ກົມທະບຽນ ແລະຄຸ້ມຄອງວິສະຫະກິດສັ່ງໃຫ້ແຈ້ງກວດຄືນທະບຽນ

  ກົມທະບຽນແລະຄຸ້ມຄອງວິສາຫະກິດກະຊວງອຸດສາຫະກໍາແລະການຄ້າໄດ້ແຈ້ງໃຫ້ພະແນກອຸດສາຫະກໍາແລະການຄ້າແຂວງ, ນະຄອນຫຼວງ ແລະຫ້ອງການອຸດສາ ຫະກໍາ ແລະການຄ້າເມືອງ, ນະຄອນ ຊາບເລື່ອງກວດກາຄືນກ່ຽວກັບການຂຶ້ນທະບຽນວິສາຫະກິດກ່ຽວກັບທຸລະກິດການຄ້າຂາຍຍົກ ແລະ ການຄ້າຂາຍຍ່ອຍສໍາລັບຜູ້ລົງທຶນຕ່າງປະເທດ.

  ອີງຕາມແຈ້ງການກົມທະບຽນ ແລະ ຄຸ້ມຄອງວິສາຫະກິດກະຊວງອຸດສາຫະກໍາ ແລະ ການຄ້າເລກທີ 0764/ກທຄວ.ອຄ, ນະຄອນຫຼວງວຽງຈັນ ລົງວັນທີ 25 ມິຖຸນາ 2019; ອີງຕາມຂໍ້ຕົກລົງວ່າດ້ວຍການຈັດຕັ້ງ ແລະການເຄື່ອນໄຫວຂອງກົມທະບຽນ ແລະຄຸ້ມຄອງວິສາຫະກິດສະບັບເລກທີ 1752/ອຄ ລົງວັນທີ 19 ກັນ ຍາ 2016 ແລະອີງຕາມຂໍ້ຕົກລົງວ່າດ້ວຍທຸລະກິດການຄ້າຂາຍຍົກ ແລະການຄ້າຂາຍຍ່ອຍສະບັບເລກທີ 1005/ອຄ,ຄພນ ລົງວັນທີ 22 ພຶດສະພາ 2015, ໂດຍແຈ້ງການລະບຸໃຫ້ພະແນກອຸດສາຫະກໍາ ແລະການຄ້າແຂວງ, ນະຄອນຫຼວງ ແລະຫ້ອງການອຸດສາຫະກໍາ ແລະການຄ້າເມືອງ, ນະຄອນ ຊາບ ແລະຈັດຕັ້ງປະຕິບັດຢ່າງເຂັ້ມງວດເລື່ອງກວດກາຄືນກ່ຽວກັບການຂຶ້ນທະບຽນວິສາຫະກິດກ່ຽວກັບທຸລະກິດການຄ້າຂາຍຍົກ ແລະການຄ້າຂາຍຍ່ອຍສໍາລັບຜູ້ລົງທຶນຕ່າງປະເທດ.

 ສະເພາະການຈັດຕັ້ງປະຕິບັດປະກອບມີ 1) ກວດກາຄືນການຂຶ້ນທະບຽນວິສາຫະກິດກ່ຽວກັບທຸລະກິດການຄ້າຂາຍຍົກ ແລະການຄ້າຂາຍຍ່ອຍສະບັບເລກທີ 1005/ອຄ,ຄພນ ລົງວັນ ທີ 22 ພຶດສະພາ 2015. 2) ຖ້າພະນັກງານພະແນກອຸດສາຫະກໍາ ແລະ ການຄ້າແຂວງ, ນະຄອນຫຼວງ ແລະ ຫ້ອງການອຸດສາຫະກໍາ ແລະການຄ້າເມືອງ, ນະຄອນຫາກຂຶ້ນທະບຽນວິສາຫະກິດບໍ່ສອດຄ່ອງຕາມເງື່ອນໄຂທຶນຈົດທະບຽນ ແລະສັດສ່ວນການຖືຮຸ້ນຕາມທີ່ໄດ້ກໍານົດໄວ້ໃນຂໍ້ຕົກລົງດັ່ງກ່າວໃນຂໍ້ທີ 1 ເທິງນີ້ແມ່ນຈະໃຫ້ເຈົ້າໜ້າທີ່ທະບຽນວິສາຫະກິດທີ່ກ່ຽວຂ້ອງລຶບລ້າງທະບຽນວິສາຫະກິດນັ້ນໂດຍທັນທີ, ເວັ້ນເສຍແຕ່ວິສາຫະກິດກ່ຽວຂ້ອງໄດ້ມາປັບປຸງໃຫ້ສອດ ຄ່ອງຕາມເງື່ອນໄຂ ຂອງຂໍ້ຕົກລົງສະບັບເລກທີ 1005/ອຄ,ຄພນ ລົງວັນທີ 22 ພຶດສະພາ 2015. 3) ຖ້າຫາກພົບເຫັນທະບຽນວິສາຫະກິດທີ່ຂັດກັບຂໍ້ 1 ເທິງນີ້ ໃຫ້ພະແນກອຸດສາຫະກໍາ ແລະການຄ້າແຂວງ, ນະຄອນຫຼວງດໍາເນີນການກວດສອບສາເຫດການອອກທະບຽນວິສາຫະກິດດັ່ງກ່າວ ແລະໃຫ້ເຮັດບົດລາຍງານກົມທະ ບຽນ ແລະຄຸ້ມຄອງວິສາຫະກິດກະຊວງອຸດສາຫະກໍາ ແລະການຄ້າດ່ວນ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์