ລົດຈັກຕຳທ້າຍລົດເກັບຂີ້ເຫຍື່ອເສຍຊີວິດຄາທີ

  ວັນທີ 17 ມິຖຸນາ 2019 ເວລາ 22: 40 ໂມງ ໄດ້ເກີດມີອຸບັດເຫດລົດຈັກຕຳທ້າຍລົດບັນທຸກຂີ້ເຫຍື້ອຢ່າງຮຸນແຮງຈົນເຮັດໃຫ້ຜູ້ຂັບຂີລົດຈັກເສຍຊີວິດຄາທີ່. ຊຶ່ງເຫດການດັ່ງກ່າວໄດ້ເກີດຂຶ້ນຢູ່ບໍລິເວນເສັ້ນທາງວິໄລບ້ານໂພນສະຫວ່າງໃຕ້, ນະຄອນໄກສອນພົມວິຫານ ແຂວງສະຫວັນນະເຂດ (ເສັ້ນຕັດແຕ່ຖະ ໜົນໄກສອນພົມວິຫານໄປຫາຖະໜົນສັນຕິພາບດ້ານຫຼັງຂອງບໍລິສັດລາວໂທລະຄົມໃກ້ສີ່ແຍກວັດໂພນສະຫວ່າງໃຕ້ຕໍ່ໜ້າຮ້ານປິ່ນງົວໂຊກໄຊ).

  ຕາມການໃຫ້ຂໍ້ມູນຂອງເຈົ້າໜ້າທີ່ຕຳຫຼວດຈະລາຈອນແຂວງໄດ້ໃຫ້ຮູ້ວ່າ: ໃນເວລານັ້ນໄດ້ມີລົດບັນທຸກຂີ້ເຫຍື້ອສີສົ້ມ, ໝາຍເລກທະບຽນສະຫວັນນະເຂດ ບ.ກ 1110 ຊຶ່ງຂັບຂີ່ໂດຍທ້າວ ສົມຄວນ ອາຍຸ 38 ປີ, ກຳລັງຈອດເອົາຂີ້ເຫຍື້ອຢູ່ແຄມທາງເບື້ອງຂວາ, ໃນຂະນະນັ້ນຝົນກຳລັງຕົກ. ຈາກນັ້ນກໍ່ໄດ້ມີລົດຈັກມາຕຳເອົາທ້າຍລົດຢ່າງຮຸນແຮງຈົນເຮັດໃຫ້ຄົນຂັບລົດຈັກນອນນິ້ງຢູ່ກັບທີ່.

  ຜ່ານການສອບຖາມ ແລະການໄລຟ໌ສົດຂອງໜ່ວຍກູ້ໄພສະຫວັນນະເຂດ ຈິ່ງໄດ້ຮູ້ວ່າ: ຄົນຂັບຂີ່ລົດຈັກຊື່ທ້າວ ແອ ອາຍຸ 50 ປີ, ຢູ່ບ້ານຫົວເມືອງໃຕ້ນະ ຄອນໄກສອນພົມວິຫານ, ຂັບຂີ່ລົດຈັກ ຍີ່ຫຍໍ້ ສະກຸບປີ້ສີດຳ, ໝາຍເລກທະບຽນ ສະຫວັນນະເຂດ ຈວ 1023 ມີການກະທົບທີ່ຕົນໂຕ ແລະຄໍຫັກເຮັດໃຫ້ເສຍຊີວິດຄາທີ່.

  ຊຶ່ງສາເຫດເບື້ອງຕົ້ນຄາດວ່າຜູ້ຂັບຂີ່ລົດຈັກອາດຈະແລ່ນຜ່າຝົນບວກກັບຄວາມມືດຈິ່ງບໍ່ເຫັນລົດຢູ່ຂ້າງໜ້າຈິ່ງເປັນເຫດໃຫ້ເກີດອຸປະຕິເຫດຄັ້ງນີ້. ສ່ວນ ຈະເປັນແນວໃດນັ້ນປະຈຸບັນເຈົ້າໜ້າທີ່ກຳລັງຢູ່ໃນຂັ້ນຕອນການສືບສວນ-ສອບສວນຄົນທີ່ຢູ່ໃນເຫດການ ແລະສະຖານທີ່ເກີດເຫດ.

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์