ປະດັບຫຼຽນໄຊ ແລະມອບໃບຍ້ອງຍໍຜູ້ປະກອບສ່ວນປັບປຸງຕາຂ່າຍໄຟຟ້າໃນແຂວງຄຳມ່ວນ

  ວັນທີ14 ມິຖຸນາ 2019 ລັດວິສະຫະກິດໄຟຟ້າລາວສາຂາແຂວງຄຳມ່ວນໄດ້ມີພິທີປະດັບຫຽນໄຊ ແລະມອບໃບຍ້ອງຍໍຜົນງານການປະກອບສ່ວນເຂົ້າໃນວຽກງານປັງປຸງ, ສ້ອມແປງຕາຂ່າຍໄຟຟ້າພາຍໃນແຂວງຄຳມ່ວນທີ່ຖືກຜົນກະທົບຈາກພະຍຸດອກສຸລິໃນປີ 2017 ຜ່ານມາເປັນກຽດເຂົ້າຮ່ວມ ແລະ ມອບໃບຍ້ອງຍໍໂດຍທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ.

  ໃນລະຫວ່າງວັນທີ 15-16 ກັນຍາ 2017 ແຂວງຄຳມ່ວນໄດ້ຮັບຜົນກະທົບຈາກໄພທໍາມະຊາດໜັກພໍສົມຄວນຄື: ເມືອງບົວລະພາ ໄຊພູທອງ, ເຊບັ້ງໄຟ, ມະຫາໄຊ ແລະເມືອງຍົມມະລາດເປັນເຫດໃຫ້ບ້ານທີ່ບໍ່ໄດ້ໃຊ້ໄຟຟ້າຈຳນວນ 242 ບ້ານ ຊຶ່ງໄດ້ສ້າງຜົນເສຍຫາຍບໍ່ນ້ອຍຕໍ່ຊັບສິນຂອງລັດກໍຄືປະຊາຊົນໂດຍສະ ເພາະຕໍ່ກັບລະບົບຕະຂ່າຍໄຟຟ້າແມ່ນມີຄວາມເສຍຫາຍຫຼາຍ. ຍ້ອນການຊີ້ນຳຈາກຂັ້ນເທິງບວກກັບຄວາມເອົາໃຈໃສ່ຂອງລັດວິສະຫະກິດໄຟຟ້າສາຂາແຂວງຄຳມ່ວນໄດ້ມີການສ້ອມແປງແກ້ໄຂຂົນສົ່ງເຄື່ອນຍ້າຍອຸປະກອນຕ່າງໆເພື່ອເຂົ້າໄປຟື້ນຟູຕາຂ່າຍໄຟຟ້າໃຫ້ກັບສູ່ສະພາບເດີມເຖິງຈະພົບຄວາມຫຍຸ້ງຍາກເນື່ອງຈາກສະພາບເສັ້ນທາງບໍ່ເອື້ອອຳນວຍແລ້ວແລວສາຍໄຟລັດທົ່ງນາປ່າດົງແຕ່ທຸກຄົນກໍ່ສາມັນຄີກັນເຮັດຫຼ້ອນໜ້າທີ່.

    ທ່ານ ປອ ເພັດສະໜອນ ພອນວິໄລສັກ ຫົວໜ້າລັດວິສະຫະກິດໄຟ້າແຂວງຄຳມ່ວນໄດ້ຜ່ານບົດສະຫຼຸບການເຄື່ອນໄຫວການປັບປຸງລະບົບຕາຂ່າຍໄຟຟ້າ 22/0,4 ກິໂລໂວນ, ໝໍ້ແປງ ແລະໜໍ້ນັບໄຟທີ່ຖືກຜົນກະທົບຈາກພາຍຸດອກສຸຣິໃນປີ 2017 ທີ່ຜ່ານມາ ແລະ ແຜນການໃນຕໍ່ໜ້າປະຈຳ ປີ 2019 ໃຫ້ໄດ້ຮັບຜົນດີຢ່າງຕໍ່ເນື່ອງຄຸ້ມຄອງການຊື້ການຈຳໜ່າຍພະລັງງານ ແລະພະລັງງານຕົກເຮ່ຍ, ເອົາໃຈໃສ່ຕິດຕາມກວດກາລາຍຈ່າຍຊຸກຍູ້ສົ່ງເສີມເກັບກູ້ໜີ້ສິນຄ່າພະລັງງານໄຟຟ້າ,ຈັດຕັ້ງມອບງົບປະມານເຂົ້າໃຫ້ລັດໃຫ້ຖືກຕ້ອງ ແລະ ທັນຕາມກຳນົດເວລາ,ຈັດຕັ້ງປະຕິບັດກວດກາເຕັກນິກໄຟຟ້າພ້ອມທັງປັບປຸງແກ້ໄຂ ແລະບຳລຸງຮັກສາລະບົບຕາຂ່າຍໄຟຟ້າທັງແຮງດັນກາງ, ຕໍ່າ, ໝໍ້ແປງ ແລະໝໍ້ນັບໄຟເພື່ອຮັບປະກັນການສະໜອງພະລັງງານໄຟຟ້າໄດ້ຢ່າງວ່ອງໄວ ແລະທົ່ວເຖິງ. ພ້ອມນັ້ນຍັງຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີສະບັບເລກທີ  02/ລບ, ລົງວັນທີ 1 ກຸມພາ 2018 ວ່າດ້ວຍການປັບປຸງບັນດາລະບຽບການ ແລະກົນໄກປະສານງານໃນການດຳເນີນທຸລະກິດຢູ່ ສປປ ລາວ( ຂໍ້ 1.4) ແລະ ເອົາໃຈໃສ່ຕິດຕາມກວດກາຢ່າງໄກ້ຊິດຕໍ່ກັບພະນັກງານທີ່ເຮັດໜ້າທີ່ບໍລິການປະຊາຊົນເປັນຕົ້ນແມ່ນການຈົດເລກພະລັງງານໃນໝໍ້ນັບໄຟ.

  ໂອກາດດຽວກັນນັ້ນ ທ່ານ ໂອໄດ ສຸດາພອນ ເຈົ້າແຂວງໆຄຳມ່ວນໄດ້ມອບຫຼຽນໄຊແຮງງານ, ຫຼຽນກາ ແລະໃບຍ້ອງຍໍໃຫ້ແກ່ພະນັກງານໄຟຟ້າແຂວງຫຼຽນ ໄຊແຮງງານຊັ້ນ 2 ມີ 4 ທ່ານ ແລະ 1 ກົມກອງ; ຫຼຽນໄຊແຮງງານຊັ້ນ 3 ມີ 6 ທ່ານ; ຫຼຽນກາແຮງງານມີ 22 ທ່ານ; ໃບຍ້ອງຍໍລັດຖະບານຈຳນວນ 62 ທ່ານໃນການມອບໃບຍ້ອງຍໍຕາງໜ້າພະແນກພາຍໃນແຂວງໄດ້ອ່ານລັດຖະດຳລັດຂອງປະທານປະເທດວ່າດ້ວຍການປະດັບຫຼຽນໄຊແຮງງານຊັ້ນສອງ ແລະດຳລັດຂອງທ່ານນາຍົກລັດຖະມົນຕີວ່າດ້ວຍການປະດັບຫຼຽນກາແຮງງານ ແລະດຳລັດໃນການນມອບໃບຍ້ອງຍໍ.

  ເພື່ອເຮັດໃຫ້ພິທີປະດັບຫຼຽນໄຊ ແລະ ມອບໃບຍ້ອງຍໍມີຄວາມໝາຍຄວາມສຳຄັນທ່ານເຈົ້າແຂວງຍັງໄດ້ໂອ້ລົມຊື້ທິດເຍືອງທາງໃຫ້ແກ່ພະນັກງານທັງໝົດໃຫ້ ສືບຕໍ່ເສີມຂະຫຍາຍມູນເຊື້ອຄວາມສາມັກຄີຈຶ່ງເຮັດໃຫ້ມີຜົນງານຜົນສຳເລັດຊົມເຊີຍທີ່ໃນໄລຍະຜ່ານມາທີ່ໄຟ້າສາມາດແກ້ໄຂທັນຕາມສະພາບການແກ້ໄຂຜົນ ກະທົບຈາກພະຍຸດອກສຸລິເຮັດໃຫ້ປະຊາຊົນຢູ່ເຂດໄດ້ຮັບຜົນກະທົບຈາກພະຍຸກັບມາໄດ້ຊົມໄຊ້ໄຟຟ້າຢ່າງວ່ອງໄວເພື່ອຕອບສະໜອງໃຫ້ທຸກຂົງເຂດວຽກງານ ກັບມາເດິນແມ່ນແລ່ນສະດວກວຽກງານພະລັງງານໄຟຟ້າມີຄວາມສຳຄັນຫລາຍໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງໄດ້ ເປັນຢ່າງດີ.

  ຈາກນັ້ນຕາງໜ້າພະແນກຈັດຕັ້ງຫ້ອງການໄດ້ຂຶ້ນຮັບຄໍາໂອວາດຈາກເຈົ້າແຂວງທີ່ໄດ້ຊີ້ທິດເຍືອງທາງໃຫ້ແກ່ລັດວິສະຫະກິດແຂວງຄຳມ່ວນ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์