ໄຊຍະ ພິຈາລະນາ 70 ກວ່າໂຄງການສຳປະທານດິນບໍ່ເຄື່ອນໄຫວ

   ຕະຫຼອດໄລຍະຜ່ານມາຄະນະພັກ, ຄະນະພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີ ແມ່ນມີຄວາມພະຍາຍາມນໍາພາຈັດຕັ້ງປະ ຕິບັດວຽກງານຄຸ້ມຄອງທີ່ດິນໃຫ້ເຂົ້າສູ່ລະບົບ ແລະສອດຄ່ອງກັບຄວາມເປັນຈິງ, ໂດຍຖືເອົາຄໍາຂວັນທີ່ວ່າ: ເຮັດໃຫ້ໄວ, ເຮັດໃຫ້ຫຼາຍ, ເຮັດໃຫ້ຖືກຕ້ອງຕາມລະບຽບກົດໝາຍ, ຂະນະທີ່ຢູ່ແຂວງມີ 71 ໂຄງການດິນສຳປະທານບໍ່ມີການເຄື່ອນໄຫວຊຶ່ງເວລານີ້ແຂວງກຳລັງພິຈາລະນາເພື່ອຫັນການຄຸ້ມຄອງເຂົ້າສູ່ລະບຽ ບກົດໝາຍ.

  ທ່ານ ສົມຈິດ ຈັນທະວົງ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີໃຫ້ຮູ້ວ່າ: ໃນໄລຍະຜ່ານມາແມ່ນໄດ້ສຸມໃສ່ຈັດຕັ້ງປະຕິບັດຕາມທິດການພັດທະນາທີ່ດິນເຊິ່ງມີຜົນສໍາເລັດໃນແຕ່ລະໜ້າວຽກເປັນຕົ້ນແມ່ນສໍາເລັດໃນການສໍາຫຼວດຈັດສັນທີ່ດິນ,ຕິດພັນກັບການກວດກາດິນ 8 ປະເພດຢູ່ຂັ້ນເມືອງໄດ້ 2 ເມືອງ ແລະ ຂັ້ນບ້ານສໍາເລັດ 235 ບ້ານ, ທຽບໃສ່ບ້ານໃນທົ່ວແຂວງເທົ່າກັບ 54% ແລະ ຍັງໄດ້ຈັດສັນທີ່ດິນຕາມໂຄງການພັດທະນາຕ່າງໆເຊັ່ນ: ໂຄງການຂະຫຍາຍຕົວເມືອງ, ໂຄງການສູນອານຸລັກຊ້າງ, ໂຄງການສ້າງແຫຼ່ງທ່ອງທ່ຽວ, ໂຄງການພັດທະນາວຽກງານປ້ອງກັນຊາດ, ໂຄງການລົງທຶນດ້ານກະສິກໍາ ແລະອື່ນໆອີກຈໍານວນໜຶ່ງ,

  ພ້ອມດຽວກັນກໍ່ໄດ້ເອົາໃຈໃສ່ໃນການກວດກາເກັບກໍາຂໍ້ມູນສໍາມະໂນທີ່ດິນຄືນໃນແຕ່ລະປີ, ເພື່ອເປັນຂໍ້ມູນໃນການຈັດເກັບຄ່າທໍານຽມການນໍາໃຊ້ທີ່ດິນ      (ພາສີທີ່ດິນ), ໂດຍເລັ່ງໃສ່ດິນປຸກສ້າງ ແລະດິນກະສິກໍາໄດ້ທັງໝົດ 2,9 ແສນຕອນ, ມີເນື້ອທີ່ 2,03 ແສນເຮັກຕາ, ໄດ້ສ້າງເງື່ອນໄຂ ແລະພື້ນຖານວັດຖຸເຕັກນິກ, ສ້າງຈຸດຄວບຄຸມເພື່ອເປັນບ່ອນອີງໃຫ້ແກ່ການນໍາໃຊ້ເຄື່ອງມືທີ່ທັນສະໄໝເຂົ້າໃນການສໍາຫຼວດວັດແທກທີ່ດິນຢູ່ທົ່ວແຂວງມາຮອດປະຈຸບັນທົ່ວແຂວງສາມາດຂຶ້ນທະບຽນອອກໃບຕາດິນໄດ້ທັງໝົດ 98,5 ພັນຕອນ, ເນື້ອທີ່ 30,5 ພັນເຮັກຕາ, ທຽບໃສ່ຕົວເລກຂໍ້ມູນສໍາມະໂນທີ່ດິນປະຕິບັດໄດ້ 33,18% ຂອງຕອນ ດິນທັງໝົດ.

  ທ່ານ ສົມຈິດ ຈັນທະວົງ ຍັງໃຫ້ຮູ້ຕື່ມອີກວ່າ: ການຄຸ້ມຄອງວຽກງານເຊົ່າ-ສໍາປະທານທີ່ດິນຂອງລັດໃນທົ່ວແຂວງ, ປະຈຸບັນການເຊົ່າ-ສໍາປະທານທີ່ດິນຂອງ ລັດມີ 280 ໂຄງການ, ມີ 421 ຕອນ, ເນື້ອທີ່ 1,85 ແສນເຮັກຕາ, ໃນນັ້ນເຊົ່າ 278 ຕອນ, ເນື້ອທີ່ 124,58 ເຮັກຕາ, ສໍາປະທານ 143 ຕອນ, ເນື້ອທີ່ 1,85 ແສນເຮັກຕາ, ບໍ່ມີການເຄື່ອນໄຫວ 71 ໂຄງການ, ມີ 74 ຕອນ, ເນື້ອທີ່565,50 ເຮັກຕາ, ຕໍ່ກັບບັນຫານີ້ແມ່ນຈະໄດ້ສືບຕໍ່ກວດກາ, ວິເຄາະວິໄຈຄືນ, ສາເຫດໂຄງການທີ່ຢຸດເຊົາແລະໂຄງການໃດທີ່ສືບຕໍ່, ເພື່ອຫັນການຄຸມຄອງເຂົ້າສູ່ລະບຽບກົດໝາຍ.

ຂຽນໂດຍ:  ອຸ່ນເຮືອນ ໂພທິລັກ    

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์