ສສຊ ເຄື່ອນໄຫວ ແລະເຮັດວຽກຢູ່ ທພລ

  ຄະນະຜູ້ແທນສະມາຊິກສະພາແຫ່ງຊາດລາວ (ສສຊ) ຊຶ່ງນໍາໂດຍທ່ານ ນາງ ບົວຄໍາ ທິບພະວົງ ປະທານກໍາມາທິການຍຸຕິທໍາຂອງສະພາແຫ່ງຊາດໄດ້ນໍາພາຄະນະສະມາຊິກສະພາແຫ່ງຊາດທີ່ພວມດໍາເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໄດ້ເຄື່ອນໄຫວ ແລະເຮັດວຽກຢູ່ທະນາ ຄານພັດທະນາລາວ (ທພລ) ໃນວັນທີ 22 ມິຖຸນາ 2019 ທີ່ສໍານັກງານໃຫຍ່ທະນາຄານດັ່ງກ່າວ ແລະໄດ້ມີການຕ້ອນຮັບຢ່າງອົບອຸ່ນຈາກ ທ່ານ ອາຄົມ ປຣະເສີດຜູ້ອໍານວຍການທະນາຄານພັດທະນາລາວພ້ອມຄະນະບໍລິຫານຂັ້ນຕ່າງໆ.

  ປະຈຸບັນ (ທພລ) ໄດ້ມີການປັບປຸງຕົນເອງໃນຫຼາຍດ້ານເພື່ອປະຕິບັດພາລະບົດບາດ-ໜ້າທີ່ຕົ້ນຕໍໃນການເປັນທະນາຄານວິສາຫະກິດຂະໜາດນ້ອຍ-ຂະ ໜາດກາງ (SME’s Bank) ຢ່າງແທ້ຈິງ ແລະໃນຂະນະນີ້; ທພລ ມີຕາໜ່າງການບໍລິການຄວບຄຸມທຸກແຂວງທົ່ົວປະເທດ ແລະມີໜ່ວຍບໍລິການຢູ່ບັນດາຕົວເມືອງຕ່າງໆ ຊຶ່ງເປັນປ່ອງບໍລິການອຳນວຍຄວາມສະດວກໃຫ້ແກ່ວິສາຫະກິດສາມາດເຂົ້າມາປຶກສາຫາລື ແລະ ການເຂົ້າຫາແຫຼ່ງທຶນໄດ້ສະດວກ, ໃນຜ່ານມາໄດ້ຮັບແຫຼ່ງເງິນຝາກດອກເບ້ຍຕໍ່າ 32 ຕື້ກີບຈາກກອງທຶນສົ່ງເສີມ ແລະພັດທະນາ SMEs ເພື່ອມາທົດລອງສົ່ງເສີມໃຫ້ບັນດາວິສາຫະກິດຕ່າງໆ ສາມາດ ເຂົ້າຫາແຫຼ່ງທຶນດອກເບ້ຍຕໍ່າກວ່າປົກກະຕິເພື່ອໃຫ້ເຂົາເຈົ້າມີຕົ້ນທຶນທີ່ຕໍ່າ ແລະ ສາມາດແຂ່ງຂັນໄດ້ ແລະສ້າງຄວາມເຂັ້ມແຂງໃຫ້ເປັນລະບົບ.

  ນອກຈາກແຫຼ່ງທຶນພິເສດນີ້ແລ້ວ, ທພລ ຍັງລະດົມແຫຼ່ງທຶນຈາກສັງຄົມເພື່ອສຸມໃສ່ສົ່ງເສີມ SMEs ຊຶ່ງເປັນບູລິມະສິດຕົ້ນຕໍຂອງຕົນ; ພ້ອມນີ້, ທພລ ຮ່ວມມືກັບກະຊວງອຸດສາຫະກຳ ແລະ ການຄ້າ ແລະພາກສ່ວນກ່ຽວຂ້ອງໄດ້ ສ້າງຄວາມເຂັ້ມແຂງດ້ານວິຊາສະເພາະ ໃຫ້ບັນດາ SMEs ມີຄວາມພ້ອມເພື່ອ ເຂົ້າຫາແຫຼ່ງທຶນ; ທພລ ຍັງສະແດງເຈດຈຳນົງເຂົ້າຮ່ວມໂຄງການຊຸກຍູ້ຊ່ວຍເຫຼືອໃຫ້ແກ່ SMEs ທີ່ກໍານົດອັດຕາດອກເບ້ຍ ແລະຄ່າທໍານຽມຕໍ່າກວ່າລູກຄ້າປົກກະຕິ, ໂຄງການດັ່ງກ່າວພາຍໃຕ້ການຊ່ວຍ ເຫຼືອຂອງ ILO; ນອກນີ້, ຍັງມີບັນດາ ຂໍ້ກໍານົດກົດລະບຽບ ແລະແຈ້ງການ ຕ່າງໆເປັນບ່ອນອີງໃນຂອດການປະຕິບັດວຽກງານໃຫ້ດໍາເນີນໄປຢ່າງເປັນລະບົບ;ມີໂຄງຮ່າງການຈັດຕັ້ງ, ການແບ່ງຄວາມຮັບຜິດຊອບຂອງໜ້າທີ່ວຽກງານໂດຍລະອຽດໃນແຕ່ລະຂັ້ນຈິ່ງເຮັດໃຫ້ການເຮັດວຽກມີຄວາມສະດວກຄ່ອງຕົວຫຼາຍຂຶ້ນ.

ໃນໂອກາດດັ່ງກ່າວ;ບັນດາທ່ານສະມາຊິກສະພາແຫ່ງຊາດລາວຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານການເກັບລາຍຮັບຜ່ານ ທພລ ຕາມດ່ານສາກົນທີ່ກໍາລັງດໍາເນີນຢູ່ໃນຂະນະນີ້ ແລະຜົນສໍາເລັດໃນການຈັດຕັ້ງປະຕິບັດໂຄງການຂອງພາກລັດໃນໄລຍະຜ່ານລວມທັງອາກອນຢູ່ນະຄອນຫຼວງວຽງຈັນ ແລະຊັບສິນຂອງລັດ; ນອກນີ້, ຄະນະວິຊາການຂອງ ທພລ ຍັງໄດ້ນໍາສະເໜີການຈັດຕັ້ງປະຕິບັດວຽກງານຂະແໜງພາສີ-ອາກອນ-ທະນາຄານກ່ຽວ ກັບການແຈ້ງເສຍພາສີຜ່ານລະບົບ Single window (ໂດຍບໍລິສັດບີວັກ); ຈາກນັ້ນ, ທ່ານປະທານກໍາມາທິການສະພາແຫ່ງຊາດ ແລະ ສະມາຊິກສະພາແຫ່ງຊາດໄດ້ຕີລາຄາສູງຕໍ່ການດໍາເນີນທຸລະກິດຂອງ ທພລ ໃນຜ່ານມາ; ພ້ອມດຽວກັນນັ້ນ,ຍັງໄດ້ມີຄໍາຄິດຄໍາເຫັນ ແລະໄດ້ຊັກຖາມຄະນະບໍລິຫານ ທພລ ໃນການປັບປຸງ ແລະພັດທະນາເຕັກໂນໂລຊີໃຫ້ມີຄວາມທັນສະໄໝ ແລະໃຫ້ສົມກັບເປັນທະນາຄານທຸລະກິດຂອງລັດຖະບານ; ຈາກນັ້ນ,ຄະນະຜູ້ແທນກໍ່ໄດ້ເຄື່ອນ ໄຫວ, ຕິດຕາມ ແລະລົງກວດກາຜົນການເກັບເງິນອາກອນຕົວຈິງຜ່ານລະບົບ ທພລ ຢູ່ດ່ານຂົວມິດຕະພາບແຫ່ງທີ 1 ນະຄອນຫຼວງວຽງຈັນ-ໜອງຄາຍ.

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດສັງຄົມ

แชร์