ເກືອບ 60 ໂຄງການຟື້ນຟູໄພພິບັດຢູ່ອັດຕະປື ຍັງຄ້າງຊຳລະ

  ໄຟພິບັດທີ່ເກີດຂຶ້ນຢູ່ເມືອງສະໜາມໄຊ ແຂວງອັດຕະປື ເປັນເວລາເກືອບປີແລ້ວ ແລະລັດໄດ້ມີການເລັ່ງໃສ່ການຟື້ນຟູແບບຮີບດ່ວນເພື່ອແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນກັບຄືນສູ່ສະພາບປົກກະຕິໂດຍໄວໜຶ່ງໃນນັ້ນແມ່ນວຽກພັດທະນາພື້ນຖານໂຄງລ່າງເປັນບັນຫາຫຼັກລວມທັງໝົດ 59 ໂຄງ ການ, ຊຶ່ງມາຮອດປະຈຸບັນບາງໂຄງການໄດ້ປະຕິບັດສຳເລັດແລ້ວ ແລະບາງໂຄງການກໍຍັງສືບຕໍ່ຈັດຕັ້ງຢູ່, ແຕ່ທັງນີ້ທັງນັ້ນໃນຈຳນວນໂຄງການດັ່ງກ່າວລັດຍັງບໍ່ທັນມີງົບປະມານຊຳລະເທື່ອ.

   ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື ໃຫ້ສຳພາດເມື່ອບໍ່ດົນມານີ້ຮູ້ວ່າ: ປີ 2018 ຜ່ານມາ, ແຂວງອັດຕະປື ໂດຍສະເພາະເມືອງສະໜາມໄຊ ແມ່ນໄດ້ຮັບຜົນກະທົບຢ່າງຮ້າຍແຮງຈາກສັນເຂື່ອນເຊປ່ຽນ-ເຊນໍ້ານ້ອຍແຕກ, ເຮັດໃຫ້ຫຼາຍຂົງເຂດຖືກເສຍຫາຍເປັນຕົ້ນພື້ນຖານໂຄງລ່າງດ້ານຄົມມະນາ ຄົມ, ໂຮງຮຽນ, ໂຮງໝໍຕະຫຼອດເຮືອນຊານບ້ານຊ່ອງ ແລະບ່ອນທຳການຜະລິດຕ່າງໆ, ໄດ້ຮັບຄວາມເສຍຫາຍນອກນັ້ນຍັງມີຜູ້ເສຍຊີວິດຈາກເຫດການຄັ້ງນັ້ນ 71 ຄົນ, ເດັກກຳພ້າກຳພອຍພໍ່ແມ່ສູນເສຍໃນຄັ້ງນີ້ 28 ຄົນ ໂດຍຄວາມເສຍຫາຍຄັ້ງນີ້ແມ່ນກວມເອົາ 19  ບ້ານ, ປະຊາກອນ 20 ພັນກວ່າຄົນ, 4 ພັນກວ່າຄອບຄົວທີ່ໄດ້ຮັບຜົນກະທົບປະເມີນດ້ານເສດຖະກິດຄົວເຮືອນປະຊາຊົນ 6 ຮ້ອຍຕື້ກີບ, ມູນຄ່າເສຍຫາຍພາກເສດຖະກິດ, ທຸລະກິດ 124 ຕື້ກີບ, ພື້ນຖານໂຄງລ່າງ,ຖະໜົນຫົນທາງ,ສຸກສາລາ,ໂຮງຮຽນ ແລະອື່ນໆ ທີ່ເປັນຂອງສາທາລະນະມູນຄ່າ 75  ຕື້ກີບ, ປະຈຸບັນພວມປະເມີນຜົນກະທົບດ້ານສິ່ງ ແວດລ້ອມບໍລິເວນດິນທັບຖົມ, ປ່າໄມ້, ຫ້ວຍຮ່ອງໜອງບຶງຕ່າງໆ, ຄຸນນະພາບດິນ, ຄຸນນະພາບນໍ້າຍັງສືບຕໍ່ຢູ່.

  ເພື່ອເຮັດໃຫ້ການຟື້ນຟູກັບຄືນສູ່ສະພາບປົກກະຕິໂດຍໄວ, ປະຈຸບັນລັດຖະບານໄດ້ລົງທຶນເຂົ້າໃນການຟື້ນຟູຊີວິດການເປັນຢູ່ຂອງປະຊາຊົນມາຮອດດຽວນີ້ມີຢູ່ 59 ໂຄງການທີ່ພວມປະຕິບັດ,ຊຶ່ງການຈັດຕັ້ງປະຕິບັດນີ້ແມ່ນບົນພື້ນຖານຄວາມເປັນເອກະພາບຂອງສູນກາງຮອດທ້ອງຖິ່ນ ແລະ ຜ່ານການກວດສອບ, ຜ່ານການປະເມີນຂອງຄະນະວິຊາການ, ແນໃສ່ວຽກພັດທະນາພື້ນຖານໂຄງລ່າງຕົ້ນຕໍແມ່ນສ້ອມແປງເສັ້ນທາງນັບແຕ່ແຂວງລົງຮອດບ່ອນທີ່ປະສົບໄພພິບັດ ແລະການສ້ອມແປງໄລຍະນີ້ແມ່ນໂຄງການຮີບດ່ວນ, ຊຶ່ງປະຈຸບັນມີຫຼາຍບໍລິສັດປະຕິບັດໄດ້ສຳເລັດ ແລະມີຫຼາຍບໍລິສັດພວມດຳເນີນການ, ນອກນັ້ນຍັງເລັ່ງໃສ່ກໍ່ສ້າງຂົວຈາກເມື່ອກ່ອນເປັນໄມ້ດຽວນີ້ປ່ຽນເປັນຂົວເບເລ ທຽວໄດ້ 2 ລະດູສາມາດຂົນສົ່ງໄດ້.

  ຜ່ານການຈັດຕັງປະຕິບັດຕົວຈິງເຫັນວ່າຍັງຄາຢູ່ຂອດຂອງການຊຳລະເນື່ອງຈາກທຶນຮອນທີ່ຈະນຳມາຊຳລະສະສາງມາຮອດດຽວນີ້ຍັງບໍ່ທັນພຽງພໍ, ດັ່ງນັ້ນ ຈຶ່ງເວົ້າໄດ້ວ່າການປະຕິບັດໃນຈຳນວນ 59 ໂຄງການເວົ້າລວມຍັງບໍ່ທັນມີທຶນມາຊຳລະສະສາງເທື່ອ, ໃນຂະນະທີ່ຜູ້ລົງທຶນກ່ອນກຳລັງເລັ່ງທວງຢູ່,ເນື່ອງຈາກວ່າເກືອບປີແລ້ວທີ່ຍັງບໍ່ທັນຊຳລະສະສາງຕໍ່ກັບບັນຫາດັ່ງກ່າວນີ້ແຂວງກໍໄດ້ສະເໜີຫາລັດຖະບານເພື່ອພິຈາລະນາແກ້ໄຂເອົາງົບປະມານສ່ວນໃດສ່ວນໜຶ່ງທີ່ມີເພື່ອແກ້ໄຂໃຫ້ແກ່ຜູ້ລົງທຶນໄດ້ສືບຕໍ່ຈັດຕັ້ງປະຕິບັດຕໍ່ໃຫ້ສຳເລັດ, ທ່ານ ອຸ່ນຫຼ້າ ໄຊຍະສິດ ກ່າວຕື່

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์