ລາຍຮັບສະຫວັນປີນີ້ອາດບໍ່ເຖີງແຜນ ຮອງນາຍົກເນັ້ນແຂວງຕ້ອງເຮັດສຸດຂີດໃຫ້ຕົວເລກຕາມເປົ້າໝາຍ

  ນັບວ່າເປັນສິ່ງທ້າທາຍສົມຄວນໃຫ້ກັບແຂວງສະຫວັນນະເຂດໃນການຈັດຕັ້ງປະຕິບັດການເກັບລາຍຮັບເຂົ້າງົບປະມານເວລາຜ່ານໄປແລ້ວ 5 ເດືອນເກັບໄດ້ພຽງ 34,63% ຂອງແຜນການປີດ້ານການເງິນແຂວງຢືນຢັນໝົດປີນີ້ການເກັບລາຍຮັບຂອງແຂວງອາດບໍ່ເຖິງແຜນການປີຍ້ອນມີຫຼາຍສາເຫດຫຼັກເປັນຕົ້ນລາຍຮັບບາງຂະແໜງການຫຼຸດລົງຂະນະທີ່ທ່ານຮອງນາຍົກເນັ້ນຕ້ອງຈັດຕັ້ງການປະຕິບັດການເກັບລາຍຮັບເຮັດ ໃຫ້ສຸດຂີດເພື່ອບັນລຸຕາມແຜນການ.

 ທ່ານ ກົງຈັກ ໜໍ່ແກ້ວ ຫົວໜ້າພະແນກການເງິນແຂວງສະຫວັນນະເຂດ ໄດ້ລາຍງານໃຫ້ຮູ້ໃນໂອກາດທີ່ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດ ຖະມົນຕີກະຊວງການເງິນໄດ້ລົງຊຸກຍູ້ວຽກງານການເງິນ ແລະ ການຂຸດຄົ້ນລາຍຮັບໃຫ້ງົບປະມານຢູ່ແຂວງສະຫວັນນະເຂດ ເມື່ອບໍ່ດົນມານີ້ວ່າ: ໃນປີນີ້ການເກັບລາຍຮັບຂອງແຂວງອາດເກັບລາຍຮັບເຂົ້າງົບປະມານບໍ່ໄດ້ຕາມເປົ້າຊຶ່ງເກີດຈາກຫຼາຍສາເຫດໂດຍສະເພາະການມອບພັນທະຂອງຫົວໜ່ວຍທຸລະກິດຫຼຸດ ລົງເປັນຕົ້ນຂະແໜງການການຄ້າຫຼຸດລົງ 1,18 ຕື້ ກີບ,ບໍລິການຫຼດລົງ 7,65 ຕື້ກີບ,ກໍ່ສ້າງຫຼຸດລົງ 16,56 ຕື້ກີບ ນອກນີ້ບັນດາຫົວໜ່ວຍທຸລະກິດທີ່ ນອນໃນເຂດເສດຖະກິດພິເສດສະຫວັນ-ເຊໂນ ແລະເຂດການຄ້າຊາຍແດນແມ່ນໄດ້ແຕ່ອາກອນເງິນເດືອນເປັນສ່ວນຫຼາຍ,ສ່ວນອາກອນມູນຄ່າເພີ່ມ ແລະອາກອນກໍາໄລແມ່ນຖືກຍົກເວັ້ນ, ຈຳນວນໜຶ່ງອາກອນກໍາໄລແມ່ນຍັງບໍ່ທັນໝົດສັນຍາທີ່ກວມເອົາ 15% ຂອງຫົວໜ່ວຍທັງໝົດທີ່ແຂວງຄຸ້ມຄອງ, ຍັງມີໜີ້ຄ້າງມອບແກ່ຍາວ ແລະໜີ້ເກີດໃໝ່ແຕ່ຍັງຄ້າງຊໍາລະເຖິງ 65,71 ຕື້ກີບ, ລາຍຮັບຈາກທີ່ ດິນຫຼຸດລົງ 3,37 ຕື້ກີບ, ວິຊາການຈົດຮັບ-ຈົດຈ່າຍຫຼຸດລົງ 7,46 ຕື້ກີບ, ລາຍຮັບຄ່າທໍານຽມອ້ອມຂ້າງຫຼຸດລົງ 1 ຕື້ກວ່າກີບ.

 ພ້ອມດຽວກັນນີ້ກໍ່ຍັງມີສາເຫດຈາກສິນຄ້າຈໍານວນຫຼາຍລາຍການໄດ້ຮັບການຫຼຸດຜ່ອນຕາມກອນໃນເຂດການຄ້າເສລີອາຊຽນທີ່ຖືກຍົກເວັ້ນພາສີຂາເຂົ້າແລະອາກອນມູນຄ່າເພີ່ມໃນຂອດການນໍາເຂົ້າຕາມນະໂຍບາຍສົ່ງເສີມການລົງທຶນຫຼຸດລົງ 65,88% ເທົ່າກັບ 18 ຕື້ກວ່າກີບ, ປະລິມານການນໍາເຂົ້າສິນຄ້າຈໍານວນໜຶ່ງທີ່ເປັນລາຍຮັບຕົ້ນຕໍຊຶ່ງກວມເອົາອັດຕາສ່ວນໃຫຍ່ຂອງລາຍຮັບແມ່ນມີທ່າອ່ຽງຫຼຸດລົງເຊັ່ນ: ພາຫະນະຫຼຸດລົງ 20,75% ເທົ່າກັບ 9,26 ຕື້ກີບ ແລະນ້ຳມັນເຊື້ອໄຟຢູ່ດ່ານແດນສະຫວັນຫຼຸດລົງ 31,13% ເທົ່າກັບ17,82 ຕື້ກີບ.

  ໃນໂອກາດນີ້, ທ່ານ ສົມດີ ດວງດີ ໄດ້ກ່າວເນັ້ນວ່າ: ໃນເມື່ອສະຫວັນນະເຂດ ເກັບລາຍຮັບບໍ່ໄດ້ຕາມເປົ້າຄືແນວນີ້ພາກສ່ວນກ່ຽວຂ້ອງຕ້ອງໄດ້ມີການກວດ ກາຄືນບັນດາສາເຫດທີ່ແທ້ຈິງທີ່ພາໃຫ້ການເກັບລາຍຮັບບໍ່ໄດ້ຕາມເປົ້າ ໂດຍສະເພາະແມ່ນການກວດກາການເຄື່ອນໄຫວ ຂອງຫົວໜ່ວຍທຸລະກິດຕ່າງໆວ່າຫຼຸດລົງໄດ້ແນວໃດ ແລະເບິ່ງຄືນອັນທີ່ເປັນທຸລະ ກິດທີ່ມີຄວາມໝັ້ນຄົງ,ຫົວໜ່ວຍທຸລະກິດຄ້າ-ຂາຍບໍ່ໄດ້ແຕ່ພັດສ້າງເຮືອນໃຫຍ່ໂຕ, ຊື້ພາຫະນະຫຼູຂີ່ນັ້ນແມ່ນເຂົາເອົາເງິນມາແຕ່ໃສສະນັ້ນ, ເຈົ້າໜ້າທີ່ເຮົາກໍ່ຄວນລົງກວດເບິ່ງຢ່າງແຂງແຮງໂດຍລົງເຮັດເປັນທີມລົງເລິກຢ່າງເຖິງຖອງເອົາຂະແໜງການທີ່ກ່ຽວຂ້ອງເຂົ້າຮ່ວມນໍາ ແລະກໍ່ໃຫ້ດໍາເນີນຢ່າງເຄັ່ງຄັດກວ່າເກົ່າ, ສໍາລັບຢູ່ບັນດາເມືອງກໍ່ຄວນຊີ້ນໍາຕາມຂະແໜງການໃຫ້ສອດຄ່ອງໃນນີ້ການເສຍພາສີທີ່ດິນກໍ່ແມ່ນເຮັດໄປທັງສອງລະບົບຄື: ເສຍຢູ່ກັບບ້ານ ຫຼື ບໍ່ກໍ່ເສຍຢູ່ທະນາຄານຕາມແຕ່ມີຄວາມສະດວກ, ເລື່ອງການເສຍຄ່າທໍານຽມລົດປາກົດວ່າຍັງບໍ່ທັນໄດ້ດໍາເນີນການແຕ່ ຢ່າງໃດເບື້ອງຕໍາຫຼວດກໍ່ຍັງບໍ່ທັນເຮັດຫຍັງພວກເຮົາມີແຕ່ໂຍະຍານໃຫ້ແກ່ກັນສະນັ້ນກໍ່ຄວນໃຫ້ມີການກວດກາລົງເຮັດວຽກກໍ່ໃຫ້ເອົາຕໍາຫຼວດໄປນໍາພົບລົດບໍ່ ເສຍຄ່າທໍານຽມແລ້ວກໍ່ປັບໃໝໄປພ້ອມ, ຄວນເຮັດຕາມລະບຽບຫຼັກການຖ້າຫາກປະໄປມັນກໍ່ສ້າງຄວາມສັບສົນ ແລະ ແກ່ຍາວໄປຕື່ມແຕ່ສິ່ງສໍາຄັນຢາກໃຫ້ ເອົາໃຈໃສ່ກໍ່ຄືການຄຸ້ມຄອງຫົວໜ່ວຍທຸລະກິດຕ່າງໆໃຫ້ດີ ແລະກໍ່ຕ້ອງກໍາໃຫ້ໄດ້ຫົວໜ່ວຍທຸລະກິດທີ່ມີພື້ນຖານຄວາມໝັ້ນຄົງ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์