ຫຼວງນ້ຳທາທຳລາຍຊີ້ນໝູແຊ່ແຂງນຳເຂົ້າຈາກຈີນ ໜັກ 2 ໂຕນ

  ວັນທີ 17 ມິຖຸນາ 2019 ພະແນກກະສິກໍາ ແລະ ປ່າໄມ້ແຂວງຫຼວງນໍ້າທາຮ່ວມກັບເຈົ້າໜ້າທີ່ປະຈໍາດ່ານສາກົນບໍ່ເຕັ່ນ ແລະພາກສ່ວນທີ່ກ່ຽວຂ້ອງໄດ້ຈັດ ພິທີທໍາລາຍຊີ້ນໝູແຊ່ແຂງທີ່ນໍາເຂົ້າຈາກ ສປ ຈີນ ຈໍານວນ 2 ໂຕນ ລວມເປັນມູນຄ່າ 80 ລ້ານກີບ ທີ່ເຂດເສດຖະກິດບໍ່ເຕ່ນແດນງາມໂດຍມີ ທ່ານ ຄໍາແພງ ພານາວັນ ຫົວໜ້າຂະແໜງລ້ຽງສັດ ແລະ ການປະມົງພະແນກກະສິກໍາ ແລະປ່າໄມ້ ແຂວງຫຼວງນໍ້າທາ, ພ້ອມດ້ວຍເຈົ້າໜ້າທີ່ປະຈໍາດ່ານສາກົນບໍ່ເຕ່ນ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ການທໍາລາຍຊີ້ນໝູແຊ່ແຂງຄັ້ງນີ້ແມ່ນເຈົ້າໜ້າທີ່ສັດຕະວະແພດພະແນກກະສິກໍາ ແລະ ປ່າໄມ້ແຂວງຫຼວງນໍ້າທາປະຈໍາດ່ານສາກົນບໍ່ເຕ່ນໄດ້ກວດລົດໝາຍເລກທະບຽນ AD 8658 ລົດຈີນ ໃນເວລາ 15:30 ໂມງ ຂອງວັນທີ 15 ມິຖຸນາ 2019 ໄດ້ພົບເຫັນຊີ້ນໝູແຊ່ແຂງຈໍານວນ 200 ແກັດ, ລວມນໍ້າໜັກ 2 ພັນກິໂລກະລາມ ຫຼື 2 ໂຕນຈາກທ້າວ ອາມິງ ຄົນຈີນ ອາຍຸ 50 ປີ ເປົ້າໝາຍແມ່ນນໍາເອົາຊີ້ນໝູແຊ່ແຂງໂດຍສະເພາະແມ່ນນົມໝູນໍາເຂົ້າມາແຕ່ ສປ ຈີນ ເພື່ອຈະນໍາໄປຈໍາໜ່າຍຢູ່ ສປປ ລາວ ຈິ່ງຖືກເຈົ້າໜ້າທີ່ຍຶດພ້ອມທັງເຮັດບົດບັນທຶກ ແລະກ່າວເຕືອນຜູ້ກ່ຽວ. ມາໃນວັນທີ 17 ມິຖຸນາ ເຈົ້າໜ້າທີ່ໆກ່ຽວ ຂ້ອງຈິ່ງໄດ້ຈັດພິທີທໍາລາຍເພື່ອປ້ອງກັນການລະບາດພະຍາດອະຫິວາໝູອັບຟຣິກາແຜ່ລາມເຂົ້າ ສປປ ລາວ.

  ທ່ານ ຄໍາແພງ ພານາວັນ ໄດ້ກ່າວຮຽກຮ້ອງເຖິງພໍ່ຄ້າຊາວຂາຍໃຫ້ເອົາໃຈໃສ່ປະຕິບັດຕາມການແຈ້ງການກ່ຽວກັບການສະກັດກັ້ນຫ້າມນໍາເຂົ້າໝູ ແລະ ຜະ ລິດຕະພັນໝູທຸກຊະນິດລວມທັງຜະລິດຕະພັນປຸງແຕ່ງເບື້ອງຕົ້ນຈາກ ສປ ຈີນ ແລະ ສສ ຫວຽດນາມເຂົ້າສູ່ ສປປ ລາວ ເພື່ອປ້ອງກັນສະກັດກັ້ນບໍ່ໃຫ້ພະ ຍາດອະຫິວາໝູອັບຟຣິກາແຜ່ລະບາດເຂົ້າສູ່ ສປປ ລາວ

 ພາຍຫຼັງປະຕິບັດຕາມການແຈ້ງການກ່ຽວກັບການສະກັດກັ້ນຫ້າມນໍາເຂົ້າໝູ ແລະຜະລິດຕະພັນໝູທຸກຊະນິດລວມທັງຜະລິດຕະພັນປຸງແຕ່ງເບື້ອງຕົ້ນຈາກ ສປ ຈີນ ແລະ ສສ ຫວຽດນາມເຂົ້າສູ່ ສປປລາວມາເຖິງປະຈຸບັນແຂວງຫຼວງນໍ້າທາ ໄດ້ຍຶດ ແລະ ທໍາລາຍຊີ້ນໝູນໍາເຂົ້າຈາກ ສປ ຈີນ ລວມທັງໝົດ 3 ຄັ້ງ, ລວມຊີ້ນໝູດິບຈໍານວນ 7,4 ໂຕນ ແລະ ຊີ້ນໝູແຫ້ງ 500 ກິໂລກະລາມລວມມູນຄ່າເສຍຫາຍທັງໝົດ 300 ລ້ານກ່ວາກີບ.

ຂຽນໂດຍ:ກິ່ນນາລົມ ແອ່ນຖ່າຍໄທ      

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์