ອຸດົມໄຊ ບົ້ງຝູງລະບາດໜັກສາລີ 11 ພັນກວ່າເຮັກຕາ ຖືກທຳລາຍ

 ຈາກການລົງກວດກາຂໍ້ມູນເບື້ອງຕົ້ນຂອງວິຊາການພະແນກກະສິກຳ ແລະປ່າໄມ້ແຂວງອຸດົມໄຊພົບວ່າປະຈຸບັນສວນສາລີຂອງຊາວກະສິກອນພາຍໃນແຂວງອຸດົມໄຊໄດ້ ມີບົ້ງຝູງທຳລາຍສວນສາລີເປັນບໍລິເວນກວ້າງມີເນື້ອທີ່11.000 ກວ່າເຮັກຕາ ຈາກເນື້ອທີ່ສວນສາລີທັງໝົດ 30 ພັນເຮັກຕາ.

  ທ່ານ ຄຳເຜົ້າ ບຸນດາລາ ຫົວໜ້າຂະແໜງປູກຝັງພະແນກກະສິກຳ ແລະປ່າໄມ້ແຂວງອຸດົມໄຊໃຫ້ສຳພາດວ່າ: ເລີ່ມແຕ່ຕົ້ນເດືອນພຶດສະພາຜ່ານມາໄດ້ເກີດການລະບາດຂອງບົ້ງຝູງທຳລາຍຕົ້ນສາລີຂອງຊາວກະສິກອນຢູ່ແຂວງອຸດົມໄຊ ເປັນຈຳນວນຫຼວງຫຼາຍ. ພາຍຫຼັງໄດ້ຮັບແຈ້ງຈາກປະຊາຊົນທາງແຂວງກໍໄດ້ສົ່ງວິຊາການລົງໄປສົບທົບກັບຫ້ອງການກະສິກຳ ແລະ ປ່າໄມ້ແຕ່ລະເມືອງໄປສຳຫຼວດ ແລະ ເກັບກຳເນື້ອທີ່ໆຖືກບົ້ງຝູງທຳລາຍຕົວຈິງເຫັນວ່າເປັນບໍລິເວນກວ້າງເຖິງ 11.000 ກວ່າເຮັກຕາ

  ຈາກເນື້ອທີ່ປູກສາລີຂອງຊາວກະສິກອນໃນທົ່ວແຂວງ 30.000 ກວ່າເຮັກຕາ. ເມືອງທີ່ມີການລະບາດລວມມີເມືອງຮຸນ, ເມືອງແບງ, ເມືອງງາ ແລະເມືອງຫຼາໃນນັ້ນໄດ້ຮັບຜົນກະທົບຫຼາຍກວ່າໝູ່ແມ່ນເມືອງຮຸນຊຶ່ງມີເນື້ອທີ່ຖືກທຳລາຍແລ້ວ 4.000 ກວ່າເຮັກຕາ ຊຶ່ງເປັນເຫດການໜຶ່ງທີ່ໜ້າເປັນຫ່ວງທີ່ສຸດ.

  ຕໍ່ກັບເຫດການດັ່ງກ່າວທາງພະແນກກະສິກະ ແລະປ່າໄມ້ແຂວງກໍໄດ້ຮີບຮ້ອນລາຍງານຕໍ່ການນຳແຂວງ ແລະ ພາກສ່ວນກ່ຽວຂ້ອງຕ່າງໆເພື່ອຮັບຊາບ ແລະຊອກວິທີທາງແກ້ໄຂຢ່າງຮີບດ່ວນ. ລ່າສຸດວັນທີ 21 ມິຖນານີ້ຜູ້ຕາງໜ້າອົງການອາຫານ ແລະການກະເສດປະຈຳລາວໄດ້ລົງມາກວດກາເບິ່ງຜົນກະທົບຕົວຈິງພ້ອມທັງໄດ້ປຶກສາຫາລືກັນຊອກວິທີທາງປາບບົ້ງດັ່ງກ່າວໃຫ້ໝົດໄປໂດຍໄວເພື່ອເຮັດໃຫ້ຕົ້ນສາລີຂອງປະຊາຊົນທີ່ຖືກຜົນກະທົບນັ້ນກັບຄືນສູ່ສະພາບປົກກະຕິ ແລະບໍ່ໃຫ້ແຜ່ກະຈາຍສູ່ເມືອ ງອື່ນໆຕື່ມອີກ.

ຂຽນໂດຍ: ໄມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 27/06/2019