ບົວລະພາມອບເງິນສະໜັບສະໜູນ ທີມນັກກີລາຊາວໜຸ່ມ ຫສນຍ

 ໃນວັນທີ 21 ມິຖຸນາຜ່ານມາທີ່ນະຄອນຫຼວງວຽງຈັນບໍລິສັດບົວລະພາກະສິກຳປ່າໄມ້ຈຳກັດໄດ້ມອບເງິນຈຳນວນ 5 ລ້ານກີບໃຫ້ກັບທີມນັກກີລາບານເຕະ ຊາວໜຸ່ມຫ້ອງວ່າການສຳນັກງານນາຍົກລັດຖະມົນຕີ ຫຼື ຫສນຍ ຊຶ່ງ ຕາງໜ້າມອບຂອງທ່ານມາຕິນ ຟໍເຊັນ ຜູ້ອຳນວຍການບໍລິສັດບົວລະພາກະສິກຳປ່າໄມ້ຈຳກັດ ແລະຕ່າງໜ້າຮັບຂອງທ່ານແກ້ວວິໄລປະຖຳມະວົງ ຫົວໜ້າພະແນກເສດຖະກິດກົມຄົ້ນຄວ້າສັງລວມໂດຍມີພະນັກງານທີ່ກ່ຽວຂ້ອງທັງສອງ ຝ່າຍເຂົ້າຮ່ວມ.

ຕາມຂໍ້ມູນຈາກບໍລິສັດບົວລະພາກະສິກຳປ່າໄມ້ຈຳກັດເປີດເຜີຍໃຫ້ຮູ້ວ່າ:ການມອບເງິນຈຳນວນດັ່ງກ່າວກໍເພື່ອເປັນການສະໜັບສະໜູນທຶນຮອນປະກອບສ່ວນເຂົ້າໃນການແຂ່ງຂັນກີລາບານເຕະຂອງທິມນັກກີລາຊາວໜຸ່ມຫ້ອງວ່າການສະນັກງານນາຍົກລັດຖະມົນຕີ ຊຶ່ງຈະເຂົ້າຮ່ວມຊິງຂັນຂອງສະຫາຍເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວທີ່ຈະໄດ້ເລີ່ມແຂ່ງຂັນນັບແຕ່ເດືອນກໍລະກົດ 2019 ເປັນຕົ້ນໄປ.

ສຳລັບບົວລະພາກະສິກຳ-ປ່າມ້ຈຳກັດແມ່ນເປັນບໍລິສັດດຳເນີນກິດຈະການປູກໄມ້ວິກດ້ວຍການສົ່ງເສີມປະຊາຊົນປູກແບບມີສ່ວນຮ່ວມເພື່ອສ້າງອາຊີບສ້າງລາຍຮັບປະກອບສ່ວນແກ້ໄຂຄວາມທຸກຍາກຂອງປະຊາຊົນລາວຫຼາຍແຂວງໃນຂອບເຂດທົ່ວປະເທດຊຶ່ງກິດຈະການໄດ້ເລີ່ມມາແຕ່ປີ1989 ແລະໄດ້ຮັບໃບອະນຸຍາດລົງທຶນປີ1993 ໂດຍການລົງທຶນຮ່ວມກັນລະຫວ່າງນັກທຸລະກິດລາວ ແລະສະວິເດັນ,ນັກທຸລະກິດລາວຖືຮຸ້ນ 5% ແລະສະວິເດັນຖືຮຸ້ນ 95%, ປີ 1999 ໄດ້ຮັບອະນຸຍາດສ້າງຕັ້ງໂຮງງານປຸງແຕ່ງໄມ້ຄົບວົງຈອນຢູ່ບ້ານແສນອຸດົມນະຄອນຫຼວງວຽງຈັນ ແລະໄດ້ປຸງແຕ່ງຜະລິດຕະພັນສຳເລັດຮູບຫຼາຍລາຍ ການຕາມການສັ່ງຊື້ຂອງລູກຄ້າຈາກໄມ້ວິກ,ໄມ້ກະຖິນ ແລະໄມ້ສັກເພື່ອສົ່ງອອກຫຼາຍກວ່າ 20 ປະເທດໃນທົ່ວໂລກ.

ພາບ ແລະຂາ່ວໂດຍ: ໜັງສືພິມເສດຖະກິດ-ສັງຄົມ

 

แชร์