ທຫລ ພາກກາງສະຫຼຸບການຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບ

 ເພື່ອເປັນການຕີລາຄືນເຖິງໝາກຜົນຂອງການເຄື່ອນໄຫວຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບຂອງຄະນະກໍາມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບຂັ້ນແຂວງໃນ 2018 ຜ່ານມາໂດຍສະເພາະ ຢູ່ແຂວງຄໍາມ່ວນ ແມ່ນໄດ້ຈັດກອງ ປະຊຸມສະຫຼຸບວຽກງານການຄຸ້ມ ຄອງເງິນຕາຕ່າງປະເທດ ແລະສົ່ງເສີມການນຳໃຊ້ເງິນກີບລາວໃນວັນທີ 18 ມິຖຸນາ 2019 ທີ່ຫ້ອງວ່າການປົກຄອງແຂວງໂດຍການເປັນປະທານຂອງທ່ານ ບຸນມີ ພິມມະສອນ ຮອງເຈົ້າແຂວງໆຄໍາມ່ວນ (ຜູ້ຊີ້ນໍາວຽກງານເສດຖະ ກິດ) ທັງເປັນຫົວໜ້າຄະນະກໍາມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບຂັ້ນແຂວງ, ມີບັນດາທ່ານເຈົ້າເມືອງ, ຮອງເຈົ້າເມືອງ,ຫົວໜ້າ, ຮອງຫົວໜ້າພະແນກການ,ຕາງໜ້າບັນດາສາຂາທະນາຄານພ້ອມດ້ວຍພະນັກງານວິຊາການເຂົ້າຮ່ວມ.

ທ່ານ ສົມເພັດ ວົງຄໍາຈັນ ຮອງ ຫົວໜ້າສາຂາທະນາຄານແຫ່ງ ສປປ ລາວ ພາກກາງແຂວງສະ ຫວັນນະເຂດໄດ້ສະຫຼຸບລາຍງານການເຄື່ອນໄຫວວຽກງານຄຸ້ມ ຄອງເງິນຕາຕ່າງປະເທດ ແລະ ສົ່ງເສີມການນໍາໃຊ້ເງິນກີບຂອງຄະນະ ແລະ ອະນຸກໍາມະການປີ 2018 ພ້ອມທັງສະເໜີທິດທາງ ແລະ ແຜນການເຄື່ອນໄຫວຂອງ ຄະນະ ແລະອະນຸກໍາມະການປະ ຈໍາປີ 2019. ທ່ານຮອງຫົວໜ້າສາຂາທະນາຄານແຫ່ງ ສປປ ລາວ ພາກກາງແຂວງສະຫວັນນະເຂດ ໄດ້ກ່າວວ່າ: ການເຄື່ອນໄຫວວຽກ ງານຂອງຄະນະ ແລະອະນຸກໍາມະ ການຕິດຕາມການຈັດຕັ້ງປະຕິບັດ ການບັງຄັບໃຊ້ລະບຽບການຄຸ້ມ ຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບໃນໄລຍະຜ່ານມາແມ່ນໄດ້ເນັ້ນໃສ່ການຈັດກອງປະຊຸມເຜີຍແຜ່ກົດໝາຍ ແລະ ລະບຽບການຕ່າງໆກ່ຽວກັບການຄຸ້ມຄອງເງິນຕາຕ່າງປະ ເທດ ແລະ ສົ່ງເສີມການນໍາໃຊ້ເງິນກີບຢູ່ບັນດາເມືອງ ແລະ ຈັດກິດຈະກໍາສົ່ງເສີມການນໍາໃຊ້ເງິນກີບໃຫ້ບັນດາຄູ-ອາຈານ ແລະ ນັກຮຽນຢູ່ໂຮງຮຽນຕ່າງໆ, ໂຄສະນາຜ່ານສື່ຕ່າງໆ, ຕິດຕັ້ງປ້າຍໂຄສະນາສົ່ງເສີມການນໍາໃຊ້ເງິນກີບຜ່ານຂະບວນການໂຄສະນາເຜີຍແຜ່ຂອງຄະນະ ແລະ ອະນຸກໍາມະການຈິ່ງເຮັດໃຫ້ສັງຄົມຮັບຮູ້-ເຂົ້າໃຈ ແລະ ເຫັນໄດ້ຄວາມສໍາຄັນຂອງການຫຼຸດຜ່ອນການນໍາໃຊ້ເງິນຕາຕ່າງປະເທດ, ບັນດາພາກສ່ວນລັດກໍ່ໄດ້ຮ່ວມມືກັນຢ່າງກົມກຽວເຮັດໃຫ້ ການຄຸ້ມຄອງເງິນຕາຕ່າງປະເທດໄດ້ຫັນເຂົ້າສູ່ການຄຸ້ມຄອງຢ່າງລວມສູນ ແລະເຂົ້າສູ່ລະບົບເທື່ອລະກ້າວ. ສັງຄົມຫັນມາຕິດ , ເອີ້ນ ແລະປະກາດລາຄາສິນຄ້າ ແລະບໍລິການເປັນເງິນກີບນັບມື້ນັບຫຼາຍຂຶ້ນ,ການຊໍາລະສະສາງເຫັນວ່ານໍາໃຊ້ເງິນກີບຫຼາຍຂຶ້ນ,ສິ່ງທີ່ເປັນຜົນງານອັນພົ້ນເດັ່ນແມ່ນພາຍໃນປີ 2018 ໄດ້ສໍາເລັດການສ້າງຕັ້ງເມືອງໜອງບົກໃຫ້ເປັນເມືອງທົດລອງເປັນເມືອງຕົວແບບໃນດ້ານວຽກງານຄຸ້ມຄອງເງິນຕາຕ່າງປະເທດຊຶ່ງໄດ້ມີການອອກຂໍ້ຕົກລົງ ແຕ່ງຕັ້ງຄະນະກໍາມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບຂັ້ນເມືອງສະ ບັບເລກ ທີ 192/ຈມ.ໜບ, ລົງວັນທີ 13 ມີນາ 2018 ຜົນສໍາເລັດນີ້ຍ້ອນໄດ້ຮັບການຊີ້ນໍາໆພາຈາກຄະນະນໍາຂອງແຂວງ ແລະອໍານາດການປົກຄອງແຕ່ ລະຂັ້ນທີ່ໄດ້ອໍານວຍຄວາມສະດວກໃຫ້ຄະນະ ແລະອະນຸກໍາມະການໄດ້ເຄື່ອນໄຫວຢ່າງຄ່ອງຕົວ. ນອກຈາກນັ້ນຍັງມີການຈັດກອງປະຊຸມ,ໂຄສະນາ ແລະເຄື່ອນ ໄຫວຄຸ້ມຄອງເງິນຕາຕ່າງປະເທດ, ວັດຖຸມີຄ່າ ແລະ ການສົ່ງເສີມການນໍາໃຊ້ເງິນກີບ.

  ໃນປີ 2018 ໄດ້ມີບໍລິສັດສະເໜີຂໍຢັ້ງຢືນການນໍາເຂົ້າທຶນຈາກຕ່າງປະເທດນໍາສາຂາທະນາຄານແຫ່ງ ສປປ ລາວ ພາກກາງ ແຂວງສະຫວັນນະເຂດຈໍານວນທັງໝົດ 01 ບໍລິສັດ, ລວມທຶນທີ່ມາຢັ້ງຢືນທັງໝົດຈໍານວນ 8,12 ລ້ານໂດ ລາສະຫະລັດ. ໃນນັ້ນທຶນເປັນ ວັດຖຸມີຈໍານວນ 8,20 ລ້ານໂດລາສະຫະລັດ ແລະທຶນທີ່ເປັນເງິນກູ້ຢືມຈາກຕ່າງປະເທດຈໍານວນ 8,12 ລ້ານໂດລາສະຫະລັດ.

 ສໍາລັບແຜນການເຄື່ອນໄຫວປະຈໍາປີ 2019 ແມ່ນສືບຕໍ່ສົມທົບພະແນກການຕ່າງໆເພື່ອເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະລະບຽບການຕ່າງໆທີ່ຕິດພັນກັບການຄຸ້ມ ຄອງເງິນຕາຕ່າງປະເທດ ແລະສົ່ງ ເສີມການນໍາໃຊ້ເງິນກີບໃຫ້ບັນ ດາພະນັກງານ ແລະເປົ້າໝາຍທີ່ມີຄວາມຈໍາເປັນຂັ້ນເມືອງ ແລະ ອໍານາດການປົກຄອງທ້ອງຖິ່ນ,ສົມທົບກັບພະແນກສຶກສາທິການ ແລະກີລາແຂວງ-ເມືອງເພື່ອລົງເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດໃຫ້ສະ ຖາບັນການສຶກສາພ້ອມທັງສ້າງກິດຈະກໍາສົ່ງເສີມການນໍາໃຊ້ເງິນກີບໃຫ້ແກ່ຄູ-ອາຈານ, ນັກຮຽນ-ນັກສຶກສາ, ສືບຕໍ່ສົມທົບຢູ່ດ່ານ ສາກົນ ແລະຕາມເຂດຊາຍແດນຕ່າງໆຕິດຕາມ,ກວດກາການນໍາເງິນສົດ ແລະວັດຖຸມີຄ່າເຂົ້າ-ອອກ ສປປ ລາວ ເພື່ອໃຫ້ຖືກຕ້ອງ ແລະ ສອດຄ່ອງກັບກົດ ໝາຍວ່າດ້ວຍການຄຸ້ມຄອງເງິນຕາຕ່າງປະເທດ ພ້ອມທັງລາຍງານໃຫ້ທະນາຄານແຫ່ງ ສປປ ລາວ ຮັບຮູ້ໃນ ແຕ່ລະໄລຍະ ຫຼືເມື່ອມີການກວດພົບເຫັນການລະເມີດດັ່ງກ່າວ, ສືບຕໍ່ສົມທົບກັບພາກສ່ວນທີ່ກ່ຽວຂ້ອງທີ່ມີໜ້າທີ່ຄົ້ນຄວ້າການປະຕິບັດນະໂຍບາຍການນໍາເຂົ້າສິນຄ້າຕ້ອງ ແຈ້ງທຶນທີ່ຈະຊໍາລະເປັນເງິນຕາ ຕ່າງປະເທດຜ່ານລະບົບທະນາ ຄານ, ໃຫ້ຕໍາຫຼວດເສດຖະກິດລົງ ກວດກາ ແລະປະຕິບັດລະບຽບມາດ ຕະການຂອງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະລະບຽບການອື່ນໆທີ່ວາງອອກໃນແຕ່ລະໄລຍະຕໍ່ຜູ້ທີ່ລະເມີດ ແລະເຄື່ອນໄຫວບໍ່ຖືກຕ້ອງ, ບໍ່ສອດຄ່ອງກັບກົດໝາຍ ແລະລະບຽບການດັ່ງກ່າວ, ອະນຸກໍາມະ ການລົງຕິດຕາມ, ກວດກາ ແລະ ປະເມີນຜົນເພື່ອສະເໜີຍ້ອງຍໍບັນດາພາກສ່ວນທີ່ປະຕິບັດຕາມລະ ບຽບໄດ້ດີ ແລະປະຕິບັດມາດຕະການກ່າວເຕືອນບັນດາພາກສ່ວນທີ່ລະເມີດ ບໍ່ປະຕິບັດຕາມລະບຽບການຕ່າງໆກໍ່ຄືກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສະບັບເລກທີ 55 / ສພຊ ລົງວັນທີ 22 ທັນວາ 2014, ສົມທົບກັບອໍານາດການປົກຄອງເມືອງເພື່ອລົງເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະຕິດ ຕາມການຈັດຕັ້ງປະຕິບັດລະບຽບຂອງບັນດາຫົວໜ່ວຍທຸລະກິດ, ສືບຕໍ່ເຄື່ອນໄຫວວຽກຢູ່ເມືອງໜອງ ບົກທີ່ເປັນເມືອງທົດລອງເມືອງຕົວແບບດ້ານການຄຸ້ມຄອງເງິນຕາຕ່າງປະເທດ, ປະເມີນຜົນໄດ້ຮັບຈາກການຈັດຕັ້ງປະຕິບັດໃນໄລຍະຜ່ານມາ ແລະມອບຄວາມຮັບຜິດຊອບໃຫ້ພາກສ່ວນເມືອງຈັດຕັ້ງປະຕິບັດກົດໝາຍຕາມພາລະບົດບາດຂອງຕົນ, ຈັດກອງປະຊຸມສະຫຼຸບລາຍງານການເຄື່ອນໄຫວວຽກຂອງຄະນະ ແລະ ອະນຸກໍາມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະສົ່ງເສີມການນໍາໃຊ້ເງິນກີບຂັ້ນແຂວງປະຈໍາປີ 2019 ແລະແຜນປີ 2020.

ຂຽນໂດຍ: ແດງສະຫວັດ ແສນພານິດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์