ກອງປະຊຸມລັດຖະບານຍົກຫຼາຍບັນຫາຂື້ນປືກສາ

 ກອງປະຊຸມລັດຖະບານເປີດກວ້າງຄັ້ງທີ 1 ປີ 2019, ໄດ້ໄຂຂຶ້ນຢ່າງເປັນທາງການໃນວັນທີ 26 ມິຖຸນາ 2019 ທີ່ຫໍປະຊຸມແຫ່ງຊາດພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍເຈົ້າຄອງນະຄອນຫຼວງວຽງຈັນ, ບັນດາລັດຖະມົນຕີ, ເຈົ້າແຂວງ, ຜູ້ຕາງໜ້າຈາກອົງການຈັດ ຕັ້ງພັກ, ສະພາແຫ່ງຊາດ, ອົງການນິຕິບັນຍັດ, ອົງການຕຸລາການ, ສູນກາງແນວລາວສ້າງຊາດ ແລະອົງການຈັດຕັ້ງມະຫາຊົນເຂົ້າຮ່ວມ.

  ທ່ານ ທອງລຸນ ສີສຸລິດ ກ່າວວ່າ: ກອງປະຊຸມລັດຖະບານເປີດກວ້າງໄດ້ດຳເນີນພາຍຫຼັງກອງປະຊຸມຄົບຄະນະ ຂອງຄະນະບໍລິຫານງານສູນກາງພັກຄັ້ງທີ 8 ແລະກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ 8 ໄດ້ປິດລົງໃນວັນທີ 25 ຜ່ານມາ ຊຶ່ງກອງປະຊຸມໄດ້ຮັບຮອງເອົາຫຼາຍບັນຫາສຳຄັນເປັນຕົ້ນແມ່ນແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນງົບປະມານແຫ່ງຊາດ 4 ເດືອນ ແລະຄາດຄະເນ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2019, ຮ່າງກົດໝາຍຈຳນວນ 10 ສະບັບໃນນັ້ນ 9 ສະບັບແມ່ນສະເໜີໂດຍລັດຖະບານທັງນີ້ເປົ້າໝາຍເພື່ອປຶກສາຫາລືວຽກງານສໍາຄັນຂອງຊາດຕິດພັນກັບການ ປະຕິບັດພາລະບົດບາດ ແລະໜ້າທີ່ຂອງລັດຖະບານ,ຂະແໜງການ ແລະອົງການປົກຄອງທ້ອງຖິ່ນ,ໂດຍກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 8 ແລະກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ 8 ໄດ້ມີການຕີລາຄາວຽກງານຂອງລັດຖະບານ 6 ເດືອນທີ່ຜ່ານມາ ແລະມີມະຕິເພື່ອຊີ້ນຳໃຫ້ລັດຖະບານນຳໄປຜັນຂະຫຍາຍ ແລະຈັດຕັ້ງ

ປະຕິບັດໃນໄລຍະ 6 ເດືອນທ້າຍປີ ແລະ ໃນຕໍ່ໜ້າ ຊຶ່ງຖືເປັນພື້ນຖານ ແລະທິດທາງ ທີ່ສຳຄັນໃຫ້ແກ່ລັດຖະບານ, ດັ່ງນັ້ນ ໃນ ກອງປະຊຸມຄັ້ງນີ້, ຄຽງຄູ່ກັບການຕີລາ ຄາໝາກຜົນຂອງການເຄື່ອນໄຫວວຽກ ງານຂອງລັດຖະບານ, ຂະແໜງການ, ອົງການປົກຄອງທ້ອງຖິ່ນໃນໄລຍະຜ່ານ ມາ, ກຳນົດທິດທາງວຽກຈຸດສຸມຕົ້ນຕໍໃນ 6 ເດືອນທ້າຍປີ 2019 ແລ້ວ, ລັດຖະ ບານຍັງຈະໄດ້ປຶກສາຫາລື ເພື່ອຜັນຂະ ຫຍາຍມະຕິຂອງກອງປະຊຸມສູນກາງ ແລະກອງປະຊຸມສະພາແຫ່ງຊາດໃນ ເດືອນຜ່ານມາ ເພື່ອຮັບປະກັນລັດຖະ ບານສາມາດບັນລຸເປົ້າໝາຍຂອງແຜນ ພັດທະນາເສດຖະກິດ-ສັງຄົມແຫ່ງຊາດ ປີ 2019.

  ກອງປະຊຸມດັ່ງກ່າວຈະໄດ້ດຳເນີນເປັນເວລາ 3 ວັນ ລະຫວ່າງວັນທີ 26- 28 ແມ່ນຈະໄດ້ຄົ້ນຄວ້າ ແລະປຶກສາຫາລືບັນຫາຕ່າງໆເປັນຕົ້ນແມ່ນ:1) ສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ, ແຜນວຽກຈຸດສຸມ 6 ເດືອນທ້າຍປີ 2019, ທິດທາງແຜນພັດທະນາເສດຖະກິດ-ສັງຄົມ ແລະແຜນການລົງທຶນຂອງລັດປະຈໍາປີ 2020, ຕີລາຄາການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2020, ສະຫຼຸບຕີລາຄາສະພາບການຄຸ້ມຄອງເງິນຕາ 6 ເດືອນຕົ້ນປີ ແລະວຽກຈຸດສຸມຄຸ້ມຄອງເງິນຕາ 6 ເດືອນທ້າຍປີ ແລະສະຫຼຸບຕີລາຄາການຈັດຕັ້ງປະຕິບັດຄຳສັ່ງເລກທີ 02/ນຍ, ວ່າດ້ວຍການປັບປຸງບັນດາລະບຽບການ ແລະກົນໄກປະສານງານໃນການດໍາເນີນທຸລະກິດຢູ່ ສປປ ລາວ; 2) ສະຫຼຸບລາຍງານຄວາມຄືບໜ້າຂອງການແກ້ໄຂໄພພິບັດໃນຂອບເຂດທົ່ວປະເທດ ແລະການກະກຽມຄວາມພ້ອມເພື່ອຮັບມືກັບໄພພິບັດທີ່ອາດຈະເກີດຂຶ້ນໃນໄລຍະລະດູຝົນທີ່ຈະເຖິງ; 3) ຕີລາຄາການຈັດຕັ້ງປະຕິບັດຄໍາສັ່ງເລກທີ 15/ນຍ,ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະທຸລະກິດໄມ້ໃນໄລຍະ 3 ປີ.

 ນອກຈາກນີ້ຍັງຈະໄດ້ຮັບຟັງຈາກຫຼາຍຂະແໜງການໃນການແກ້ໄຂວຽກງານທີ່ພົ້ນເດັ່ນຈຳນວນໜຶ່ງຕາມວາລະກຳນົດ ແລະກອງປະຊຸມຍັງໄດ້ຊຸກຍູ້ເປີດຂະບວນການແຂ່ງຂັນຮັກຊາດ ແລະການພັດທະນາພາຍໃຕ້ຫົວຂໍ້ “ການພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນ” ໂດຍໃນ 3 ວັນ, ຈະໄດ້ທົບທວນວຽກງານຂະບວນການແຂ່ງຂັນຮັກຊາດ ແລະພັດທະນາໃນໄລຍະຜ່ານມາ, ພ້ອມທັງຊຸກຍູ້ໃຫ້ພາກທຸລະກິດເຂົ້າຮ່ວມໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ບັນຫາສຳຄັນອີກຈຳນວນໜຶ່ງເຊັ່ນ: ບົດສະຫຼຸບງານລາຍຂາດຕົວແຜນພັດທະນາເສດຖະກິດ-ສັງຄົມ ປີ 2018, ຮ່າງດໍາລັດວ່າດ້ວຍການປ່ຽນແປງທາງດິນຟ້າ ອາກາດ, ການປັບປຸງລາຍການຜະລິດໄມ້ເພື່ອສົ່ງອອກ ແລະຮ່າງຄຳສັ່ງຂອງ ທ່ານນາຍົກລັດຖະມົນຕີວ່າດ້ວຍການ ກວດກາ 438 ໂຄງການເຊົ່າ-ສຳປະທານທີ່ດິນເປັນຕົ້ນ, ສະນັ້ນຈຶ່ງຮຽກຮ້ອງມາຍັງທຸກພາກສ່ວນຍົກສູງຄວາມຮັບຜິດຊອບຂອງຕົນໃນການລາຍງານໃຫ້ມີຄວາມຊັດເຈນ ແລະມີຈຸດສຸມໃນຂອບເຂດຂອງຕົນເອງບັນຫາຂໍ້ຄົງຄ້າງຕ່າງໆໃນແຕ່ລະຂົງເຂດ ແລະພ້ອມກັນປະກອບສ່ວນຄວາມຄິດເຫັນ, ວິເຄາະວິໄຈເຖິງສາເຫດສະເໜີທິດທາງ ແລະ ມາດຕະການໃນການແກ້ໄຂໃນທ້າຍປີກໍຄືໃນຕໍ່ໜ້າຢ່າງຮີບຮ້ອນ, ທ່ານນາຍົກກ່າວຕື່ມ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์