ລັດຖະບານ ມອບຫຼຽນກາມິດຕະພາບແກ່ທະນາຄານແຫ່ງປະເທດໄທ

 ເພື່ອເປັນການຈາລຶກໝາກຜົນແຫ່ງການຮ່ວມມືທັງເປັນການເສີມສ້າງມິດຕະພາບ ແລະການຮ່ວມມືທີ່ດີທີ່ມີມາຕະຫຼອດໄລຍະ 25 ປີຜ່ານມາ ລະຫວ່າງທະ ນາຄານແຫ່ງ ສປປ ລາວ ແລະທະນາຄານແຫ່ງປະເທດໄທ. ສະນັ້ນ; ໃນ ວັນທີ 22 ມິຖຸນາ 2019 ທີ່ໂຮງແຮມລາວພລາຊາ ນະຄອນຫຼວງວຽງຈັນ, ລັດຖະບານແຫ່ງສປປ ລາວ ໄດ້ຕົກລົງມອບຫຼຽນກາມິດຕະພາບແກ່ທະນາຄານແຫ່ງປະເທດໄທໂດຍແມ່ນທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວໃຫ້ກຽດປະດັບຫຼຽນກາດັ່ງກ່າວຊຶ່ງແມ່ນ ທ່ານ ດຣ. ວິຣະໄທ ສັນຕິປຣະພົບ ຜູ້ວ່າການທະນາຄານແຫ່ງປະເທດໄທເປັນຜູ້ຮັບໂດຍການເປັນສັກຂີພິຍານ ຂອງພະນັກງານທັງ 2 ຝ່າຍ ແລະໃນຂະນະດຽວກັນນີ້ທະນາຄານແຫ່ງ ສປປ ລາວ ແລະທະນາຄານແຫ່ງປະເທດໄທກໍ່ໄດ້ບັນລຸການເຊັນບົດບັນທຶກຄວາມເຂົ້າ ໃຈວ່າດ້ວຍການການຄຸ້ມຄອງທະນາຄານທຸລະກິດ.

ທະນາຄານແຫ່ງ ສປປ ລາວ ແລະ ທະນາຄານແຫ່ງປະເທດໄທມີການພົວພັນ ແລະຮ່ວມມືນໍາກັນມາເປັນເວລາ 2 ທົດ ສະຫວັດກ່ວາຊຶ່ງໃນນີ້ທະນາຄານແຫ່ງປະເທດໄທໄດ້ສ້າງໂຄງການຊ່ວຍເຫຼືອດ້ານການສຶກສາໃນຫຼັກສູດປະລິນຍາໂທສາຂາບໍລິຫານທຸລະກິດຮ່ວມລາວ-ໄທໃນໄລຍະປີ 1994-1998 ແລະມີພະນັກ ງານຂອງ 2 ທະນາຄານກາງເຂົ້າສຶກສາໃນໂຄງການດັ່ງກ່າວ; ໃນທ້າຍປີ 2003 ສອງທະນາຄານກາງໄດ້ບັນລຸການເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມືທະວິພາຄີຮ່ວມກັນຊຶ່ງໄດ້ກາຍເປັນຂີດໝາຍສໍາຄັນໃຫ້ແກ່ການເສີມຂະຫຍາຍສາຍພົວພັນ ແລະການຮ່ວມມືໂດຍກໍານົດໃຫ້ມີການພົບປະໃນຂັ້ນການນໍາ 2 ປີຕໍ່ຄັ້ງ; ນອກນີ້, ຍັງມີການຊ່ວຍເຫຼືອທາງດ້ານວິຊາການ,ການແລກປ່ຽນຄວາມຮູ້ ແລະຖອດຖອນບົດຮຽນທີ່ຕິດພັນກັບວຽກງານວິຊາສະເພາະ ແລະເສີມສ້າງຄວາມອາດສາມາດຂອງພະນັກງານຮ່ວມກັນຢ່າງເປັນປົກກະຕິໃນທຸກໆປີ.

  ນັບແຕ່ປີ 2004 ມາເຖິງປັດຈຸບັນ; ທະນາຄານແຫ່ງປະເທດໄທໄດ້ສົ່ງຊ່ຽວຊານມາຈັດສໍາມະນາຢູ່ທະນາຄານແຫ່ງ ສປປ ລາວ ໃນຫຼາຍຫົວຂໍ້ ຊຶ່ງມີຄົນເຂົ້າ ຮ່ວມ 950 ເທື່ອຄົນ ແລະ ພະນັກງານທະນາຄານແຫ່ງ ສປປ ລາວ ໄປຖອດຖອນບົດຮຽນຢູ່ປະເທດໄທ 40 ຫົວຂໍ້ມີຄົນເຂົ້າຮ່ວມ 265 ເທື່ອຄົນ; ພ້ອມ ດຽວກັນນີ້, ທະນາຄານແຫ່ງປະເທດໄທ ຍັງໃຫ້ທຶນການສຶກສາລະດັບ ປະລິນຍາຕີ-ປະລິນຍາໂທໃຫ້ທະນາຄານກາງຂອງ ລາວຈໍານວນໜຶ່ງ, ສະໜອງປຶ້ມຕໍາລາໃຫ້ຫ້ອງສະໝຸດທະນາຄານເກືອບ 1.000 ເຫຼັ້ມ; ຄຽງຄູ່ກັນນີ້,ທະນາຄານແຫ່ງປະເທດໄທຍັງລິເລີ່ມສ້າງໃຫ້ມີກອງປະຊຸມທຸລະກິດລາວ-ໄທ ໂດຍສ້າງໂອ ກາດໃຫ້ທະນາຄານທຸລະກິດຂອງ 2 ປະເທດມີໂອກາດແລກປ່ຽນກັນໂດຍຜັດປ່ຽນກັນເປັນເຈົ້າພາບໃນແຕ່ລະປີ ແລະ ຍັງຈັບຄູ່ຮ່ວມທາງດ້ານທຸລະກິດລະ ຫວ່າງທະນາຄານທຸລະກິດ ລາວ ແລະ ໄທ; ນອກຈາກການຮ່ວມມືດ້ານວິຊາການ ແລະກິລາມິດຕະພາບແລ້ວ, ຍັງມີການຮ່ວມມືໃນວຽກງານຄຸ້ມຄອງຫຼັກຊັບ, ວຽກງານຊໍາລະສະສາງ ແລະວຽກງານຄຸ້ມຄອງທະນາຄານທຸລະກິດ ແລະທະນາຄານແຫ່ງປະເທດໄທຍັງປະກອບສ່ວນຊ່ວຍເຫຼືອບັນເທົາທຸກແກ່ຜູ້ປະສົບໄພພິບັດຢູ່ເມືອງສະໜາມໄຊ ແຂວງອັດຕະປື 2 ຄັ້ງ ເປັນເງິນຈໍານວນໜຶ່ງ.

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์