ພາສີຄຳມ່ວນລາຍຮັບບັນລຸແຜນ

 ການຈັດເກັບລາຍຮັບຂອງຂະແໜງພາສີແຂວງຄຳມ່ວນແມ່ນເປັນໄປຕາມຄາດໝາຍທີ່ວາງໄວ້ໄລຍະ 5 ເດືອນ ປະຕິບັດໄດ້ແລ້ວ 170,27 ຕື້ກີບ, ທຽບໃສ່ແຜນການປີເທົ່າກັບ 42,82% ໃນຕົວເລກໝົດປີຈຳນວນ 397,7 ຕື້ກີບ ແລະຄາດຄະເນ 6 ເດືອນຕົ້ນປີ 2019 ຈະໃຫ້ບັນລຸ 50% ຂອງແຜນການປີ.

  ທ່ານ ສີສະຫວາດ ໄຊຍະວົງ ຄະນະກອງຄຸ້ມຄອງພາສີ VI ຫົວໜ້າກອງກວດກາພາສີແຂວງຄຳມ່ວນໃຫ້ຮູ້ວ່າ: ການຈັດຕັ້ງປະຕິບັດແຜນເກັບລາຍຮັບຂອງຂະແໜງພາສີແຂວງຄຳມ່ວນແມ່ນໄດ້ຖືເອົາວຽກງານສຶກສາອົບຮົມທາງດ້ານການເມືອງ-ແນວຄິດໃຫ້ພະນັກງານເອົາໃຈໃສ່ເຮັດໜ້າທີ່ຕາມພາລະບົດບາດ ແລະ ຕາມການມອບໝາຍເພື່ອໃຫ້ການຈັດເກັບລາຍຮັບໄດ້ບັນລຸຕາມແຜນການທີ່ວາງໄວ້.

  ສະເພາະການເກັບລາຍຮັບເຂົ້າງົບປະມານໃນປີ 2019 ຂະແໜງພາສີແຂວງໄດ້ຮັບການມອບໝາຍທັງໝົດຈຳນວນ 397,7 ຕື້ກີບ ທຽບໃສ່ປີຜ່ານມາເພີ່ມຂຶ້ນເກືອບ 1 ເທົ່າຕົວ. ຜ່ານການຈັດຕັ້ງປະຕິບັດໃນ 5 ເດືອນປະຕິບັດໄດ້ 170,27% ທຽບໃສ່ແຜນການປີເທົ່າ ກັບ 42,82% ແລະທຽບໃສ່ໄລຍະດຽວກັນຂອງປີຜ່ານມາເທົ່າກັບ 108,18%. ໃນນັ້ນດ່ານຂົວມິດຕະພາບ 3 ປະຕິບັດ   ໄດ້ 114,71 ຕື້ກີບ ເທົ່າກັບ 45,40% ຂອງແຜນການປີ, ດ່າ ນນາເພົ້າ 48,68 ຕື້ກີບ ເທົ່າກັບ 37,45% ແລະກອງ ກວດກາພາສີແຂວງ 6,87 ຕື້ກີບ ເທົ່າ ກັບ 45,81% ຂອງແຜນການປີຊຶ່ງລາຍຮັບສ່ວນໃຫຍ່ໄດ້ຈາກການນຳເຂົ້ານໍ້າມັນເຊື້ອໄຟ, ຄ່າບໍລິການຜ່ານແດນ (ນຳເຂົ້າເພື່ອສົ່ງອອກ) ຄ່າທຳນຽມຕ່າງໆ, ການແກ້ໄຂພາຫະນະທີ່ນຳເຂົ້າບໍ່ຖືກຕ້ອງ, ເຄື່ອງອຸປະ ໂພກ-ບໍລິໂພກ ແລະອື່ນໆ.   

  ສຳລັບແຜນການໃນ 6 ເດືອນທ້າຍປີແມ່ນຈະສືບຕໍ່ເພີ່ມທະວີວຽກງານຕ້ານ ແລະ ສະກັດກັ້ນການລັກລອບສິນຄ້າໜີພາສີໃນທຸກຮູບແບບ, ຕິດຕາມຄຸ້ມ ຄອງການເຄື່ອນຍ້າຍສິນຄ້າພາຍໃນແຂວງ ແລະ ມາຈາກຕ່າງແຂວງ, ການຄຸ້ມຄອງ ແລະ ກວດກາການຂຸດຄົ້ນໄມ້, ການເຄື່ອນຍ້າຍ ແລະ ທຸລະກິດໄມ້ລວມເຖິງການແກ້ໄຂລົດລັກລອບນຳເຂົ້າ, ລົດທີ່ອອກທະບຽນຊົ່ວຄາວ ແລະປ້າຍລັດທີ່ຍັງຄ້າງເສຍພາສີໃນທົ່ວແຂວງ.

ຂຽນໂດຍ: ກອງຄຳ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์