ຫັນຈາກການເຮັດໄຮ່ ມາລ້ຽງງົວເປັນອາຊີບສ້າງລາຍຮັບກວ່າ 50 ລ້ານກີບຕໍ່ປີ

 ການສ້າງເສດຖະກິດຄອບຄົວຂອງພໍ່ແມ່ປະຊາຊົນຢູ່ເຂດຊົນນະບົດຫ່າງໄກສອກຫຼີກສ່ວນໃຫ່ຍແມ່ນການປູກຝັງ-ລ້ຽງສັດເຂົາເຈົ້າເຄີຍມີມູນເຊື້ອມາແຕ່ດົນນານບວກກັບເງື່ອນໄຂສະພາບແວດລ້ອມຂອງທ້ອງຖິ່ນ,ຍາມໃດພັກ-ລັດກໍໄດ້ຊຸກຍູ້ສົ່ງເສີມໃຫ້ພໍ່ແມ່ປະຊາຊົນຫັນມາລ້ຽງສັດໃຫ້ກາຍເປັນອາຊີບຕົ້ນຕໍໃນກາ ນສ້າງລາຍຮັບໃຫ້ແກ່ຄອບຄົວໂດຍສະເພາະແມ່ນການລ້ຽງງົວຄືກັບຄອບຄົວຂອງ ທ່ານ ເຢຍໄກ່ ໄຊຢີລີ ຢູ່ບ້ານມົກແຫວນ ເມືອງປາກແບງແຂວງອຸດົມໄຊ ຊຶ່ງເປັນຄອບຄົວໜຶ່ງທີ່ໄດ້ຮັບຮູ້ ແລະ ເຂົ້າໃຈຕໍ່ແນວທາງຂອງພັກ-ລັດ ແລະໄດ້ຮັບການຊຸກຍູ້ສົ່ງເສີ່ມຈາກຂະແໜງການທີ່ກ່ຽວຂ້ອງເປັນທຶນຮອນເພື່ອນຳໃຊ້ເຂົ້າໃນການລ້ຽງ.

  ທ່ານ ເຢຍໄກ່ ໄຊຢີລີ ໄດ້ໃຫ້ຮູ້ວ່າ: ໃນເມື່ອກ່ອນຄອບຄົວຂອງຕົນເອງແມ່ນເຮັດອາຊີບການຖ່າງປ່າເຮັດໄຮ່ປູກເຂົ້າ, ປູກພືດຜັກຈຳນວນໜຶ່ງ ແລະລ້ຽງສັດ ປີກເພື່ອເປັນສະບຽງອາຫານຊີວິດການເປັນຢູ່ແມ່ນພົບຄວາມຫຸ້ຍງຍາກຂາດເຂີນໂດຍສະເພາະແມ່ນການຂາດເຂົ້າກິນຍ້ອນສະພາບດິນຟ້າອາກາດບໍ່ອຳນວນ ຄວາມສະດວກເຮັດໃຫ້ຜົນຜະລິດບໍ່ໄດ້ຕາມຄາດໝາຍ.ມາຮອດຊຸມປີ 2014-2015 ຈິ່ງໄດ້ຫັນມາລ້ຽງງົວໃນເບື້ອງຕົ້ນມີງົວພຽງແຕ່ 10 ກວ່າໂຕຜ່ານການລ້ຽງເຫັນວ່າໄດ້ຮັບຜົນຈິ່ງໄດ້ສືບຕໍ່ລ້ຽງຂະ ຫຍາຍການລ້ຽງ ແລະໄດ້ມີການປູກຫ້ຍາເພື່ອເປັນອາຫານສັດ.ຕໍ່ມາກໍໄດ້ນຳງົວອອກຂາຍໂດຍສະເລ່ຍ 6-8 ໂຕຕໍ່ປີ ສ້າງລາຍຮັບໃຫ້ຄອບຄົວໄດ້ຫຼາຍກ່ວາ 50 ລ້ານກີບຕໍ່ປີ. ມາຮອດປະຈຸບັນຄອບຄົວຂອງທ່ານ ເຢຍໄກ່ ມີງົວທັງໝົດປະມານ 70ໂຕ.

 ທ່ານ ເຢຍໄກ່ ໃຫ້ຮູ້ອີກວ່າ: ພາຍຫຼັງໄດ້ຫັນມາລ້ຽງງົວຊີວິດການເປັນຢູ່ຂອງຄອບຄົວເຫັນວ່ານັບມື້ດີຂຶ້ນ. ມີເງິນແຮເກັບໄວ້ໃນຄອບຄົວສາມາດຕັ້ງເຮືອນເຄິ່ງຖາວອນຢູ່ 1 ຫຼັງ, ມີໂຮງສີເຂົ້າ, ຊື້ພາຫະນະ ແລະເຄື່ອງຮັບໃຊ້ໃນຊີວິດປະຈຳວັນທີ່ຈຳເປັນເປັນຕົ້ນແມ່ນລົດຈັກ,ມີໂທລະພາບ,ມີເງິນແຮໄວ້ປີ່ນປົວສຸຂະພາບເວລາເຈັບ.

  ທ່ານ ເຢຍໄກ່ ໄຊຢີລີ ກ່າວຕື່ມວ່າ: ອາຊີບການລ້ຽງງົວເປັນອາຊີບທີ່ມີຄວາມໝັ້ນຄົງມີຄວາມສະດວກສະບາຍຫຼາຍຖ້າປຽບທຽບກັບການເຮັດໄຮ່ຄືແຕ່ກ່ອນ ນອກຈາກນັ້ນຍັງສາມາດສ້າງລາຍຮັບໄດ້ດີເໝາະສົມກັບຫຼາຍໆຄອບຄົວທີ່ຢູ່ຊົນນະບົດຫ່າງໄກສອກຫຼີກໃນການສ້າງອາຊີບສ້າງລາຍຮັບ.ສະນັ້ນຈິ່ງຢາກແນະນຳ ໃຫ້ພໍ່ແມ່ປະຊາຊົນບັນດາເຜົ່າທີ່ກຳລັງຊອກຫາອາຊີບໃນການທຳມາຫາກິນໃຫ້ຫັນມາລ້ຽງງົວເພື່ອເປັນສິນຄ້າ,ສ້າງລາຍຮັບໃຫ້ແກ່ຄອບຄົວເຮັດໃຫ້ຊີວິດຄອບ ຄົວນັບມື້ດີຂຶ້ນ.

  ສຳລັບຕໍ່ໜ້າແມ່ນຈະສືບຕໍ່ຂະຫຍາຍກິດຈະກຳການລ້ຽງໃຫ້ຫຼາຍຂຶ້ນອີກຕື່ມໂດຍສະເພາະແມ່ນຂະຫຍາຍການປູກຫ້ຍາເພື່ອເປັນອາຫານງົວໃຫ້ຫຼາຍຂຶ້ນ.

ຂຽນໂດຍ: ສີຈັນ ເກດວົງສາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์