ຮອງນາຍົກ ຢ້ຽມຢາມຜູ້ປະສົບໄພນ້ຳຖ້ວມຢູ່ອັດຕະປື

  ວັນທີ 18 ມິຖຸນາ 2019 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີໄດ້ລົງເຄື່ອນໄຫວຢ້ຽມຢາມ ແລະພົບປະໂອ້ລົມປະຊາຊົນຜູ້ປະສົບໄພຢູ່ເມືອງສະ ໜາມໄຊ ແຂວງອັດຕະປື ໂດຍໃຫ້ກຽດຕ້ອນຮັບ, ຕິດຕາມຈາກຄະນະນຳຂອງແຂວງ ແລະເມືອງກ່ຽວຂ້ອງເຂົ້າຮ່ວມ.

  ການລົງຢ້ຽມຢາມຄັ້ງນີ້ແມ່ນໄດ້ລົງກວດກາໃນເຂດຟື້ນຟູເຊັ່ນ: ເຂດສ້ອມແປງເສັ້ນທາງ, ເຂດການຜະລິດຂອງຜູ້ປະສົບໄພແມ່ນສໍາເລັດການສ້າງທີ່ພັກຊົ່ວ ຄາວ, ປະຊາຊົນໄດ້ເຂົ້າພັກອາໃສເປັນທີ່ຮຽບຮ້ອຍ, ພື້ນຖານໂຄງລ່າງຂົວທາງ, ໂຮງຮຽນ, ໂຮງໝໍ, ສຸກສາລາໄດ້ຮັບການປັບປຸງປົວແປງໄປຕາມແຜນ ແລະ ປະຈຸບັນພວມ ກໍາລັງເລັ່ງມືການບຸກເບີກເນື້ອທີ່ທໍາການຜະລິດໃຫ້ປະຊາຊົນເຊິ່ງໃນນີ້ໄດ້ຮັບຜົນສໍາເລັດການບຸກເບີກໄປແລ້ວເປັນສ່ວນໃຫຍ່ພ້ອມນີ້ຄະນະພັກອົງການປົກຄອງແຕ່ລະຂັ້ນໄດ້ເອົາໃຈໃສ່ສືບຕໍ່ກະກຽມດຳເນີນກອງປະຊຸມໃຫຍ່ຂັ້ນ 2 ຂອງເມືອງ ແລະ ກອງປະຊຸມໃຫຍ່ 3 ຂັ້ນ ທົ່ວແຂວງເຊິ່ງມາຮອດປະຈຸ ບັນການ ສ້າງຂະບວນການໃນດ້ານຕ່າງໆແມ່ນມີຜົນສໍາເລັດເປັນສ່ວນໃຫຍ່ການລົງເຄື່ອນໄຫວຢ້ຽມຢາມພົບປະຄະນະນຳແຂວງ ແລະເມືອງເທື່ອນີ້ທ່ານຮອງນາຍົກໄດ້ກ່າວສະແດງຄວາມເປັນຫ່ວງເປັນໄຍຕໍ່ປະຊາຊົນໃນການດຳລົງຊີວິດ, ສະພາບຄວາມຄືບໜ້າໃນການແກ້ໄຂຟື້ນຟູຊີວິດການເປັນຢູ່ຂອງປະຊາຊົນ, ໂດຍສະ ເພາະແມ່ນການຈັດແບ່ງເນື້ອທີ່ເຮັດການຜະລິດ, ການກະກຽມລົງມືສູ່ການຜະລິດໃນມໍ່ໆນີ້ໃຫ້ໄດ້ຮັບປະສິດທິຜົນເພື່ອແນໃສ່ໃຫ້ທວງທັນກັບສະພາບຄວາມຮຽກຮ້ອງຕ້ອງການຂອງປະຊາຊົນ ແລະແທດເໜາະກັບແນວທາງນະໂຍບາຍຂອງພັກລັດ ແລະເງື່ອນໄຂຕົວຈິງ.

  ໃນໂອກາດດຽວກັນນັ້ນທ່ານຮອງນາຍົກລັດຖະມົນຕີກໍ່ໄດ້ເຄື່ອນໄຫວຢ້ຽມຢາມປະຊາຊົນເນື້ອທີ່ທຳການຜະລິດຜູ້ປະສົບໄພພິບັດພ້ອມມອບເຄື່ອງກອງນໍ້າມູນຄ່າ 300 ກວ່າລ້ານກີບ, ເພື່ອນໍາໄປຕິດຕັ້ງໃນແຕ່ລະສູນພັກຊົວຄາວເພື່ອໃຫ້ຜູ້ປະສົບໄພພິບັດໄດ້ມີນໍ້າດື່ມທີ່ສະອາດປອດໄພ.

 ຂ່າວຍັງໃຫ້ຮູ້ຕື່ມອີກວ່ານອກຈາກລົງຢ້ຽມຢາມເຮັດວຽກນຳພໍ່ແມ່ປະຊາຊົນຜູ້ປະສົບເມືອງສະໜາມໄຊ ແລະ ຊີ້ນຳວຽກງານໃຫ້ຄະນະນຳຂັ້ນແຂວງແລ້ວທ່ານ ບຸນທອງ ຈິດມະນີ ຍັງໄດ້ສືບຕໍ່ລົງເຄື່ອນໄຫວຢ້ຽມຢາມ ແລະພົບປະໂອ້ລົມປະຊາຊົນຜູ້ປະສົບໄພ ແລະ ຄະນະນຳເມືອງຢູ່ເມືອງໄຊເສດຖານຳ ອີກ.

ຂຽນໂດຍ: ສາຍນໍ້າ      

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์