150 ບໍລິສັດ ຮ່ວມວາງສະແດງສິນຄ້າງານລາວທັອບ 3 ເອັກສະໂປ

  ໃນລະຫວ່າງວັນທີ 20-22 ມິຖຸນາ 2019 ທີ່ນະຄອນຫຼວງວຽງຈັນ ສະພາການຄ້າ ແລະອຸດສາຫະກຳແຫ່ງຊາດລາວ, ສະມາຄົມສະຖາປະນິກ ແລະ ວິສະວະ ກອນກໍ່ສ້າງລາວ ແລະກຸ່ມບໍລິ ສັດເອເອັມບີໄດ້ຈັດງານວາງສະແດງ LAO TOP 3 EXPO 2019 ໂດຍເປັນກຽດການເຂົ້າຮ່ວມຂອງ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ, ພ້ອມດ້ວຍແຂກຖືກເຊີນເຂົ້າຮ່ວມ.

  ທ່ານ ພອນໄຊ ສຸດທິພົງ ປະທານສະມາຄົມສະຖາປານິກ ແລະວິສະວະກອນກໍ່ສ້າງລາວກ່າວວ່າ: ງານວາງສະແດງ Lao top 3 expo 2019  ໄດ້ລວບ ລວມ ເອົາ 3 ງານເຂົ້າໃນບ່ອນດຽວຄື: ງານວາງສະແດງລະດັບສາກົນທາງດ້ານສິນຄ້າອຸດສາຫະກຳອາຄານ, ການກໍ່ສ້າງ ແລະອຸດສາຫະກຳຂະໜາດໃຫຍ່ຂອງ ລາວ (LaoBuild 2019), ງານວາງສະແດງລະດັບສາກົນກ່ຽວກັບອຸດສາຫະກຳການສະໜອງນ້ຳ ແລະການບົວລະບັດນ້ຳຂອງລາວ (LaoWater 2019 ) ແລະການວາງສະແດງລະດັບສາກົນທາງດ້ານອາຫານ ແລະເຄື່ອງດື່ມຂອງລາວ (LaoFood 2019) ຊຶ່ງມີຜູ້ປະກອບການ 150 ບໍລິສັດ ແລະສິນຄ້າຍີ່ຫໍ້ຊັ້ນນຳຫຼາຍກວ່າ 10 ປະເທດ ເຂົ້າຮ່ວມວາງສະແດງ.

  ການຈັດງານໃນຄັ້ງນີ້ເປັນງານວາງສະແດງສິນຄ້າອຸດສາຫະກຳລະດັບສາກົນທີ່ໃຫຍ່ທີ່ສຸດຂອງລາວໂດຍລວບລວມຜະລິດຕະພັນ ແລະເຕັກໂນໂລຊີທີ່ທັນສະ ໄໝດ້ານອຸດສາຫະກຳອາຄານ ແລະວັດສະດຸກໍ່ສ້າງ, ເຄື່ອງກົນຈັກ, ລິບ, ເຄື່ອງໃຊ້ໄຟຟ້າ, ນະວັດຕະກຳກ່ຽວກັບອຸປະກອນ ແລະ ການສະໜອງພະລັງງານ, ອຸປະກອນຄອມພິວເຕີ,ເຄື່ອງໃຊ້ໃນເຮືອນ ແລະອື່ນໆຊຶ່ງມີສິນຄ້າຍີ່ຫໍ້ຊັ້ນນຳຫຼາຍກວ່າ 10 ປະເທດເຊັ່ນ: ຈີນ,ເຢຍລະມັນ, ອີຕາລີ, ຍີ່ປຸ່ນເກົາຫຼີ, ມາເລເຊຍ, ສິງກະໂປ, ໄທ ແລະສະຫະລັດອາເມລິກາ.

  ນອກຈາກນີ້,ພາຍໃນງານຍັງມີກອງປະຊຸມ, ສຳມະນາທາງດ້ານເຕັກໂນໂລຊີ ແລະສົນທະນາກັບຜູ້ຊ່ຽວຊານໃນການແກ້ໄຂບັນຫາ, ຮຽນຮູ້ກ່ຽວກັບນະວັດຕະກຳໃໝ່ໆ ລວມທັງຄົ້ນຫາໂອກາດທາງດ້ານທຸລະກິດ; ການມອບລາງວັນການກໍ່ສ້າງ ແລະຕົບແຕ່ງອາຄານສະຖານທີ່ດີເດັນປະຈໍາປີ 2019 ໃຫ້ແກ່ໂຮງແຮມ Le Thatluang D’or Boutique hotel, ໂຮງແຮມຈັນທະປັນຍາ, ສຳນັກງານໃຫຍ່ Star telecom (UNITEL), ບໍລິສັດພະລັງງານຈະເລີນເຊກອງ ຈຳກັດ ແລະສິມວັດຈັນນຳອີກ.

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์