ປັບປຸງສະພາບແວດລ້ອມຂອງໂຮງຮຽນມັດທະຍົມຢູ່ລາວ

   ທ້າຍເດືອນທັນວາ ຜ່ານມາທີ່ໂຮງຮຽນ ມສ ແຊລະບໍາ ເມືອງ ຊະນະສົມບູນ ແຂວງຈໍາປາສັກ ໄດ້ມີພິທີວາງສີລາເລີກສຳລັບໂຄງການປັບ ປຸງສະພາບແວດລ້ອມຂອງໂຮງຮຽນມັດທະຍົມສຶກສາຢູ່ແຂວງພາກກາງ ແລະພາກໃຕ້ຂອງລາວເພື່ອເສີມຂະຫຍາຍ ແລະ ຮອງຮັບເອົາຈຳ ນວນນັກຮຽນທີ່ເພີ່ມຂຶ້ນສໍາລັບນັກຮຽນທີ່ສາມາດຮຽນຕໍ່ລະດັບມັດທະຍົມສຶກສາໄດ້ຢ່າງຄົບຖ້ວນໂດຍເປັນກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາ ແລະກີລາ ແລະ ທ່ານ ທາເກຊິ ຮິຄິຮາຣະ ເອກອັກຄະລັດຖະທູດຍີ່ປຸ່ນປະຈຳ ສປປ ລາວ, ທ່ານ ໂຢຊິຮາຣຸ ໂຍເນຢາມາ ຜູ້ຕາງໜ້າຈາກອົງການໄຈກາປະຈໍາ ສປປ ລາວ, ທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ ແລະ ທ່ານ ພູທົງ ຄໍາມະນີວົງ ຮອງເຈົ້າແຂວງສາລະວັນ, ມີຫົວໜ້າ-ຮອງຫົວໜ້າຫ້ອງການ, ກົມຈາກກະຊວງສຶກສາທິການ ແລະ ກີລາ  ແລະ ກະຊວງອ້ອມຂ້າງຈາກສູນກາງ, ຂັ້ນເມືອງ, ຂັ້ນແຂວງ ແລະໂຮງຮຽນທີ່ກ່ຽວຂ້ອງເຂົ້າຮ່ວມ.

   ໂຄງການປັບປຸງສະພາບແວດ ລ້ອມຂອງໂຮງຮຽນມັດທະຍົມສຶກສາຢູ່ແຂວງພາກກາງ ແລະພາກໃຕ້ຂອງ ສປປ ລາວ ໄດ້ຮັບການຊ່ວຍ ເຫຼືອເປັນທາງການພາຍໃຕ້ການເຊັນສັນຍາແລກປ່ຽນລະ ຫວ່າງລັດຖະບານ ສປປ ລາວ ແລະລັດຖະບານຍີ່ປຸ່ນໃນວັນທີ 26 ພຶດສະພາ 2017, ຫຼັງຈາກນັ້ນກໍ່ໄດ້ມີການຕົກລົງເຊັນສັນຍາເງິນຊ່ວຍເຫຼືອລ້າໃນເດືອນຕຸລາ 2017 ໂດຍມູນຄ່າການຊ່ວຍເຫຼືອທີ່ລວມທັງເງິນແຮທັງໝົດ 102  ຕື້ກວ່າກີບ (12,46 ລ້ານໂດລາ) ເພື່ອເສີມຂະຫຍາຍ ແລະຮອງຮັບເອົາຈຳນວນນັກຮຽນທີ່ເພີ່ມຂຶ້ນສໍາລັບນັກຮຽນທີ່ສາ  ມາດຮຽນຕໍ່ລະດັບມັດທະຍົມສຶກສາໄດ້ຢ່າງຄົບຖ້ວນໂດຍສະເພາະເລັ່ງໃສ່ການປັບປຸງສະພາບແວດລ້ອມໂຮງຮຽນມັດທະຍົມຢູ່ທັງພາກກາງ  ແລະພາກໃຕ້ຂອງ  ສປປ ລາວ ລວມມີ 4 ແຂວງຄື: ແຂວງ ຄຳມ່ວນ, ສະຫວັນນະເຂດ, ສາລະວັນ ແລະແຂວງຈໍາປາສັກ ນອກຈາກນີ້ຍັງເລັ່ງໃສ່ການປຸກສ້າງອາຄານຮຽນ, ຫ້ອງຮຽນສໍາລັບການສຶກສາໃນຂົງເຂດເປົ້າໝາຍດັ່ງກ່າວເພື່ອຊ່ວຍພັດທະນາຄຸນນະພາບການສຶກສາຂັ້ນມັດທະຍົມສຶກສາໃນ ສປປ ລາວ ໃຫ້ດີຂຶ້ນເທື່ອລະກ້າວ.

   ສຳລັບໂຮງຮຽນທີ່ນອນຢູ່ໃນບຸລິມະສິດເປົ້າໝາຍຂອງໂຄງການລວມມີທັງໝົດ 37 ແຫ່ງ ແລະຈະໄດ້ຈັດຕັ້ງປະຕິບັດຢູ່ 4 ແຂວງດັ່ງກ່າວ, ຊຶ່ງອົງປະກອບສິ່ງປຸກສ້າງໃນໂຄງການປະກອບມີການປຸກສ້າງຫ້ອງຮຽນ, ຫ້ອງການຄູ, ຫ້ອງອາເນດປະສົງ (ຫ້ອງທົດລອງ), ຫ້ອງສະມຸດທີ່ມີຫ້ອງເກັບເຄື່ອງ ແລະຫ້ອງນໍ້າ. ພ້ອມກັນນີ້, ຍັງມີການສະໜອງກະດານ, ເຟີນີເຈີ ແລະຕິດຕັ້ງລະບົບໄຟຟ້າທີ່ຈຳເປັນພາຍໃນຫ້ອງຮຽນບາງແຫ່ງ.

   ການດໍາເນີນການປະຕິບັດວຽກງານປຸກສ້າງຂອງໂຄງການແມ່ນແບ່ງອອກເປັນ 2 ໄລຍະຄື: ໄລຍະທີ 1 ມີ17 ໂຮງຮຽນຈັດຕັ້ງປະຕິບັດຢູ່ 2 ແຂວງຄື: ແຂວງສາລະວັນ ມີ 5 ໂຮງຮຽນລວມມີ 43 ຫ້ອງຮຽນ, ມີ 1 ຫ້ອງການຄູ, 1 ຫ້ອງອາເນດປະສົງ 1 ຫ້ອງສະມຸດ ແລະມີ 24 ຫ້ອງນໍ້າ ແລະແຂວງຈຳປາສັກ ປະກອບມີ 12 ໂຮງຮຽນລວມມີ 83 ຫ້ອງຮຽນ, 3 ຫ້ອງການຄູ, 1 ຫ້ອງອາເນດປະສົງ, 11 ຫ້ອງສະມຸດ ແລະ 49 ຫ້ອງນໍ້າ; ໃນໄລຍະທີ 2 ຈະໄດ້ຈັດຕັ້ງປະຕິບັດຢູ່ 2 ແຂວງຄື: ແຂວງຄໍາມ່ວນ ມີ 5 ໂຮງຮຽນ ແລະ ແຂວງສະຫວັນນະເຂດ ທັງ ໝົດ 15 ໂຮງຮຽນ.

แชร์