ໄຊສົມບູນ ເປີດບັ້ນສອບເສັງຈົບຊັ້ນ ມ7

 ພິທີເປີດບັ້ນສອບເສັງຈົບຊັ້ນ ມ7 ປະຈຳສົກຮຽນ 2018-2019 ທົ່ວແຂວງໄຊສົມບູນ ໄດ້ຈັດຂຶ້ນໃນວັນທີ  24 ມິຖຸນາຜ່ານມານີ້ຢູ່ຫ້ອງ                ປະຊຸມພະແນກສຶກສາທິການ ແລະກີລາແຂວງໂດຍການເປັນຂອງທ່ານ ບຸນຜັນ ພົມມະຈັນປະທານກວດກາພັກ-ລັດແຂວງປະທານຊີ້ນຳລວມແລະຕັດສິນຜົນການສອບເສັງ,ມີຕາງໜ້າຈາກກະຊວງສຶກສາທິການແລະກີລາ,ອຳນວຍການໂຮງຮຽນ,ຄູອາຈານແລະນັກສອບເສັງຈາກສູນສອບເສັງ ມສ ໄຊ ສົມບູນພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ດົວຊົ່ງໄຊກໍຮອງຫົວໜ້າພະແນກສຶກສາທິການ ແລະກີລາແຂວງໄຊສົມບູນໄດ້ລາຍງານສະພາບການກະກຽມກ່ຽວກັບການຈັດຕັ້ງການສອບເສັງໃນສົກຮຽນ 2018-2019 ນີ້ຊຶ່ງໃນທົວແຂວງໄຊສົມບູນມີນັກສອບເສັງ ທັງໝົດ 1.283  ຄົນ, ຍິງ 534 ຄົນ, ມີ 9 ສູນສອບເສັງ, ມີ 66 ຫ້ອງສອບເສັງ  ແລະມີ 4 ວິຊາສອບເສັງ ຄື:ວິຊາພາສາລາວ-ວັນນະຄະດີ,ຄະນິດສາດ, ເຄມີສາດ ແລະປະຫວັດສາດຊຶ່ງຈະດຳເນີນການສອບ ເສັງເປັນເວລາ 2 ວັນເລີ່ມແຕ່ວັນທີ 25-26 ມິຖຸນາ ນີ້.ຈາກນັ້ນໄດ້ຮັບ ຟັງການຜ່ານລະບຽບການສອບເສັງເພື່ອຮັບປະກັນການສອບເສັງໄດ້ດຳເນີນໄປດ້ວຍຄວາມຖືກຕ້ອງ ແລະ ໂປ່ງໃສທັງນີ້ກໍ່ເພື່ອເປັນການວັດແທກຄວາມຮູ້,ຄວາມສາມາດ ແລະຄວາມເຂົ້າໃຈຂອງນັກສອບເສັງຕໍ່ ກັບການຮຽນແລະຍັງເປັນການປະເມີນການສິດສອນຂອງຄູ-ອາຈານຕໍ່ກັບການຈັດຕັ້ງປະຕິບັດແຜນພັດທະນາການສຶກສາໃນໄລຍະຜ່ານມາ.

ໂອກາດນີ້ທ່ານ ບຸນຜັນ ພົມມະຈັນປະທານກວດກາພັກ-ລັດແຂວງປະທານຊີ້ນຳລວມ ແລະຕັດສິນຜົນ                                                       ການສອບເສັງໄດ້ມີຄຳເຫັນໂອ້ລົມແລະກ່າວເປີດບັ້ນສອບເສັງໃນຄັ້ງນີ້ຢ່າງເປັນທາງການຊຶ່ງທ່ານໄດ້ຮຽກຮ້ອງໃຫ້ຄະນະຮັບຜິດຊອບການສອບເສັງຕ້ອງເອົາໃຈໃສ່ໃນການປະຕິບັດກົດລະບຽບຢ່າງເຄັ່ງຄັດຕິດຕາມກວດກາໂດຍສະເພາະແມ່ນຄະແນນໃຫ້ມີຄວາມໂປ່ງໃສ ແລະຮຽກຮ້ອງໃຫ້ນັກສອບເສັງແຕ່ລະຄົນຈົ່ງພ້ອມກັນສຸມສະຕິປັນຍາຂອງຕົນເຂົ້າໃນການສອບເສັງປະຕິບັດກົດລະບຽບການສອບເສັງແລະໂມງເວລາຢ່າງເຂັ້ມງວດເພື່ອໃຫ້ທຸກຄົນເສັງຜ່ານແລະໄດ້ຄະ ແນນດີເພື່ອເຮັດວຽກງານການສຶກສາຂອງແຂວງກໍ່ຄືທົ່ວປະເທດໃຫ້ກ້າວຂຶ້ນທຽບທັນກັບສາກົນ.

 ພາບ ແລະຂາ່ວໂດຍ: ໜັງສືພິມເສດຖະກິດ-ສັງຄົມ

แชร์