ສຳເລັດສ້າງທາງຊົນນະບົດຢູ່ 2 ເມືອງພູດອຍ ແຂວງສາລະວັນ

  ທ້າຍອາທິດຜ່ານມານີ້, ທ່ານ ບຸນນານ ປັນຍາຈັກ ຮັກສາການເລຂາພັກ-ເຈົ້າເມືອງສະໝ້ວຍ ແລະທ່ານ ບຸນເຮືອງ ວຽງມະນີ ຮອງເຈົ້າເມືອງຕະໂອ້ຍພ້ອມດ້ວຍຄະນະກຳມະການກວດກາໂຄງການກໍ່ສ້າງເສັ້ນທາງຊົນນະບົດຂັ້ນແຂວງ, ເມືອງ, ຊ່ຽວຊານຈາກປະເທດເຢຍລະມັນ ແລະຜູ້ປະສານງານໂຄງການ KFW, ບໍລິສັດຜູ້ຮັບເໝົາກໍ່ສ້າງໄດ້ລົງຕິດຕາມ, ກວດກາ ແລະ ມອບຮັບຊົ່ວຄາວໂຄງການກໍ່ສ້າງພື້ນຖານໂຄງລ່າງເສັ້ນທາງຊົນນະບົດທີ່ລັດຖະບານເຢຍລະມັນໃຫ້ການຊ່ວຍເຫຼືອ.

 ການລົງກວດກາ ແລະມອບຮັບໂຄງການຊົ່ວຄາວຄັ້ງນີ້ ມີ 2 ໂຄງການ, 2 ເສັ້ນທາງຢູ່ເມືອງພູດອຍ ແຂວງສາລະວັນຄື: ເມືອງຕະໂອ້ຍ ມີ 1 ໂຄງການກໍ່ສ້າ ງເສັ້ນທາງຊົນນະບົດໄລຍະທາງ 24,5 ກິໂລແມັດ ແຕ່ແຍກທາງ 15B ບ້ານກົກບົກຫາບ້ານຊອຍຕາມສັນຍາກໍ່ສ້າງ 18 ເດືອນ ໂດຍແມ່ນບໍລິສັດວັນນະວົງ ກໍ່ສ້າງຂົວທາງເປັນຜູ້ຮັບເໝົາຊຶ່ງໃນສັນຍາເບື້ອງຕົ້ນແມ່ນປູຢາງ 4 ກິໂລແມັດ ຈາກນັ້ນກໍ່ໄດ້ສ້າງສັນຍາເພີ່ມປູຢາງທັງໝົດ, ໜ້າທາງມີຄວາມກວ້າງ 4,8 ແມັດ, ໃນນັ້ນກໍ່ສ້າງຂົວ 3 ແຫ່ງ, ທໍ່ຫຼ່ຽມ 12 ແຫ່ງ, ທໍ່ກົມ 18 ແຫ່ງລວມມູນຄ່າການກໍ່ສ້າງທັງໝົດ 21 ຕື້ກວ່າກີບ.

  ສຳລັບຢູ່ເມືອງສະໝ້ວຍແມ່ນໄດ້ກໍ່ສ້າງເສັ້ນທາງໄລຍະ 42,4 ກິໂລແມັດ ແຕ່ທາງ 15B ຫາ ບ້ານອາສົກຊາຍແດນລາວ-ຫວຽດນາມ ເປັນເສັ້ນທາງປູຢາງ ມີຄວາມກວ້າງ 4,8 ແມັດ, ໃນນັ້ນກໍ່ສ້າງຂົວ 7 ແຫ່ງ, ທໍ່ຫຼ່ຽມ 28 ແຫ່ງ, ທໍ່ກົມ 103 ແຫ່ງມີມູນຄ່າການກໍ່ສ້າງທັງໝົດ 41 ຕື້ກວ່າກີບ ໂດຍແມ່ນບໍລິ ສັດສົມໄຊຈະເລີນການກໍ່ສ້າງ ແລະສ້ອມແປງຂົວທາງຈຳກັດຜູ້ດຽວ ເປັນຜູ້ຮັບເໝົາຊຶ່ງບໍລິສັດຈະໄດ້ຄໍ້າປະກັນໂຄງການໄລຍະ 1 ປີ ເພື່ອແກ້ໄຂບາງຈຸດທີ່ຍັງບໍ່ທັນສຳເລັດ ແລະຮັບປະກັນການຈັດຕັ້ງປະຕິບັດ.

ທັງນີ້ກໍເພື່ອແນໃສ່ຮັບໃຊ້ປະຊາຊົນມີຄວາມສະດວກສະບາຍໃນການໄປມາຫາສູ່, ແກ້ໄຂຊີວິດການເປັນຢູ່ໃຫ້ດີຂຶ້ນເທື່ອລະກ້າວ ແລະໃຫ້ເຂົ້າເຖິງພໍ່ແມ່ປະຊາຊົນຢູ່ເຂດຫ່າງໄກສອກຫຼີກ, ທັງສ້າງເງື່ອນໄຂໃຫ້ແກ່ການຜະລິດເປັນສິນຄ້າຂອງປະຊາຊົນອອກສູ່ທ້ອງຕະຫຼາດເພື່ອສ້າງລາຍໄດ້ໃຫ້ກັບຄອບຄົວກ້າວໄປສູ່ການຫຼຸດພົ້ນອອກຈາກຄວາມທຸກຍາກ.

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์