ໂຮງງານຜະລິດລິບລາວ ພ້ອມຜະລິດສະໜອງຕະຫຼາດ

   ໂຮງງານຜະລິດລິບລາວຖືວ່າເປັນແຫ່ງທຳອິດໃນການຜະລິດອຸດສາຫະກຳ ແລະທັນສະໄໝຂອງລາວທີ່ໄດ້ນຳໃຊ້ປະກອບສ່ວນດ້ານເຕັກໂນໂລຊີຈາກເອີຣົບ ແລະ ມໍເຕີສັ່ງຈາກປະເທດອິຕາລີ, ລະບົບປະຕູຈາກປະເທດສະເປນ ແລະ ລະບົບຄວບຄຸມລິບຂຶ້ນ-ລົງເປັນເຕັກໂນໂລຊີຈາກປະເທດຝຣັ່ງປະຈຸບັນແມ່ນມີຄວາມພ້ອມຕອບສະໜອງສັງຄົມແລ້ວ 100% ແລະ ຍັງມີແຜນຝຶກອົບຮົມຄວາມຮູ້ພື້ນຖານໃຫ້ແກ່ນັກສຶກສາ ແລະ ພັດທະນາຍົກລະດັບຄວາມຮູ້ບຸກຄະລາກອນເພື່ອໃຫ້ການຜະລິດຢູ່ບ້ານເຮົາກ້າວຂຶ້ນສູ່ສາກົນ.

  ທ່ານ ສີສະຫຼຽວ ສະແຫວງສຶກສາ ປະທານໂຮງງານຜະລິດລິບລາວຈຳກັດໄດ້ກ່າວວ່າ: ປະຈຸບັນການຂະຫຍາຍຕົວພັດທະນາເສດຖະກິດ-ສັງຄົມປະເທດເຮົາມັບມື້ກຳເນີດເຊື່ອມໂຍງຂຶ້ນສູງສະນັ້ນຈິ່ງໄດ້ສ້າງຕັ້ງໂຮງງານຜະລິດລິບລາວແຫ່ງນີ້ເພື່ອຕອບສະໜອງໃຫ້ແກ່ຕຶກ,ອາຄານໃນປະເທດເຮົາໃຫ້ເປັນທີ່ຍອມຮັບຂອງສັງຄົມໂດຍເອົາປັດໃຈປັນຍາເສີມສ້າງຈາກ ທ່ານ ພູວົງ ສີຫາປັນຍາ ຜູ້ທີ່ນຳເອົາຄວາມຮູ້ມາຮ່ວມພັດທະນາສ້າງແນວຄິດລົງທຶນເປັນໂຮງງານຜະລິດລິບລາວແຫ່ງທຳອິດໃນລາວຊຶ່ງທ່ານເອງເປັນນັກວິສະວະກອນທີ່ມີປະສົບການເຮັດວຽກກັບການຜະລິດລິບຫຍີ່ຫໍ້ໂອເລໂອດິນທີ່ປະເທດຝຣັ່ງຫຼາຍກວ່າ 30 ປີ ນອກນີ້ທ່ານຍັງເຄີຍເປັນຜູ້ອຳນວຍການໂຮງງານຜະລິດລິບໂອເລໂອດິນລາວ-ເອເຊຍທີ່ປະເທດໄທອີກ 10 ກວ່າປີ ປະຈຸບັນໂຮງງານຜະລິດ ລິບລາວແມ່ນມີບຸກຄະລາກອນຕາມໂຄງຮ່າງການຈັດຕັ້ງຄົບຖ້ວນແລ້ວລວມທັງອາຄານຕາມມາດຕະຖານຄືກັນກັບໂຮງງານລິບຢູ່ຕ່າງປະເທດບໍ່ວ່າຈະເປັນເຄື່ອງຈັກ, ອຸປະ ກອນເຄື່ອງມືທຸກດ້ານແມ່ນມີຄວາມພ້ອມແລ້ວ 100%.

  ສຳລັບຄວາມສາມາດດ້ານເຕັກນິກຂອງໂຮງງານແມ່ນພ້ອມຜະລິດຕາມສັ່ງຮູບຊົງທຸກຂະໜາດຕາມທີ່ລູກຄ້າຕ້ອງການບ່ໍວ່າຈະເປັນລິບ, ຂັ້ນໄດເລື້ອນ, ຕັ່ງຍົກສຳລັບຄົນພິການ ແລະຜູ້ສູງອາຍຸນອກນັ້ນໄດ້ຜະລິດມໍເຕີລູກທ່ວງນ້ຳໜັກ, ໂອປາຣາເຕີປະຕູ ແລະ ວຽກງານອື່ນໆ ໂດຍວ່າງເປົ້າສະໜອງການຜະລິດໃຫ້ພຽງພໍຕາມສັ່ງຊື້ຂອງລູກຄ້າໃນໄລຍະຜ່ານມາໂຮງງານຜະລິດລິບລາວແມ່ນໄດ້ຜະລິດລິບສະໜອງໃຫ້ແກ່ຕຶກ,ອາຄານຕ່າງໆຫຼາຍແຫ່ງໃນນະຄອນຫຼວງວຽງຈັນ ແລະເມືອງວັງວຽງ ເຊັ່ນ: ລິບແກ້ວທີ່ອາຄານ 6 ຊັ້ນ ກະຊວງແຜນການ ແລະການລົງທຶນ, ອາຄານໂຮງໝໍ 103, ອາຄານໂຮງແຮມສິມມາແຄມຂອງ, ອາ ຄານໂຮງແຮມລັດສະໝີ, ອາຄານລັດວິສາຫະກິດໄປສະນີລາວທີ່ສາຍລົມ ແລະໂຮງແຮມລີຊາແກຣນທີ່ວັງວຽງ ແລະແຫ່ງອື່ນໆ.

  ທ່ານ ສີສະຫຼຽວ ສະແຫວງ ສຶກສາໄດ້ກ່າວຕື່ມອີກວ່າ: ໂຮງງານຜະລິດລິບລາວເປັນເຄື່ອງມືອຸດສາຫະກຳຜະລິດຕະພັນຂອງຄົນລາວໃນຕໍ່ໜ້າພວກເຮົາໄດ້ວ່າງແຜນຈະຈັດຝຶກອົບຮົມໃຫ້ແກ່ນັກສາໃນບັນດາວິທະຍາໄລຕ່າງໆເນື່ອງຈາກວ່າຄວາມຮູ້ປະສົບການດ້ານນີ້ເປັນຄວາມຮູ້ທີ່ຊອກຫາຍາກຢູ່ໃນປະເທດເຮົາ ສະນັ້ນເພື່ອສົ່ງເສີມໃຫ້ເຂົາເຈົ້າມີວິຊາຄວາມຮູ້ ແລະຊ່ວຍພັດທະນາບຸກຄະລາກອນຮູ້ພື້ນຖານທາງດ້ານເອເລັກໂຕນິກກ້າວຂຶ້ນສູ່ສາກົນ.

ຂຽນໂດຍ: ແພງຕາ

แชร์