ບົວລະພາຮ່ວມເມືອງເຟືອງຈັດກິດຈະກຳປູກຕົ້ນໄມ້

 ເນື່ອງໃນໂອກາດວັນປູກຕົ້ນໄມ້ແຫ່ງຊາດໄດ້ໝູນວຽນມາອີກວາລະໜຶ່ງອາທິດທີ່ຜ່ານມານີ້ຫ້ອງການກະສິກຳ ແລະປ່າໄມ້ເມືອງເຟືອງແຂວງວຽງຈັນໄດ້ສົມທົບກັບຫ້ອງການແຜນການ ແລະ ການລົງທຶນເມືອງ ແລະ ບໍລິສັດບົວລະພາກະສິກໍາ ແລະ ປ່າໄມ້ ຈຳກັດ ໄດ້ຈັດກິດຈະກຳປູກຕົ້ນໄມ້ເນື່ອງໃນວັນທີ 1 ມິຖຸນາ 2019 ວັນປູກຕົ້ນໄມ້ແຫ່ງຊາດຂຶ້ນຢ່າງເປັນທາງການທີ່ໂຮງຮຽນປະຖົມສົມບູນນາຫວ້ານ.

  ໂດຍການເຂົ້າຮ່ວມຂອງທ່ານ ທະວີສັກ ວົງສະຫວ່າງ, ຄະນະປະຈຳພັກເມືອງເຟືອງ, ຫົວໜ້າຫ້ອງການແຜນການ ແລະການລົງທຶນເມືອງ, ມີທ່ານ ກຸຫຼາບ ໄພຍະສານຫົວໜ້າໜ່ວຍງານຫ້ອງກະສິກຳ ແລະປ່າໄມ້ ເມືອງເຟືອງ, ທ່ານ ນາງ ສຸໄພວັນ ທ່ຽງຈັນໄຊ ຮອງອຳນວນການບໍລິສັດບົວລະພາກະສິກໍາ ແລະປ່າໄມ້ ຈຳກັດ,  ມີບັນດາຫົວໜ້າ-ຮອງຫົວໜ້າຫ້ອງການ, ພະນັກງານ-ລັດຖະກອນ, ທະຫານ- ຕຳຫຼວດພາຍໃນເມືອງພ້ອມດ້ວຍນ້ອງນັກຮຽນເຂົ້າຮ່ວມຢ່າງຫຼວງ ຫຼາຍ.

 ທ່ານ ທະວີສັກ ວົງສະຫວ່າງ, ໃຫ້ສຳພາດວ່າ: ປ່າໄມ້ ແລະຊັບພະຍາກອນປ່າໄມ້ແມ່ນຕິດພັນກັບຊີວິດການເປັນຢູ່ຂອງປະຊາຊົນບັນດາເຜົ່າ, ມີຄວາມໝາຍຄວາມສຳຄັນຫຼາຍຕໍ່ກັບການພັດທະນາເສດຖະກິດສັງຄົມແຫ່ງຊາດ, ໃນປະຈຸບັນພັກ-ລັດຖະບານໄດ້ຖືເອົາວຽກງານຄຸ້ມຄອງປົກປັກຮັກສາ ແລະ ພັດທະນາປ່າໄມ້ເປັນວຽກງານຍຸດທະສາດທີ່ສຳຄັນຂອງການພັດທະນາເສດຖະກິດ-ສັງຄົມແຫ່ງຊາດ, ໂດຍເລັ່ງໃສ່ຈັດຕັ້ງປະຕິບັດວຽກງານປົກປັກຮັກສາປ່າໄມ້, ການປູກໄມ້ ແລະຟື້ນຟູປ່າເພື່ອແນ່ໃສ່ໃຫ້ບັນລຸຄາດໝາຍສູ້ຊົນຂອງພັກ-ລັດຖະບານທີ່ວາງໄວ້, ໂດຍສະເພາະແມ່ນການສູ້ຊົນໃຫ້ເນື້ອທີ່ປ່າໄມ້ປົກຫຸ້ມຂອງປ່າໄມ້ກວມເອົາ 70% ຂອງເນື້ອທີ່ທົ່ວປະເທດໃນປີ 2020.

  ທ່ານ ກຸຫຼາບ ໄພຍະສານ ຫົວໜ້າໜ່ວຍງານຫ້ອງກະສິກຳ ແລະປ່າໄມ້ເມືອງເຟືອງກ່າວວ່າ: ສຳລັບຢູ່ ສປປ ລາວເວົ້າສະເພາະກໍ່ຄືເມືອງເຟືອງ, ແຂວງວຽງ ຈັນຂອງພວກເຮົາໃຫ້ຖືເອົາໂອກາດທີ່ມີຄວາມໝາຍຄວາມສຳຄັນດັ່ງກ່າວດຳເນີນໂຄສະນາ, ປູກຈິດສຳນຶກໃຫ້ແກ່ສັງຄົມໄດ້ຮັບຮູ້ເຖີງຜົນປະໂຫຍດ ແລະຄວາມສຳຄັນຂອງປ່າໄມ້ທີ່ເປັນຊັບພະຍາກອນທຳມະຊາດອັນລໍ້າຄ່າທັງເປັນແຫຼ່ງສຶກສາຄົ້ນຄວ້າຊີວະນາໆພັນ. ພ້ອມນັ້ນປ່າໄມ້ຍັງສ້າງອາກາດທີ່ສົດຊື່ນບໍລິສຸດຕໍ່ສິ່ງທີ່ມີຊີວິດ ແລະສ້າງລະບົບນິເວດທີ່ດີຕໍ່ສະພາບແວດລ້ອມໃນໂລກມະນຸດເຮົາຕື່ມອີກ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์