ລາວ-ຫວຽດນາມ ຮ່ວມລົງນາມຊື້-ຂາຍໄຟຟ້າເຂື່ອນນ້ຳຊຳ 3

   ທ່ານ ຈິງ ດິງ ຢຸງ ຮອງນາຍົກລັດຖະມົນຕີແຫ່ງ ສສ ຫວຽດນາມ ພ້ອມດ້ວຍຄະນະໄດ້ເດີນທາງມາຢ້ຽມຢາມເຮັດວຽກຢູ່ ສປປ ລາວ, ໃນລະຫວ່າງວັນທີ 24-25 ມິຖຸນາ 2019, ເພື່ອເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ, ໂດຍຕອບສະໜອງຕາມຄຳເຊີນຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ແລະທັງສອງຝ່າຍໄດ້ຮ່ວມເປັນສັກຂີພິຍານໃນພິທີເຊັນສັນຍາຊື້-ຂາຍໄຟຟ້າເຂື່ອນໄຟຟ້ານ້ຳຊຳ 3 ລະຫວ່າງບໍລິສັດພົງຊັບທະວີ ຂອງລາວກັບລັດວິສາຫະກິດໄຟຟ້າຫວຽດນາມ.

  ວັນທີ 24 ມິຖຸນາ ທີ່ຫໍປະຊຸມແຫ່ງຊາດກ່ອນພິທີເຊັນສັນຍາຊື້-ຂາຍໄຟຟ້າເຂື່ອນໄຟຟ້ານ້ຳຊຳ 3 ລະຫວ່າງບໍລິສັດພົງຊັບທະວີຂອງລາວກັບລັດວິສາຫະກິດໄຟ ຟ້າຫວຽດນາມຈະຮ່ວມກັນລົງນາມເປັນສັກຂີພິຍານຂອງ ທ່ານ ສອນໄຊ ສີພັນດອນ ແລະ ທ່ານ ຈິງ ດິງ ຢຸງ ກໍໄດ້ມີການການພົບປະຂອງສອງຝ່າຍຂຶ້ນ, ຊຶ່ງໄດ້ຕີລາຄາສູງຕໍ່ພັກ-ລັດຂອງສອງປະເທດທີ່ໄດ້ເອົາໃຈໃສ່ໃນການຊຸກຍູ້ການພົວພັນຮ່ວມມືດ້ານເສດຖະກິດຂອງສອງຝ່າຍໂດຍສະເພາະແມ່ນການຈັດຕັ້ງປະຕິບັດບັນດາຂໍ້ຕົກລົງການຮ່ວມມືຕ່າງໆລະຫວ່າງສອງປະເທດໃນບົດບັນທຶກຄວາມເຂົ້າໃຈຂອງສອງກົມການເມືອງ, ບົດບັນທຶກຂອງກອງປະຊຸມຄັ້ງທີ 41 ຂອງສອງຄະນະກຳມະການຮ່ວມມື ລາວ-ຫວຽດນາມ ກໍ່ຄືຂໍ້ຕົກລົງຮ່ວມມືປະຈຳປີ 2019 ແລະ ເອກະສານຮ່ວມມືອື່ນໆທີ່ສອງຝ່າຍໄດ້ມີການຕົກລົງຮ່ວມ ກັນ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບແມ່ນສືບຕໍ່ຮ່ວມມືກັນຢ່າງແໜ້ນແຟ້ນເພື່ອປົກປັກຮັກສາຜືນແຜ່ນດິນອັນຄົບຖ້ວນ ແລະແນວ ທາງການພັດທະນາຂອງແຕ່ລະປະເທດແນໃສ່ສ້າງເສັ້ນຊາຍແດນໃຫ້ເປັນເສັ້ນຊາຍແດນແຫ່ງສັນຕິພາບ ແລະມີການພັດທະນາແບບຍືນຍົງ.

  ການຮ່ວມມືດັ່ງກ່າວໄດ້ສະແດງໃຫ້ເຫັນໃນມູນຄ່າການຄ້າສອງຝ່າຍເພີ່ມ 13,24% ໃນ 5 ເດືອນຕົ້ນປີ 2019 ແລະຊຸກຍູ້ໃຫ້ມີການຮ່ວມມືກັນຫຼາຍຂຶ້ນ ດ້ານພະລັງງານໄຟຟ້າເພື່ອໃຫ້ສາມາດບັນລຸໄດ້ຕາມເປົ້າໝາຍ ແລະໃນປີ 2018 ຜ່ານມາການຄ້າສອງຝ່າຍສາມາດບັນລຸໄດ້ 1 ຕື້ໂດລາສະຫະລັດ, ເຮັດໃຫ້ຫວຽດນາມຍັງເປັນປະເທດທີ່ຈັດຢູ່ໃນອັນດັບ 3 ຂອງການລົງທຶນຕ່າງປະເທດຢູ່ ສປປ ລາວ, ໂດຍນັບແຕ່ປີ 1989 ເປັນຕົ້ນມາມີທັງໝົດ 413 ໂຄງການ, ມູນຄ່າອະນຸມັດຫຼາຍກວ່າ 4,1 ຕື້ໂດລາສະຫະລັດ ແລະ ໃນປີນີ້ຫວຽດນາມຍັງໄດ້ສືບຕໍ່ໃຫ້ການຊ່ວຍເຫຼືອແກ່ລາວຕື່ມ,ຊຶ່ງແຜນປະຈຳ ປີ 2019 ແມ່ນ 711 ຕື້ດົ່ງ ເພື່ອໃຊ້ເຂົ້າໃນການຈັດຕັ້ງປະຕິບັດວຽກງານໃນບັນດາໂຄງການຕ່າງໆຢ່າງມີຈຸດສຸມ,ຮັບປະກັນຄຸນນະພາບ ແລະມີຄວາມຄືບໜ້າເປັນຕົ້ນໂຄງການປຸກສ້າງຫໍສະພາແຫ່ງຊາດລາວຫຼັງໃໝ່ມູນຄ່າ 111,75 ລ້ານໂດລາສະຫະລັດແມ່ນມີຄວາມຄືບໜ້າໄປເລື້ອຍໆ, ໂຄງການກໍ່ສ້າງໂຮງໝໍແຂວງຊຽງຂວາງ ແລະໂຮງໝໍແຂວງຫົວພັນຄາດວ່າຈະສຳເລັດໃນຕາມກຳນົດໄວໆນີ້, ສ່ວນໂຄງການກໍ່ສ້າງສະໜາມບິນໜອງຄ້າງແມ່ນສຳເລັດແລ້ວ 75% ແລະສະເໜີໃຫ້ສືບຕໍ່ຊຸກຍູ້ໃຫ້ສຳເລັດຕາມກຳນົດເວລາ, ຂະນະທີ່,ຝ່າຍຫວຽດນາມກໍຍິນດີສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງສອງປະເທດໃຫ້ນັບມື້ໄດ້ຮັບການຍົກລະດັບສູງຂຶ້ນອີກ ແລະ ມີບາດກ້າວອັນໃໝ່ໃນອະນາຄົດເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດຫວຽດນາມ-ລາວ ລາວ-ຫວຽດນາມ.

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດສັງຄົມ

แชร์