງຂ່າວ,ວັດທະນະທໍາ ແລະທ່ອງທ່ຽວເມືອງໜອງບົກ, ມີບັນດາພະເຖລະນຸເຖລະ ແລະພໍ່ແມ່ ປະຊາຊົນເຂົ້າຮ່ວມຢ່າງພ້ອມພຽງ.

ຈຸດປະສົງການຈັດກອງປະຊຸມຄົ້ນຄວ້າປຶກສາຫາລືໃນງານບວດເນນປະຈໍາປີ 2019 ນີ້ກໍ່ເພື່ອເປັນ ການຮັກສາວັດທະນະທໍາອັນດີງາມແລະເປັນການສົ່ງເສີມແນວຄິດຈິດໃຈຂອງນ້ອງນ້ອຍເຍົາວະຊົນໃຫ້ມີແນວຄິດທີ່ດີແລະເປັນການໃຫ້ເຍົາວະຊົນຮັບຮູ້ເຖິງບາບບຸນຄຸນ ໂທດແລະເພື່ອເປັນການຕອບບຸນແທນຄຸນພໍ່ກັບແມ່ທີ່ລ້ຽງເຮົາຈາກນັ້ນກອງປະຊຸມຍັງໄດ້ມີການຜ່ານຂໍ້ຕົກລົງຂອງທ່ານ ເຈົ້າເມືອງໆໜອງບົກວ່າດ້ວຍການອານຸມັດໃຫ້ຈັດງານໂຄງການບັນພະຊາບວດສຳມະເນນໃນລະຫວ່າງວັນທີ 4-13 ກໍລະກົດ 2019 ແລະຜ່ານແຜນໂຄງການບັນພະຊາບວດເນນປະຈຳປີ 2019 .

ຕອນທ້າຍຂອງກອງປະຊຸມຫົວໜ້າຫ້ອງການຖະແຫຼງຂ່າວ,ວັດທະນະທຳ ແລະທ່ອງທ່ຽວເມືອງໜອງບົກໄດ້ສະແດງຄວາມຄິດເຫັນໃສ່ກອງປະຊຸມດັ່ງກ່າວໃນວຽກງານຕໍ່ໜ້າຊຶ່ງກອງປະຊຸມ ດຳເນີນໄປຕາມຈຸດປະສົງລະດັບຄາດໝາຍທີ່ກຳນົດໄວ້.

ພາບ ແລະຂາ່ວຈາກ ໜັງສືພິມເສດຖະກິດ-ສັງຄົມ

แชร์