ນັກຮຽນລາວ ຍາດໄດ້ຫຼຽນລາງວັນແຂ່ງຂັນ ດ້ານວິທະຍາສາດທີ່ປະເທດໄທ

ກະຊວງວິທະຍາສາດ ແລະເຕັກໂນໂລຊີ ໃນນາມເປັນຈຸດປະສານງານວຽກງານອາຊຽນດ້ານວິທະຍາສາດເຕັກໂນໂລຊີແລະນະວັດຕະກຳໄດ້ນຳພາຄະນະຜູ້ຕິດຕາມ ແລະນ້ອງນັກຮຽນຈາກໂຮງ ຮຽນ ມສ ວຽງຈັນ ແລະໂຮງຮຽນກຽດຕິສັກທັງໝົດຈຳນວນ 10 ຄົນເຂົ້າຮ່ວມກິດຈະກຳໂຄງການວິທະຍາສາດໜຸ່ມນ້ອຍອາຊຽນບວກສາມ ຫຼື ເອີ້ນວ່າ: ASEAN Plus Three Junior Science Odyssey(APT JSO) ຊຶ່ງເປັນໂຄງການໜຶ່ງທີ່ບັນດາປະເທດສະມາຊິກອາຊຽນພັດປ່ຽນກັນເປັນເຈົ້າ ພາບໃນແຕ່ລະປີ, ໃນປີ 2019 ນີ້ເປັນຄັ້ງທີ 8 ໂດຍແມ່ນຣາຊະອານາຈັກໄທເປັນເຈົ້າພາບຈັດຂຶ້ນໃນລະຫວ່າງວັນທີ 9-15 ມິຖຸນາ 2019 ຜ່ານມາ,ທີ່ແຂວງປະທຸມທານີ ໂດຍປີນີ້ຈັດຂຶ້ນໃນຫົວຂໍ້ບົດບາດຂອງຊາວໜຸ່ມໃນການສື່ສານເອົາວຽກວິທະຍາສາດເຂົ້າໃນການຈັດຕັ້ງປະຕິບັດເປົ້າໝາຍໃນການພັດທະນາແບບຍືນຍົງ” (The Role of Youth in Communicating Science for Sustainable Development Goals(SDGs) Issues in the Regions).

ຈຸດປະສົງຂອງໂຄງການດັ່ງກ່າວແມ່ນເພື່ອຊຸກຍູ້ສົ່ງເສີມໃຫ້ນັກຮຽນເກີດມີຄວາມສົນໃຈກ່ຽວກັບວິທະຍາສາດແລະເຕັກໂນໂລຊີຫຼາຍຂຶ້ນດ້ວຍການກະຕຸ້ນໃຫ້ນັກຮຽນມີຄວາມຢາກຮູ້ ໂດຍຜ່ານການແລກປ່ຽນບົດຮຽນ,ປະສົບການແລະ ການເຮັດທົດລອງຕົວຈິງ,ພ້ອມທັງເປັນການປູກຈິດສຳນຶກໃຫ້ນ້ອງນັກຮຽນມີຄວາມມັກຮັກໃນອາຊີບຕ່າງໆຂອງຂະແໜງການກ່ຽວກັບວິທະຍາສາດ ແລະເຕັກໂນໂລຊີ ໃນອະນາຄົດ.ນອກຈາກນີ້, ຍັງເປັນການສ້າງໂອກາດໃຫ້ນ້ອງນັກຮຽນໄດ້ເສີມສ້າງສາຍພົວພັນ,ມິດຕະພາບທີ່ດີແລະເຂົ້າຮ່ວມບັນດາກິດຈະກຳຕ່າງໆເຊັ່ນ: ນຳສະເໜີຜົນງານປະດິດສ້າງເປັນຂອງຕົນເອງເປັນໂປສເຕີ  (Poster Presentation),ເຮັດທົດລອງຕົວຈິງໃນຫ້ອງທົດລອງ,ຮ່ວມທັດສະນະສຶກສາສະຖານທີ່ວິທະຍາສາດຕ່າງໆ ແລະເຂົ້າຮ່ວມກິດຈະກຳແລກປ່ຽນວັດທະນາທຳຮ່ວມກັນ, ໃນປີ 2019 ນີ້ນອກຈາກນັກຮຽນຈາກບັນດາປະເທດສະມາຊິກອາຊຽນແລ້ວຍັງມີນ້ອງນັກຮຽນຈາກສາມປະເທດຄື: ຈີນ, ຍີປຸ່ນ ແລະສ.ເກົາຫຼີ ເຂົ້າຮ່ວມນຳອີກ.

ຜ່ານການເຂົ້າຮ່ວມແຂ່ງຂັນບັນດາກິດຈະກຳຄັ້ງນີ້ນ້ອງນັກຮຽນຈາກ ມສ ວຽງຈັນສາມາດຍາດໄດ້ຫຼຽນເງິນ1ຫຼຽນຈາກການນຳສະເໜີໂພສເຕີ,ໂຮງຮຽນກຽດຕິສັກໄດ້ຫຼຽນທອງແດງ1ຫຼຽນຈາກການເຮັດທົດລອງໃນຫ້ອງປະຕິບັດການ,ຕາງໜ້າຈາກ ມສ ວຽງຈັນ ແລະໂຮງຮຽນກຽດຕິສັກໄດ້ຮັບຫຼຽນທອງຄົນລະ 1 ຫຼຽນຈາກການເຮັກວຽກເປັນກຸ່ມຮ່ວມກັບປະເທດອື່ນແລະຕາງໜ້າຈາກໂຮງຮຽນກຽດຕິສັດໄດ້ຮັບລາງວັນກຽດຕິຍົດ 1ລາງວັນ.

ພາບ ແລະຂາ່ວໂດຍ: ໜສືພິມເສດຖະກິດ-ສັງຄົມ

แชร์