ຄຳມ່ວນ ກຽມຄວາມພ້ອມໃຫ້ແກ່ບັ້ນສອບເສັງຈົບຊັ້ນ ມ7

ໃນວັນທີ 20 ມິຖຸນາ 2019 ທີ່ພະແນກສຶກສາທິການ ແລະກີລາ ແຂວງຄຳມ່ວນ ໄດ້ຈັດກອງປະຊຸມເພື່ອກະກຽມຄວາມພ້ອມໃນດ້ານຕ່າງໆ ໃນການສອບເສັງຈົບຊັ້ນມັດທະຍົມສຶກສາຕອນປາຍ ມ7 ເປັນກຽດເຂົ້າຮ່ວມຂອງທ່ານຄຳສີອຸດທິວົງ ຮອງເຈົ້າແຂວງໆຄຳມ່ວນ, ທັງເປັນຜູ້ຊີ້ນຳແລະຕັດສິນຜົນການສອບເສັງສາຍສາມັນສຶກສາ,ທ່ານນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະກີລາແຂວງ,ມີບັນດາຄະນະສູນສອບເສັງຕະຫຼອດຮອດພາກສ່ວນກ່ຽວ ຂ້ອງເຂົ້າຮ່ວມ.

ກອງປະຊຸມຄັ້ງນີ້ແມ່ນໄດ້ຜ່ານຂໍ້ຕົກລົງແລະກົດລະບຽບການສອບເສັງໃຫ້ແກ່ບັນດາຄະນະກຳມະການສູນສອບເສັງໄດ້ຮັບຮູ້ເພື່ອຄວາມເປັນເອກະພາບແນໃສ່ຮັບປະກັນ ແລະຄວາມພ້ອມດ້ານຕ່າງໆໃຫ້ໄດ້ ທັງຄຸນນະພາບ, ປະລິມານ, ຖືກ                                                                              ຕ້ອງຕາມລະບຽບຫຼັກການຂອງ ກະຊວງສຶກສາທິການ ແລະກີລາວາງອອກ.ຊຶ່ງການສອບເສັງຈົບຊັ້ນ ມ7 ທົ່ວປະເທດແມ່ນຈະໄດ້ຈັດຂຶ້ນໃນລະຫວ່າງວັນທີ 25-26 ມິ ຖຸນາ 2019 ນີ້ປະກອບມີ 4 ວິຊາ ຄື:ພາສາລາວວັນນະຄະດີ,ເຄມີສາດ,ຄະນິດສາດແລະວິຊາປະຫວັດສາດ. 

ທ່ານຮອງຫົວໜ້າພະແນກສຶກສາທິການ ແລະກີລາແຂວງໃນນາມຄະນະກຳມະການຊີ້ນຳການສອບເສັງຈົບຊັ້ນສາຍສາມັນໄດ້ກ່າວວ່າ:ການສອບເສັງຈົບຊັ້ນ ມ7 ປະຈຸບັນແມ່ນໄດ້ມີຄວາມພ້ອມ 100% ເປັນຕົ້ນແມ່ນຂໍ້ມູນຕ່າງໆກ່ຽວກັບການສອບເສັງ,ນັກສອບເສັງຜູ້ທີ່ມີໜ້າສອບເສັງ,ຄະແນນປະຈຳປີຂອງນັກຮຽນແຕ່ລະຄົນແມ່ນຖືກຕ້ອງຕາມເງື່ອນໄຂ.ໂດຍໄດ້ແບ່ງຈຳນວນຂອງນັກສອບເສັງເປັນຫ້ອງພ້ອມທັງລົງກວດກາສະພາບສະຖານທີ່ຂອງໂຮງຮຽນທີ່ຈະໄດ້ຈັດ ເປັນສູນສອບເສັງ, ດ້ານຄວາມພ້ອມຂອງຫ້ອງຮຽນ, ໂຕະ, ຕັ່ງຕ່າງໆ ການຈັດຕັ້ງປະຕິບັດຫລັກສູດໂຄງການ, ຕະຫຼອດຮອດຜູ້ທີ່ກ່ຽວຂ້ອງ ກັບນັກສອບ.ໃນປີນີ້ທົ່ວແຂວງມີນັກສອບເສັງທັງໝົດ3.760 ຄົນ,ຍິງ 1.855 ຄົນ. ແບ່ງອອກເປັນ 16 ສູນສອບເສັງ, ມີຫ້ອງສອບເສັງ 182 ຫ້ອງ, ມີໂຮງຮຽນທີ່ມີ ຊັ້ນ ມ7 ເຂົ້າຮ່ວມສອບເສັງ 61ແຫ່ງ. ໃນນີ້ຄາດຄະເນຜົນການສອບ ເສັງແມ່ນ 99%.

ສໍາລັບປີຜ່ານມາມີນັກຮຽນທີ່ ເສັງໄດ້ຄະແນນ 5 ຂຶ້ນເມືອ 46,44%,ຄາດປີນີ້ໃຫ້ໄດ້ 50%,ສ່ວນນັກຮຽນເກັ່ງສອບໄດ້ຄະແນນ7 ຂຶ້ນໄປ ທຸກວິຊາປີຜ່ານມາໄດ້  257  ຄົນ, ຍິງ 167,ຄາດປີນີ້ໃຫ້ໄດ້ປະມານ 300 ກວ່າຄົນ ຫຼື ໃນເງື່ອນໄຂດີກວ່ານີ້.ພິເສດປີກາຍແຂວງຄຳມ່ວນມີນັກຮຽນເກັ່ງສອບໄດ້ຄະແນນດີເລີດ ໄດ້ຮັບໃບປະກາດສະນີຍະບັດແດງແມ່ນມີ 2 ຄົນ, ສະນັ້ນປີນີ້ແມ່ນຄາດໃຫ້ໄດ້ 3 ຄົນຂຶ້ນເມືອ. ຕໍ່ກັບສະພາບການດັ່ງກ່າວນີ້ໃນນາມຄະນະຮັບຜິດຊອບການສອບເສັງຈົບຊັ້ນສາຍສາມັນແຂວງຄຳມ່ວນແມ່ນຢາກຮຽກຮ້ອງມາຍັງທຸກພາກສ່ວນໃຫ້ມີສ່ວນຮ່ວມນຳກັນ,ນັກສອບເສັງກໍ່ຕ້ອງມີຄວາມຕື່ນຕົວເຂົ້າມາຮ່ວມສອບເສັງໃຫ້ທັນໂມງ,ທັນເວລາ,ປະຕິບັດລະບຽບການສອບເສັງໃຫ້ເຂັ້ມງວດ, ຜູ້ປົກຄອງກໍ່ຕ້ອງອຳນວຍຄວາມສະດວກໃຫ້ ແກ່ລູກຫຼານເພື່ອເຮັດແນວໃດເຮັດ ໃຫ້ບັ້ນສອບເສັງຄັ້ງນີ້ບັນລຸຕາມ ຄາດໝາຍທີ່ວາງໄວ້.

ພາບ ແລະຂາ່ວໂດຍ: ໜັງສືພິມເສດຖະກິດ-ສັງຄົມ

แชร์