ລັດຈະສຸມໃສ່ 8 ມາດຕະການກະຕຸ້ນເສດຖະກິດ

  ເພື່ອສືບຕໍ່ສູ້ຊົນປະຕິບັດຄາດໝາຍໃຫ້ບັນລຸ ແລະລື່ນຄາດໝາຍໃນປີ 2019 ໂດຍສະເພາະສຸມໃສ່ວຽກທີ່ກ່ຽວຂ້ອງກັບ 8 ມາດຕະການກະຕຸ້ນເສດຖະກິດ, ນັ້ນກໍຄືການປະຕິບັດໂຄງການລົງທຶນຂອງລັດທີ່ໄດ້ອະນຸມັດແລ້ວໃນແຜນປະຈຳປີ 2019 ເພື່ອນຳໃຊ້ເຂົ້າໃນການຜະລິດໄດ້ໄວ້, ຍູ້ແຮງການຜະລິດ ແລະການບໍລິການ,ຍູ້ແຮງວຽກທ່ອງທ່ຽວ, ແກ້ໄຂໜີ້ສິນບູລິມະສິດການລົງທຶນຂອງລັດ ແລະອື່ນໆ.

  ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະການລົງທຶນໄດ້ລາຍງານຕໍ່ກອງປະຊຸມລັດຖະບານໃນວັນທີ 26 ມິຖຸນາ 2019 ຮູ້ວ່າ: ການຊຸກຍູ້ການປະຕິບັດມາດຕະການ,ນະໂຍບາຍຂອງລັດຖະບານເປັນຕົ້ນແມ່ນ 8 ມາດຕະການກະຕຸ້ນເສດຖະກິດໄດ້ເຮັດໃຫ້ການຜະລິດ, ການບໍລິການ ແລະການລົງທຶນຍັງດຳເນີນເປັນປົກກະຕິ ແລະ ມີທ່າອ່ຽງດີຂຶ້ນເຫັນໄດ້ຈາກການຜະລິດຕາມຂະແໜງການຄື: ການຜະລິດເຂົ້າບັນລຸ 4,53 ແສນໂຕນ ເພີ່ມຂຶ້ນ 13% ທຽບກັບໄລຍະດຽວກັນຂອງປີຜ່ານມາ, ລ້ຽງສັດສະໜອງໃຫ້ກັບສັງຄົມໄດ້ 2,28 ແສນໂຕນເພີ່ມຂຶ້ນ 14%, ການຜະລິດກະແສໄຟຟ້າປະຕິບັດໄດ້ 16.007 ລ້ານກິໂລວັດໂມງ, ສຳເລັດ ແລະເປີດນຳໃຊ້ເຂື່ອນຈຳນວນ 20 ເຂື່ອນ, ການຜະລິດແຮ່ທາດເພີ່ມຂຶ້ນ 7,3% ທຽບໃສ່ໄລຍະດຽວກັນຂອງປີຜ່ານມາ, ການຜະລິດອຸດສາຫະກຳປຸງແຕ່ງ ແລະຫັດ ຖະກຳບັນລຸ 5,43 ພັນຕື້ກີບ, ການບໍລິການໃນ 6 ເດືອນເຫັນວ່າຫຼຸດລົງ 3% ທຽບໃສ່ໄລຍະດຽວຂອງປີຜ່ານມາ, ສ່ວນການລົງທຶນໂດຍສະເພາະການລົງທຶນຂອງລັດປະຕິບັດໄດ້ພຽງ 733 ຕື້ກີບ,ການລົງທຶນເພື່ອການພັດທະນາປະຕິບັດໄດ້ 34% ຂອງແຜນການ,ການລົງທຶນຂອງພາກເອກະຊົນແມ່ນໄດ້ນຳໃຊ້ທຶນແລ້ວ 40,6 % ຂອງແຜນການ, ການປ່ອຍສິນເຊື່ອຂອງທະນາຄານໃນ 4 ເດືອນບັນລຸ 712,61 ຕື້ກີບ, ລາຍຮັບ-ລາຍຈ່າຍງົບປະມານຄາດຄະເນໃນ 6 ເດືອນຕົ້ນປີ 12,96 ພັນຕື້ກີບ, ໃນນັ້ນລາຍຮັບພາຍໃນ 12,12 ພັນຕື້ກີບ ແລະລາຍຣັບຈາກການຊ່ວຍເຫຼືອລ້າ 834,19 ຕື້ກີບ, ຂາດດຸນງົບປະມານແມ່ນ 346,95 ຕື້ກີບ, ສຳລັບການສົ່ງອອກ-ນຳເຂົ້າມູນຄ່າການສົ່ງອອກສິນຄ້າປະມານ 2.409 ລ້ານໂດລາ ແລະການນຳເຂົ້າ 2.288 ລ້ານໂດລາ, ອັດຕາເງິນເຟີ້ຮອດ 5 ເດືອນ ຢູ່ໃນລະດັບ 1,9%, ອັດຕາແລກປ່ຽນຮອດເດືອນ 4 ອັດຕາແລກປ່ຽນລະຫວ່າງເງິນກີບກັບຕະກຸນເງິນຫຼັກມີການເໜັງຕິງພໍສົມຄວນແຕ່ກໍຍັງຢູ່ໃນຂອບຄາດໝາຍຂອງແຜນການປີ, ຄັງ ເງິນຕາຕ່າງປະເທດກຸ້ມການນຳເຂົ້າ 3 ເດືອນ, ສ່ວນປະລິມານເງິນ M2 ສືບຕໍ່ເພີ່ມຂຶ້ນ 8,1% ເນື່ອງຈາກວ່າສິນເຊື່ອຂະຫຍາຍຕົວໃນລະດັບທີ່ຕໍ່າ, ສະນັ້ນຖ້າຂະ ແໜງການ ແລະທ້ອງຖິ່ນບຸກບືນສຸດຂີດຄາດວ່າໃນໝົດປີນີ້ລວມຍອດຜະລິດຕະພັນພາຍໃນ (GDP) ຈະຂະຫຍາຍຕົວໃນລະດັບ 6,5%-6,7%.

  ທ່ານ ສຸພັນ ແກ້ວມີໄຊ ກ່າວຕື່ມວ່າ: ເພື່ອສືບຕໍ່ສູ້ຊົນປະຕິບັດຄາດໝາຍໃຫ້ບັນລຸ ແລະລື່ນຄາດໝາຍໃນປີ 2019 ບັນດາຂະແໜງການ ແລະທ້ອງຖິ່ນຕ້ອງເລັ່ງໃສ່ຄື: ສຸມໃສ່ປະຕິບັດໂຄງການລົງທຶນຂອງລັດທີ່ໄດ້ອະນຸມັດແລ້ວໃນແຜນ ປີ 2019 ເພື່ອໃຫ້ນຳໃຊ້ເຂົ້າໃນການຜະລິດໄດ້ໄວ, ເລັ່ງປັບປຸງ 10 ຕົວຊີ້ວັດ ທີ່ຍັງຄ້າງຄາໃຫ້ສຳເລັດໃນທ້າຍປີຕາມຄຳສັ່ງຂອງທ່ານນາຍົກ 02/ນຍ ໂດຍສະເພາະຕົວຊີ້ວັດທີ 4 ການຂຶ້ນທະບຽນຊັບສິນ, ຕົງຊີ້ວັດທີ 7 ການຊຳລະອາກອນ, ຕົວຊີ້ວັດທີ 9 ການບັງຄັບໃຊ້ສັນຍາ ແລະຕົວຊີ້ວັດທີ 10 ການແກ້ໄຂ ການລົ້ມລະລະລາຍ, ພ້ອມທັງອຳນວຍຄວາມສະດວກໃຫ້ແກ່ການລົງທືນພາກເອກະຊົນໃຫ້ມີຄວາມວ່ອງໄວ, ງ່າຍ ດາຍ ແລະຕົ້ນທຶນຕໍ່າໂດຍການປັບປຸງ Mornitoring matrix ຂອງແຕ່ລະຂະແໜງການທີ່ມີຢູ່ແລ້ວໃຫ້ຄົບຖ້ວນເພື່ອເປັນເຄື່ອງມືໃນການຕິດຕາມ ແລະ ປະເມີນການຈັດຕັ້ງປະຕິບັດບັນດາຕົວຊີ້ວັດດັ່ງກ່າວຢ່າງເປັນປົກກະຕິ ແລະຕໍ່ເນື່ອງ; ສຸມໃສ່ຍູ້ແຮງການຜະລິດ ແລະ ການບໍລິການຕົ້ນຕໍແມ່ນການຜະລິດກະສິກຳເປັນສິນຄ້າທີ່ມີຕະຫຼາດແລ້ວເຊັ່ນ: ເຂົ້າ, ພືດຜັກ, ສັດໃຫຍ່, ຊາ, ກາເຟ ແລະອື່ນໆ, ຊຸກຍູ້ການຜະລິດອຸດສາຫະກຳທີ່ມີທ່າແຮງສົ່ງອອກຄື: ການຜະລິດໄຟຟ້າ, ແຮ່ທາດ, ອຸດສາ ຫະກຳປຸງແຕ່ງໃນເຂດເສດຖະກິດພິເສດ, ເລັ່ງແກ້ໄຂ ບັນຫາ ແລະຂອດອຸດຕັນຕໍ່ການສົ່ງເສີມ SME ຄືທຶນ, ກົນໄກ, ເຕັກນິກ, ການປະສານງານ ແລະອື່ນໆ, ນອກນັ້ນຍັງຊຸກຍູ້ແຮງການທ່ອງທ່ຽວແມ່ນເອົາໃຈໃສ່ແກ້ໄຂບັນຫາຂໍ້ຫຍຸ້ງຍາກເຊັ່ນ: ກົນໄກການເຂົ້າອອກເມືອງ, ປັບປຸງຄຸນນະພາບການບໍລິການ, ປັບປຸງສະຖານທີ່ທ່ອງ ທ່ຽວ,ສ້າງຜະລິດຕະພັນການທ່ອງທ່ຽວທີ່ຫຼາກຫຼາຍ ແລະມີຄຸນນະພາບສູງຂຶ້ນ,ເພີ່ມທະວີການໂຄສະນາ ແລະ ປັບປຸງເຄືອຂ່າຍການທ່ອງທ່ຽວໃຫ້ກວ້າງ, ສ້າງຍຸດທະ ສາດເພື່ອດຶງດຸດນັກທ່ອງທ່ຽວທີ່ມີຄວາມສາມາດໃຊ້ຈ່າຍສູງໃຫ້ຫຼາຍຂຶ້ນແນໃສ່ສ້າງລາຍຮັບເຂົ້າປະເທດ, ຍູ້ການບໍລິການໃຫ້ຂະຫຍາຍຕົວ, ສະເໜີພິຈາລະນາແກ້ໄຂໜີ້ສິນບູລິ ມະສິດການລົງທຶນຂອງລັດ, ປະຕິບັດມາດຕະການເຂັ້ມງວດ, ຄົບຊຸດຕໍ່ວະໄນການເງິນ-ເງິນຕາ, ຄຸ້ມຄອງ, ຕິດຕາມແຫຼ່ງເງິນຕາຕ່າງປະເທດຈາກຂາອອກ, ການລົງທຶນ, ODA,ການບໍລິການທະນາຄານ ແລະການບໍລິການ ອື່ນໆ.

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์