ຄວາມສໍາຄັນຂອງ ເຮືອນ

ເຮືອນແມ່ນສິ່ງກໍ່ສ້າງຊຶ່ງນຳໃຊ້ເປັນບ່ອນພັກອາໄສຂອງຜູ້ ຄົນ ໂດຍທົ່ວໄປເຮືອນມີພື້ນ,ຜະໜັງ ແລະຫຼັງຄາໄວ້ປ້ອງກັນແສງແດດ,ລົມ,ຝົນແລະສິ່ງອື່ນໆ,ເຮືອນມີຄວາມສໍາຄັນຫຼາຍເປັນໜຶ່ງໃນ 4ປັດໄຈທີ່ສໍາຄັນຂອງຄົນເຮົາ (4 ປັດໄຈມີ:ອາຫານ, ເຄື່ອງນຸ່ງ,ທີ່ຢູ່ອາໄສ ແລະຢາປົວພະຍາດ),ເຮືອນເປັນທີ່ຢູ່ໃຫ້ຄວາມປອດໄພ,ເຮືອນເປັນສູນກາງຂອງສະມາຊິກທຸກຄົນໃນຄອບຄົວ, ເຮືອນເປັນສ່ວນ ໜຶ່ງຂອງຊຸມຊົນ,ເຮືອນແມ່ນພື້ນຖານຂອງສັງຄົມ ແລະເຮືອນແມ່ນສິ່ງທີ່ເຮັດໃຫ້ຊີວິດເຮົາສົມບູນແບບ.

ອີງຕາມຂໍ້ມູນຈາກປຶ້ມວັດທະນະທຳແລະປະເພນີບູຮານລາວໃຫ້ຮູ້ວ່າ:ເຮືອນເປັນທີ່ຢູ່ອາໄສຂອງທຸກໆຄົນທີ່ບໍ່ມີເຮືອນຈະຂຶ້ນຊື່ວ່າບໍ່ມີອັນໃດຈັກຢ່າງຊຶ່ງຈະຖືກກັບພຸດທະພາສິດເລື່ອງນີ້ວ່າ:ພຸດທະການມີເທວະດາຕົນໜຶ່ງມາທູນຖາມບັນຫາພະພຸດທະເຈົ້າ 5 ຂໍ້ດັ່ງນີ້:

ຂໍ້ທີ 1 ທູນຖາມວ່າ: ໃຫ້ອັນໃດ ທີ່ຂຶ້ນຊື່ວ່າການໃຫ້ກຳລັງ.

ຕອບວ່າ: ການໃຫ້ເຂົ້າໃຫ້ນໍ້າ ໂພຊະນະອາຫານແມ່ນຂຶ້ນຊື່ວ່າໃຫ້ກໍາລັງ.

ຂໍ້ທີ 2 ຖາມວ່າ: ໃຫ້ອັນໃດຊື່ວ່າໃຫ້ຜິວພັນ.

ຕອບວ່າ: ແມ່ນການໃຫ້ເຄື່ອງນຸ່ງຫົ່ມຂຶ້ນຊື່ວ່າການໃຫ້ຜິວພັນ.

ຂໍ້ທີ 3 ທູນຖາມວ່າ: ໃຫ້ອັນໃດຂຶ້ນຊື່ວ່າໃຫ້ຄວາມສຸກ.

ຕອບວ່າ:  ໃຫ້ຍານພາຫະນະຂຶ້ນຊື່ວ່າໃຫ້ຄວາມສຸກ.

ຂໍ້ທີ 4 ຖາມວ່າ: ໃຫ້ອັນໃດຂຶ້ນ ຊື່ວ່າໃຫ້ດວງຕາ.

ຕອບວ່າ: ການໃຫ້ແສງສະຫວ່າງມີປະທູບທຽນຂຶ້ນຊື່ວ່າໃຫ້ດວງຕາ.

ສໍາລັບຂໍ້ທີ 5 ຖາມວ່າ: ໃຫ້ອັນ ໃດຂຶ້ນຊື່ວ່າໃຫ້ໝົດທຸກຢ່າງ.

ຕອບວ່າ: ການໃຫ້ທີ່ຢູ່ອາໄສຂຶ້ນຊື່ວ່າໃຫ້ໝົດທຸກຢ່າງ.

ສະນັ້ນ,ພຸດທະພາສິດນີ້ເປັນອັນເຫັນໄດ້ວ່າເຮືອນເປັນຂອງສໍາຄັນເປັນສະຖານທີ່ຢູ່ອາໄສຂອງທຸກຄົນ,ຄົນມີກຳລັງດີ,ຮູບຮ່າງງາມມີຍານພາຫະນະໃຫ້ໃຊ້ສອຍມີຄວາມສຸກພຽບພ້ອມໄປດ້ວຍສັບສົມບັດທຸກຢ່າງແຕ່ຖ້າຂາດເຮືອນຢູ່ເປັນທີ່ອາໄສກໍເທົ່າກັບວ່າຂາດທຸກສິ່ງທຸກຢ່າງ.ດັ່ງນັ້ນ,ການສ້າງເຮືອນຂອງຄົນບູຮານຈຶ່ງມີພິຖີພິຖັນເຂັ້ມງວດກວດຂັນຫຼາຍເລີ່ມຕົ້ນຕັ້ງແຕ່ການຫາເສົາມາປຸກສ້າງຈົນເຖິງສຳເລັດໄດ້ຂຶ້ນໄປຢູ່ອາໄສຊຶ່ງພໍຈະແຍກອອກເປັນຂໍ້ໆທີ່ສຳຄັນດັ່ງນີ້: 1)ການຫາເສົາເຮືອນ,2)ການຝັງເສົາເຮືອນ,3)ການຂຶ້ນເຮືອນແລະ4) ພິທີຂຶ້ນເຮືອນ.

ພາບ ແລະຂາ່ວໂດຍ: ໜັງສືພິມເສດຖະກິດ-ສັງຄົມ

แชร์