ກຽມຍົກລະດັບປ່າໂຄກ ໂອງ-ມັ່ງ ຂື້ນເປັນເຂດອະນຸລັກລະດັບຊາດ

  ຫຼາຍພາກສ່ວນທີ່ກ່ຽວຂ້ອງຈາກຂັ້ນສູນກາງ ແລະທ້ອງຖິ່ນຂອງ ແຂວງສະຫວັນນະເຂດ ຮ່ວມປຶກສາຫາລືກັນກ່ຽວກັບການຍົກລະດັບເຂດປ່າໂຄກອະນຸລັກໂອງ-ມັ່ງຂຶ້ນເປັນເຂດອະນຸລັກພັນພືດ-ສັດແຫ່ງຊາດຊຶ່ງກວມເອົາ 5 ເມືອງ ຂອງແຂວງສະຫວັນນະເຂດ.

   ກອງປະຊຸມປຶກສາຫາລືດັ່ງກ່າວຈັດຂຶ້ນທີ່ແຂວງສະຫວັນນະເຂດເມື່ອທ້າຍອາທິດຜ່ານມາຊຶ່ງຈັດໂດຍໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງໃນລະ ບົບນິເວດປ່າໂຄກພາກໃຕ້ຂອງລາວພາຍໃຕ້ການເປັນປະທານຂອງທ່ານ ສັງທອງ ສຸດທຳມະໂກດ ຮອງຫົວໜ້າກົມປ່າໄມ້ທັງເປັນຜູ້ບໍລິຫານໂຄງການ, ທ່ານ ວາລິຍະ ສີຈັນທອງທິບ ຫົວໜ້າພະແນກແຜນການ-ການລົງທຶນແຂວງ ແລະທ່ານ ວໍລະສິດ ສີວົງດາວ ຮອງຫົວໜ້າພະແນກກະສິກຳ-ປ່າໄມ້ແຂວງຈາກນີ້ກໍ່ມີບັນດາພະແນກການກົມກອງອ້ອມຂ້າງແຂວງ, ອຳນາດການປົກຄອງເມືອງ, ບ້ານເປົ້າໝາຍ,ບັນດາຊ່ຽວຊານ ແລະວິຊາການກ່ຽວຂ້ອງເຂົ້າຮ່ວມຢ່າງພ້ອມພຽງ.

  ປະຈຸບັນ, ເຂດປ່າໂຄກອະນຸລັກໂອ-ມັ່ງ ມີສະຖານະເປັນເຂດອະນຸລັກລະດັບແຂວງຊຶ່ງເຂດດັ່ງກ່າວແມ່ນມີຄວາມອຸດົມສົມບູນທາງດ້ານຊັບພະຍາກອນປ່າ ໄມ້, ສັດນໍ້າ-ສັດປ່າ ແລະພັນພືດນາໆຊະນິດທີ່ຫາຍາກ ແລະໃກ້ຈະສູນພັນໂດຍສະເພາະແລ້ວແມ່ນໂອງ-ມັ່ງ ຈາກການສຳຫຼວດຜ່ານມາສາມາດຈຳແນກໄດ້ 647 ຊະນິດໃນນີ້ພືດ 126 ຊະນິດ, ນົກ 278 ຊະນິດ,

   ສັດລ້ຽງລູກດ້ວຍນົມ 67 ຊະນິດ, ສັດເລືອຄານ 47 ຊະນິດ, ສັດເຄິ່ງບົກເຄິ່ງນ້ຳ 38 ຊະນິດ ແລະປາ 91 ຊະນິດນອກນີ້, ເຂດປ່າໂຄກອະນຸລັກໂອງ-ມັ່ງ ຍັງເປັນເຂດທີ່ສາມາດພັດທະນາເປັນແຫຼ່ງທ່ອງທ່ຽວທາງທຳມະຊາດ, ວັດທະນະທຳ ແລະ ຮີດຄອງປະເພດນີຂອງປະຊາຊົນບັນດາເຜົ່າທີ່ນອນຢູ່ໃນ ແລະອ້ອມ ຮອບເພື່ອດຶງດູດເອົານັກທ່ອງທ່ຽວ,ນັກລົງທຶນພາຍໃນ ແລະຕ່າງປະເທດເຂົ້າມາພັດທະນາ ແລະສ້າງລາຍຮັບໃຫ້ແກ່ຊຸມຊົນ ແລະລັດຖະບານໄດ້ຢ່າງຫຼວງຫຼາຍ ສະນັ້ນຈິ່ງມີຄວາມສຳຄັນ ແລະຈຳເປັນທີ່ຕ້ອງໄດ້ມີການຄຸ້ມຄອງ, ປົກປັກຮັກສາ, ບູລະນະເຂດປ່າໂຄກອະນຸລັກໂອງ-ມັ່ງ ຊຶ່ງເປັນ ເຂດອະນຸລັກທີ່ມີພຽງແຫ່ງດຽວໃນ ສປປ ລາວ ເພື່ອໃຫ້ມີຄວາມຍືນຍົງຕະຫຼອດໄປຮັກສາໄວ້ເພື່ອບໍ່ໃຫ້ລູກຫຼານໄດ້ເບິ່ງໄດ້ຊົມໃຊ້ສືບທອດກັນໄປໃນອະນາຄົດ.

  ສຳລັບເນື້ອທີ່ໆຕ້ອງການສະເໜີຍົກລະດັບເຂດປ່າໂຄກອະນຸລັກໂອງ-ມັ່ງ ຂຶ້ນເປັນເຂດອະນຸລັກພັນພືດ-ພັນສັດແຫ່ງນີ້ມີ 1,3 ແສນເຮັກຕາ, ກວມ 5 ເມືອງ, ລວມມີ 55 ບ້ານ ປະກອບມີເມືອງຊົນນະບູລີ, ເມືອງພີນ, ທ່າປາງ, ພະລານໄຊ ແລະເມືອງສອງຄອນ.

 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์