ຫຼັກຊັບ ທຄຕລ-ກທ ເພີ່ມຄວາມຮູ້ໃຫ້ນັກລົງທຶນ

  ວັນທີ 22 ມິຖຸນາຜ່ານມາທີ່ຕະຫຼາດຫຼັກຊັບນະຄອນຫຼວງວຽງຈັນ ບໍລິສັດຫຼັກຊັບ ທຄຕລ-ກທ ຈຳກັດ ໄດ້ຈັດສຳມະນາເຜີຍແຜ່ຄວາມຮູ້ໃຫ້ແກ່ນັກລົງທຶນ ພາຍໃນຫົວຂໍ້ “ເລີ່ມຕົ້ນການລົງທຶນໃນຮຸ້ນຢ່າງໝັ້ນໃຈ” ເພື່ອເປັນການເຜີຍແຜ່ຄວາມຮູ້ໃຫ້ແກ່ນັກລົງທຶນລາວໃຫ້ມີຄວາມຮູ້ ແລະເຂົ້າໃຈຕື່ມກ່ຽວກັບການລົງທຶນໃນຮຸ້ນ ຫຼືຫຼັກຊັບ ແລະເພື່ອເປັນການສະໜອງຂໍ້ມູນຂ່າວສານທາງດ້ານການເງິນ (ອັບເດດ) ຂອງບໍລິສັດຈົດທະບຽນໃນຕະຫຼາດຫຼັກຊັບລາວໃຫ້ແກ່ນັກລົງທຶນທີ່ສົນໃຈ ແລະ ສາມາດນຳໃຊ້ຂໍ້ມູນເພື່ອເປັນສ່ວນຊ່ວຍໃນການຕັດສິນໃຈລົງທຶນ ແລະ ບໍລິຫານການລົງທຶນຂອງຕົນເອງ. ນອກນັ້ນທາງບໍລິສັດໄດ້ມີການຈັດສຳມະນາໃຫ້ແກ່ນັກລົງທຶນແຕ່ລະປີສະເລ່ຍປະມານ 3-4 ຄັ້ງຕໍ່ປີ, ໄຕມາດລະ 1 ຄັ້ງ ໂດຍບໍ່ເສຍຄ່າໃຊ້ຈ່າຍໃນການເຂົ້າຮ່ວມຮັບຟັງສຳມະນາ.

  ທ່ານ ດຣ ເທບສະຫວັນ ກິຕິຍະວົງ ຜູ້ອໍານວຍການ ບໍລິສັດ ຫຼັກຊັບ ທຄຕລ-ກທ ຈຳກັດໃຫ້ຮູ້ວ່າ: ບໍລິສັດ ທຄຕລ-ກທ ຈຳກັດ ເປັນບໍລິສັດຮ່ວມທຶນລະ ຫວ່າງທະນາຄານການຄ້າຕ່າງປະເທດລາວມະຫາຊົນ (BCEL) ແລະບໍລິສັດຫຼັກຊັບເຄທີຊີມີໂກ້ ຈຳກັດ (KT-ZMICO) ເຊິ່ງສ້າງຕັ້ງຂຶ້ນຢ່າງເປັນທາງການໃນປີ 2010. ບໍລິສັດ ທຄຕລ-ກທ ຈຳກັດ (BCEL-KT) ໄດ້ສະໜອງການບໍລິການກ່ຽວກັບຫຼັກຊັບເຕັມຮູບແບບເຊັ່ນ: ບໍລິການທີ່ປຶກສາດ້ານການເງິນ, ບໍລິການຄໍ້າປະກັນການອອກຈຳໜ່າຍຫຼັກຊັບ ແລະບໍລິການນາຍໜ້າຊື້-ຂາຍຫຼັກຊັບ.

 ປະຈຸບັນ, ທຄຕລ-ກທ ເປັນຜູ້ນຳທາງດ້ານສ່ວນແບ່ງການຕະຫຼາດຊື້-ຂາຍຫຼັກຊັບ ແລະມີຖານນັກລົງທຶນທີ່ໃຫຍ່ທີ່ສຸດໃນ ສປປ ລາວ. ທັງນັ້ນຍັງມີທີມງານນາຍໜ້າຊື້-ຂາຍຫຼັກຊັບ, ທີມງານທີ່ປຶກສາທາງດ້ານການເງິນທີ່ມີປະສົບການ ແລະທີມງານອອກບົດຄົ້ນຄວ້າພ້ອມທັງໜ່ວຍງານສະໜັບສະໜູນທີ່ເຂັ້ມແຂງ .

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์