5 ປີ ຫຼວງນໍ້າທາ ມີລາຍຮັບຈາກການທ່ອງທ່ຽວ 1,24 ພັນຕື້ກີບ

ປະຈຸບັນວຽກງານການທ່ອງທ່ຽວຢູ່ ສປປ ລາວ ໄດ້ມີການຂະ ຫຍາຍຕົວໄວວາອັນໄດ້ສ້າງລາຍຮັບມະຫາສານປະກອບສ່ວນໃນການພັດທະນາເສດຖະກິດ-ສັງຄົມຂອງປະເທດກໍຄືຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ,ສໍາລັບແຂວງຫຼວງນໍ້າທາກໍມີສະຖານທີ່ຢາງຫຼວງຫຼາຍບໍ່ວ່າຈະເປັນແຫຼ່ງທ່ອງທ່ຽວທໍາມະຊາດ,ປະຫວັດສາດ ແລະວັດທະນະທໍາ, ຊຶ່ງໃນ 5ປີຜ່ານມາມີນັກທ່ອງທ່ຽວເຂົ້າມາທັງໝົດ 2,93 ລ້ານເທື່ອຄົນ, ສາມາດສ້າງລາຍຮັບໄດ້ 147 ລ້ານ ໂດລາ ຫຼື ປະມານ 1,24 ພັນຕື້ກີບ.

ອີງຕາມຂໍ້ມູນຈາກພະແນກຖະແຫຼງຂ່າວວັດທະນະທໍາ ແລະທ່ອງ ທ່ຽວແຂວງຫຼວງນໍ້າທາໃຫ້ຮູ້ວ່າ:ແຂວງຫຼວງນໍ້າທາມີສະຖານທີ່ທ່ອງທ່ຽວທາງທໍາມະຊາດ, ປະຫວັດ ສາດແລະວັດທະນະທໍາສໍາຄັນຫຼາຍແຫ່ງເປັນຕົ້ນແມ່ນວັດຫຼວງບ້ານ ຊຽງໃຈ, ພະທາດຊຽງຕຶງ,ພະທາດ ເມືອງສິງ,ເຮືອນພະຍາເຊກອງສະຫງວນແຫ່ງຊາດນໍ້າຫ້າ,ຖໍ້າເກົ່າວຽງພູຄາ,ບ້ານຊົນເຜົ່າຍວນ,ຕະຫຼາດກາງຄືນ ແລະສະຖານທີ່ອື່ນໆ,ຊຶ່ງຜ່ານມາແຂວງຫຼວງນໍ້າທາ ໄດ້ປົກປັກຮັກສາ, ພັດທະນາ ແລະສົ່ງເສີມການທ່ອງທ່ຽວເຊື່ອມຕໍ່ບັນດາແຂວງພາກເໜືອ ແລະອະນຸພາກ ພື້ນ, ສົ່ງເສີມພາກເອກະຊົນລົງທຶນເຂົ້າໃນກິດຈະການທ່ອງທ່ຽວເຊັ່ນ:ໂຮມແຮມ,ຣີສອດ,ເຮືອນພັກ,ພັດຕະຄານ, ຮ້ານອາຫານ, ຮ້ານກິນດື່ມ,ຮ້ານບັນເທີງ, ສະຖານທີ່ທ່ອງທ່ຽວແລະທຸລະກິດທ່ອງທ່ຽວມູນຄ່າ 164 ຕື້ກີບ.

ປະຈຸບັນທົ່ວແຂວງມີໂຮງແຮມ,ຣີຊອດແລະເຮືອນພັກ 107 ຫົວ ໜ່ວຍ, ມີພັດຕະຄານ,ຮ້ານອາຫານ,ຮ້ານບັນເທິງ ແລະຮ້ານກິນດື່ມ 21ຫົວໜ່ວຍ, ມີບໍລິສັດທ່ອງທ່ຽວ7ຫົວໜ່ວຍ ແລະ1ສາຂາ, ມີ 21ໜ່ວຍບໍລິການນໍາທ່ຽວ, ຂຶ້ນບັນຊີ ແຫຼ່ງທ່ອງທ່ຽວ109 ແຫ່ງ, ໃນນີ້ ແຫຼ່ງທ່ອງທ່ຽວທໍາມະຊາດ 55 ແຫ່ງ,ວັດທະນະທໍາ 44 ແຫ່ງ ແລະປະຫວັດສາດ10 ແຫ່ງ,ບ້ານມີສ່ວນຮ່ວມກັບການທ່ອງທ່ຽວ 65 ບ້ານ,ບ້ານບໍລິການພັກແຮມ 22 ບ້ານ, ເກັບເງິນກອງທຶນການທ່ອງທ່ຽວໄດ້ 2,52 ແສນກວ່າໂດລາ.ສະເພາະ5 ປີ ຜ່ານມາມີນັກທ່ອງທ່ຽວເຂົ້າມາແລະຜ່ານແຂວງຫຼວງນໍ້າທາ 2,93 ລ້ານເທື່ອຄົນສ້າງລາຍຮັບທາງກົງ ແລະທາງອ້ອມໄດ້ 147ລ້ານໂດລາສະຫະລັດ ຫຼື ປະມານ 1,24 ພັນຕື້ກີບ.

ພາບ  ແລະຂາ່ວໂດຍ: ໜັງສືພິມເສດຖະກິດ-ສັງຄົມ

แชร์