ໂຮງຮຽນໄຊພອນສົມບູນມອບໃບຍ້ອງຍໍ ໃຫ້ນັກຮຽນຜົນງານດີເດັ່ນ

ໂຮງຮຽນໄຊພອນສົມບູນເປັນໂຮງຮຽນພາກເອກະຊົນແຫ່ງໜຶ່ງຕັ້ງຢູ່ບ້ານຈອມເພັດໃຕ້ເມືອງສີສັດຕະນາກນະຄອນຫຼວງວຽງຈັນທີ່ໄດ້ເອົາໃຈໃສ່ການຮຽນ-ການສອນຕາມຫຼັກສູດຂອງກະຊວງສຶກສາທິການ ແລະກີລາ ໂດຍເນັ້ນການສິດສອນຕາມ 5 ຫຼັກມູນຂອງການສຶກສາ, 3 ຫຼັກສະນະ ແລະ3 ຂໍ້ແຂ່ງຂັນຄຽງຄູ່ກັນໄປນັ້ນກໍໄດ້ມີພາສາອັງກິດເພື່ອໃຫ້ຮັບປະກັນຄຸນນະພາບໃນລະດັບສາກົນ.

ວັນທີ 24 ມິຖຸນາ 2019 ໂຮງຮຽນໄຊພອນສົມບູນໄດ້ມີພິທີມອບໃບຢັ້ງຢືນການຮຽນຈົບຊັ້ນ ປ ກຽມແລະຊັ້ນ ປ 5 ແລະມອບໃບຍ້ອງ ຍໍຊົມເຊີຍໃຫ້ນັກຮຽນທີ່ມີຜົນງານດີເດັ່ນ-ຮຽນເກັ່ງ,ການເຄື່ອນໄຫວນອກຫຼັກສູດແລະຂຽນງາມຖືກຫຼັກໄວຍະກອນໂດຍການເຂົ້າຮ່ວມຂອງທ່ານເຂັມພອນໄຊຍະວົງຜູ້ອໍານວຍການໂຮງຮຽນໄຊພອນສົມບູນ,ມີບັນດາຄູ-ອາຈານແລະນ້ອງນັກຮຽນເຂົ້າຮ່ວມ.

ໃນສົກຮຽນ 2018-2019 ມີນັກຮຽນທັງໝົດ 220 ຄົນ, ຍິງ 113 ຄົນ ໃນນັ້ນມີຊັ້ນອະນຸບານ 90 ຄົນ, ຍິງ 55 ຄົນ, ຊັ້ນປະຖົມ 130 ຄົນ, ຍິງ 58 ຄົນ.ສໍາລັບການສອບເສັງໃນສົກຮຽນນີ້ຈົບຊັ້ນ ອະນຸບານ ປ ກຽມມີ 22 ຄົນ, ຍິງ11 ຄົນ ແມ່ນໄດ້ 100%, ຈົບຊັ້ນປະຖົມ ປ5 ມີ 18 ຄົນ, ຍິງ 6 ຄົນ ແມ່ນໄດ້ 100% ຊຶ່ງໃນນີ້ຊັ້ນ ປ5 ໄດ້ຄະແນນຮອບດ້ານຈໍານວນ 3 ຄົນ ໄດ້ຮັບໃບຍ້ອງຍໍຂັ້ນເມືອງ 3 ຄົນ.

ໂຮງຮຽນໄຊພອນສົມບູນໃນໄລຍະຜ່ານມາໄດ້ເອົາໃຈໃສ່ໃຫ້ຄວາມສໍາຄັນໃນດ້ານຄຸນນະພາບການ ຮຽນ-ການສອນຮັບປະກັນການຮຽນຮູ້ໃນການປູກຈິດສໍານຶກຂອງນັກຮຽນໃນການກ້າສະແດງອອກກ້າຄິດກ້າທໍາກ້າຕັດສິນໃຈ,ກ້າເຮັດໃນສິ່ງທີ່ຖືກຕ້ອງຜ່ານກິດຈະກໍາການຮຽນ-ການສອນໃນຫ້ອງຮຽນແລະນອກໂຮງຮຽນ,ການເຄື່ອນໄຫວວຽກງານກິດຈະກໍານອກຫຼັກສູດ,ການສະແດງທາງດ້ານກີລາ-ສີລະປະ ແລະອື່ນໆ.

 ພາບ ແລະ ຂາ່ວໂດຍ: ໜັງສືພິມເສດຖະກິດ-ສັງຄົມ

แชร์