ອັດຕະປືເອົາໃຈໃສ່ຄຸ້ມຄອງສັດນ້ຳ ແລະສັດປ່າ

  ອີງຕາມການລາຍງານຂອງຫ້ອງການບໍລິຫານກອງກວດກາປ່າໄມ້ພະແນກກະສິກຳ ແລະປ່າໄມ້ແຂວງອັດຕະປື ໃຫ້ຮູ້ວ່າ: ສຳລັບປີ 2019 ນີ້ເຈົ້າໜ້າທີ່ສາ ມາດກວດພົບຜູ້ກະທຳຜິດລັກລອບຊື້-ຂາຍສັດນໍ້າ ແລະສັດປ່າມີທັງປະເພດຫວງຫ້າມຢູ່ໃນບັນຊີທີ I ປະເພດຄຸ້ມຄອງຢູ່ໃນບັນຊີທີ II ແລະ ປະເພດທົ່ວໄປຢູ່ໃນບັນຊີທີ III  2 ຄັ້ງທາງເຈົ້າໜ້າທີ່ກໍ່ໄດ້ສະແດງໂຕເຂົ້າໄປເພື່ອທຳການກັກຢຶດຂອງກາງ ແລະ ຜູ້ກະທຳຜິດພ້ອມທັງປະຕິບັດຕາມລະບຽບການກົດໝາຍວ່າດ້ວຍສັດນໍ້າ ແລະ ສັດປ່າທີ່ໃດ້ລະບຸໄວ້ໃນພາກ ທີ VIII ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດມາດຕາທີ 67,68 ແລະ 70 ຄັ້ງທີ 1 ກັກຢຶດປະເພດຊີ້ນສ່ວນສັດປ່າຈຳນວນ 210 ກິໂລ ແລະເຄືອແຫ້ມ 36 ກິໂລ, ຄັ້ງທີສອງເປັນປະເພດປາຝານອນໃນບັນຊີທີ II  ປະເພດຄຸ້ມຄອງຈຳນວນ 6 ໂຕລວມນໍ້າໜັກ 17 ກິໂລ ແລະກໍ່ໄດ້ຈັດພິທີປ່ອຍລົງໃສວັງສະຫງວນປາກຄອນລຸງໃນວັນທີ 14 ມິຖຸນາ 2019 ນີ້ໂດຍມີ ທ່ານ ເພັດທະນົງ ສັກເທບຄຳພູນວົງ ຮອງຫົວໜ້າພະແນກກະສິກຳ ແລະປ່າໄມ້ພະນັກງານວິຊາການຕະຫຼອດຮອດອຳນາດການປົກຄອງບ້ານເມືອງໃໝ່ເຂົ້າຮ່ວມ.

  ການປ່ອຍຄັ້ງນີ້ກໍເພື່ອຄືນຊີວິດໃຫ້ແກ່ສັດນໍ້າປະເພດດັ່ງກ່າວຄືນສູ່ທຳມະຊາດພ້ອມທັງມອບໃຫ້ອຳນາດການປົກຄອງບ້ານຈົ່ງເປັນເຈົ້າການໃນການແຈ້ງ ການ ແລະໂຄສະນາໄຫ້ແກ່ປະຊາຊົນຮັບຮູ້ ແລະ ເຂົ້າໃຈໃນການຄຸ້ມຄອງ ແລະປົກປັກຮັກສາສັດນ້ຳຊ່ວຍກັນເພື່ອເຮັດໄຫ້ສັດນ້ຳເພີ່ມຈຳນວນ ແລະຄວາມ ອຸດົມສົມບູນຂຶ້ນ ທັງນີ້ ກໍເພື່ອເປັນການຕອບສະໜອງການຊົມໄຊ້ພາຍໃນໂດຍສະເພາະແມ່ນຮັບປະກັນດ້ານໂພສະນາການໃຫ້ພຽງພໍພາຍໃນແຂວງອັດຕະປື.

 ຂຽນໂດຍ:ຍົມມາລາ ບຸບຜາພັນ

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์