ນ້ອງນັກຮຽນທີ່ປະສົບໄພເມືອງສະໜາມໄຊໄດ້ຮັບການຊ່ວຍເຫຼືອ

   ໃນວັນທີ 2 ມັງກອນ ຜ່ານມາ ບໍລິສັດສະຫຍາມລ້ານຊ້າງຮ່ວມກັບບໍລິສັດກະທິລັດດາຈາກປະເທດໄທໄດ້ນຳເອົາໂຕະຕັ່ງນັກຮຽນຈຳນວນ 70 ຊຸດ ເພື່ອຊ່ວຍເຫຼືອນ້ອງນັກຮຽນຜູ້ປະສົບໄພພິບັດທີ່ເມືອງສະໜາມໄຊມູນຄ່າ1 ແສນບາດ ຫຼື ເທົ່າກັບ 26 ລ້ານກີບ.ພິທີມອບ-ຮັບໄດ້ຈັດຂຶ້ນທີ່ໂຮງຮຽນ ມສ ສະໜາມໄຊ.ໂດຍກ່າວມອບຂອງທ່ານນາງ ຈິດຕຣາ ປະດຸງສັກ ຈາກບໍລິສັດສະຫຍາມລ້ານຊ້າງປະເທດໄທ ແລະກ່າວຮັບຂອງທ່ານ ນາງ ມະນີລາ ໄຊສົມບູນ ຮອງເຈົ້າ ເມືອງເມືອງສະໜາມໄຊ ໂດຍຊ້ອງໜ້າພາກສ່ວນທີ່ກ່ຽວຂ້ອງເຂົ້າຮ່ວມ.

     ທ່ານ ນາງ ຈິດຕຣາ ປະດຸງສັກ ໄດ້ກ່າວວ່າ: ການນຳເອົາໂຕະຕັ່ງນັກຮຽນຈຳນວນ 70 ຊຸດ ເພື່ອຊ່ວຍເຫຼືອນັກຮຽນຜູ້ປະສົບໄພພິບັດທີ່ ເມືອງສະໜາມໄຊ ມູນຄ່າໃນຄັ້ງນີ້ກໍ່ເພືອເປັນການປະກອບສ່ວນຊ່ວຍເຫຼືອບັນດານ້ອງນັກຮຽນທີ່ຖືກໄພນ້ຳຖ້ວມທີ່ເມືອງສະໜາມໄຊ ຈາກຄູກັນນໍ້າສັນເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນເດືອນກໍລະກົດປີ 2018 ຜ່ານມາ ແລະ ເພື່ອເຮັດໃຫ້ນ້ອງນັກຮຽນຫຼາຍຄົນໄດ້ສືບຕໍ່ສຶກສາຮໍ່າຮຽນທາງບໍລິສັດສະຫຍາມລ້ານຊ້າງພ້ອມດ້ວຍບໍລິສັດກະທິລັດດາຈິ່ງໄດ້ລະດົມທຶນຈາກຜູ້ໃຈບຸນພາຍໃນປະເທດເພື່ອຊື້ວັດຖຸອຸປະ ກອນມາຊ່ວຍເຫຼືອຜູ້ປະສົບໄພ.

       ທ່ານ ນາງ ຈິດຕຣາ ປະດຸງສັກ ຍັງໄດ້ກ່າວຕື່ມອີກວ່າທາງບໍລິສັດສະຫຍາມລ້ານຊ້າງ ແລະ ບໍລິສັດກະທິລັດດາຍັງມີແຜນທີ່ຈະໃຫ້ການຊ່ວຍເຫຼືອດ້ານອຸປະກອນການຮຽນປະເພດໂຕະຕັ່ງຈຳນວນ 100 ຊຸດ ເພື່ອເຮັດໃຫ້ນ້ອງນັກຮຽນຜູ້ປະສົບໄພໄດ້ຮັບການຮໍ່າຮຽນສະດວກສະ ບາຍຂຶ້ນ.

แชร์