ລັດອະນຸມັດພັດທະນາໂຄງການເຂື່ອນໄຟຟ້າເຊບັ້ງໄຟ 1

 ລັດຖະບານໄດ້ອະນຸມັດໃຫ້ບໍລິສັດລາວສະໄໝສືບຕໍ່ພັດທະນາໂຄງການເຂື່ອນເຊບັ້ງໄຟ 1 ແລະ ສຳຫຼວດຜົນກະທົບດ້ານສິ່ງແວດລ້ອມ ແລະ ອອກແບບກໍ່ ສ້າງໃນໂຄງການພັດທະນາ (PDA) ເພື່ອໃຫ້ເກີດຜົນປະໂຫຍດໂດຍໄວ.

   ໃນວັນທີ 14 ມິຖຸນາຜ່ານມາທີ່ກະຊວງແຜນການ ແລະ ການລົງທຶນໄດ້ມີພິທີເຊັນສັນຍາພັດທະນາໂຄງການ (PDA) ເຂື່ອນໄຟຟ້າເຊບັ້ງໄຟ 1 (ແກ້ງ ແກ້ວ) ແຂວງຄຳມ່ວນ ແລະແຂວງສະຫວັນນະເຂດ ລະຫວ່າງລັດຖະບານລາວ ແລະ ບໍລິສັດລາວສະໄໝກໍ່ສ້າງ, ຂົວທາງ ແລະ ບໍລິການຈຳກັດ ແລະ ບໍລິສັດ Nara clean energ co,ltd ໂດຍການໃຫ້ກຽດເຂົ້າຮ່ວມຂອງ ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ,ມີບັນດາລັດ ຖະມົນຕີ, ຮອງລັດຖະມົນຕີ, ເຈົ້າແຂວງໆຄໍາມ່ວນ, ເຈົ້າແຂວງແຂວງສະຫວັນນະເຂດ, ມີຫົວໜ້າຫ້ອງການ, ຫົວໜ້າກົມ, ຮອງຫົວໜ້າຫ້ອງການ, ຮອງຫົວໜ້າກົມ, ຮອງພະແນກຈາກສູນກາງ ແລະທ້ອງຖິ່ນ, ພະນັກງານຂະແໜງການທີ່ກ່ຽວຂ້ອງ ແລະຕາງໜ້າຈາກບໍລິສັດເຂົ້າຮ່ວມ.

  ທ່ານ ພູວົງ ກໍຣະສັກ ປະທານບໍລິສັດລາວສະໄໝກໍ່ສ້າງຂົວທາງ ແລະບໍລິການຈຳກັດກ່າວວ່າ: ເຂື່ອນໄຟຟ້າເຊບັ້ງໄຟ 1 (ແກ້ງແກ້ວ) ເປັນເຂື່ອນເນກປະ ສົງຊຶ່ງເປັນເຂື່ອນຂະໜາດກາງ 110 ເມກາວັດ ທັງຜະລິດໄຟຟ້າ ແລະເອົານໍ້າມາໃຊ້ຊົນລະກະເສດ, ລ້ຽງສັດ, ປູກຟັງພ້ອມນີ້ເຂື່ອນດັ່ງກ່າວຍັງສາມາດສ້າງ ເປັນເຂື່ອນແບບຝາຍນໍ້າລົ້ນ, ເຮັດປະ ຕູລະບາຍນໍ້າໄດ້ເລີກ ແລະກວ້າງຕາມ ລ້ວງນໍ້າໄດ້ປະມານ 9 ບານ, ພ້ອມທັງ ສາມາດເປີດກວ້າງເພື່ອຂະຫຍາຍລອງ ນໍ້າເຊໄດ້ຕື່ມອີກປະມານ 70 ແມັດ. ການສ້າງເຂື່ອນດັ່ງກ່າວ ຈະບໍ່ມີຜົນກະ ທົບຫຍັງຕໍ່ສິ່ງແວດລ້ອມ ໂດຍສະເພາະ ທີ່ພັກອາໃສ ແລະບ້ານເຮືອນປະຊາຊົນ ໃນຂົງເຂດດັ່ງກ່າວ ສະນັ້ນ ພາຍຫຼັງສ້າງ ເຂື່ອນໄຟຟ້າເຊບັ້ງໄຟ 1 (ແກ້ງແກ້ວ) ສໍາເລັດປະຊາຊົນໃນເຂດດັ່ງກ່າວຈະ ໄດ້ອະນິສົງມະຫາສານເປັນຕົ້ນ: ມີໄຟຟ້າ ໃຊ້, ມີນໍ້າເຮັດການປະມົງ, ມີນໍ້າເຮັດຊົນ ລະກະເສດ ແລະຈັດສັນເຮັດເປັນແຫຼ່ງທ່ອງທ່ຽວແບບທໍາມະຊາດ ແລະອື່ນໆ. ຊຶ່ງໂຄງການແມ່ນຈະລິເລີ່ມມາແຕ່ປີ 2013 ໂດຍທາງບໍລິສັດໄດ້ສຶກສາເກັບກໍາຂໍ້ມູນທາງດ້ານນໍ້າ, ທາງດ້ານຊັ້ນດິນ ແລະສິ່ງແວດລ້ອມອື່ນໆຢ່າງເປັນລະບົບ.

ລົງນາມເຊັນສັນຍາຄັ້ງນີ້ໂດຍທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະການລົງທຶນ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ພູຊະນະ ໄຊໂກສີ ຮອງຫົວໜ້າພະແນກແຜນການ ແລະການລົງທຶນແຂວງຄໍາມ່ວນ, ທ່ານ ຄໍາສອນ ສະຫວັນນະເລີດ ຮອງຫົວໜ້າພະແນກແຜນການ ແລະການລົງທຶນແຂວງສະຫວັນນະເຂດ, ທ່ານ ພູວົງ ກໍຣະສັກ ປະທານບໍລິສັດລາວສະໄໝກໍ່ສ້າງ, ຂົວທາງ ແລະ ບໍລິການຈຳ ກັດ, ທ່ານ ກິດສະດາ ມົນທຽນວິຊຽນສາຍກໍາມະການ ບໍລິສັດ Nara clean energ co,ltd ແລະທ່ານ ປະວັດ ປຣະກິດລີ ກໍາມະການບໍລິສັດ Naracle an energ co,ltd ພ້ອມດ້ວຍແຂກຖືກເຊີນເຂົ້າຮ່ວມເປັນສັກຂີພິຍານ.

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์