ຫາລືຕິດຕາມຄວາມປອດໄພຂອງເຂື່ອນ ແລະແຜນຮອງຮັບສຸກເສີນ

 ວັນທີ14 ມິຖຸນາຜ່ານມາທີ່ນະຄອນຫຼວງວຽງຈັນ ບໍລິສັດໄຟຟ້ານ້ຳເທີນ 2 ຮ່ວມກັບກົມຄຸ້ມຄອງພະລັງງານກະຊວງພະລັງງານ ແລະບໍ່ແຮ່ໄດ້ຈັດກອງປະຊຸມຖອດຖອນບົດຮຽນກ່ຽວກັບການບໍລິຫານຈັດການອ່າງນ້ຳ ແລະການຜະລິດພະລັງງານໃນຊຸມປີຜ່ານມາຂອງເຂື່ອນໄຟຟ້ານ້ຳຕົກ ສປປ ລາວ ຄັ້ງທີ 1 ໂດຍການເປັນປະທານຂອງທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານແລະບໍ່ແຮ່, ມີທ່ານ ໂອລິວີເຢດິດຣີ ອຳນວຍການໃຫຍ່ບໍລິສັດໄຟຟ້ານ້ຳເທີນ 2, ມີບັນດາບໍລິສັດທີ່ດຳເນີນໂຄງການເຂື່ອນໄຟຟ້າ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ກອງປະຊຸມດັ່ງກ່າວເພື່ອແນໃສ່ການແລກປ່ຽນບົດຮຽນ ແລະການປຶກສາຫາລືໃນຫຼາຍຫົວຂໍ້ເຊັ່ນ: ການຕິດຕາມກວດກາຄວາມປອດໄພຂອງເຂື່ອນ, ການບໍລິຫານຈັດການນ້ຳ, ອຸທົກກະສາດ, ອຸຕຸນິຍົມ, ລະບົບການສື່ສານການປ່ອຍນ້ຳ ແລະ ແຜນຮອງຮັບກໍລະນີສຸກເສີນ, ນອກນັ້ນຍັງເປັນໂອກາດດີໃຫ້ບັນດາໂຄງການເຂື່ອນຕ່າງໆໄດ້ແລກປ່ຽນປະສົບການ ແລະຍົກບັນຫາຕ່າງໆທີ່ຕິດພັນກັບການຜະລິດໃນຫຼາຍໆສະຖານະການ, ໜຶ່ງໃນຫົວຂໍ້ທີ່ສຳຄັນແມ່ນການສ້າງລະບົບການສື່ສານລະຫວ່າງບໍລິສັດ ແລະ ລັດຖະບານໂດຍສະເພາະແມ່ນອຳນາດການປົກຄອງທ້ອງຖິ່ນເພື່ອຮັບປະກັນການສົ່ງຂໍ້ມູນໃຫ້ຊຸມຊົນທັນຕໍ່ສະພາບ ການເພື່ອກຽມພ້ອມຖ້າມີກໍລະນີສຸກເສີນ.

  ທ່ານ ຄຳມະນີ ອິນທິລາດ ກ່າວວ່າ: ຍຸດທະສາດເພື່ອພັດທະນາອຸດສາຫະກຳພະລັງງານໄຟຟ້າແມ່ນສຸມໃສ່ຂຸດຄົ້ນທ່າແຮງບົ່ມຊ້ອນແຫຼ່ງນ້ຳທຳມະຊາດເພື່ອ ຜະລິດ ແລະສະໜອງກະແສໄຟຟ້າໃຫ້ພຽງພໍກັບຄວາມຕ້ອງການເພື່ອຊົມໃຊ້ພາຍໃນຕິດພັນກັບການສົ່ງອອກບົນພື້ນຖານຮັບປະກັນການພັດທະນາພະລັງ ງານໄຟຟ້າແບບເປັນມິດກັບສິ່ງແວດລ້ອມ, ຜະລິດພະລັງງານສະອາດ ແລະ ມີລັກສະນະຍືນຍົງຊຶ່ງປະຈຸບັນ ສປປ ລາວ ມີແຫຼ່ງຜະລິດພະລັງງານໄຟຟ້າແລ້ວ 63 ແຫ່ງລວມກຳລັງຕິດຕັ້ງ 7 ພັນກວ່າເມກາວັດ, ສາມາດຜະລິດພະລັງງານໄຟຟ້າໄດ້ 37.366 ກິກາວັດໂມງຕໍ່ປີໃນນີ້ມີເຂື່ອນຂະໜາດກາງຫາຂະໜາດໃຫຍ່ 32 ເຂື່ອນ, ເຂື່ອນຂະໜາດນ້ອຍ 15 ເມກາວັດລົງມາ 21 ເຂື່ອນ.

  ທ່ານ ຄຳມະນີ ອິນທິລາດກ່າວຕື່ມວ່າ: ການທີ່ພວກເຮົາມາຮ່ວມກັນໃນກອງປະຊຸມຄັ້ງນີ້ແມ່ນເພື່ອຊອກຫາວິທີຄຸ້ມຄອງເຂື່ອນໄຟຟ້ານ້ຳຕົກໃຫ້ມີຄວາມປອ ດໄພເພື່ອເຮັດໃຫ້ມີການພັດທະນາເຂື່ອນໄຟຟ້ານ້ຳຕົກໃນລາວໃຫ້ມີຄວາມຍືນຍົງ, ສະນັ້ນຈຶ່ງຮຽກຮ້ອງໃຫ້ຜູ້ດຳເນີນໂຄງການຕ້ອງປະຕິບັດຕາມກົດລະບຽບ ທີ່ກ່ຽວຂ້ອງກັບຄວາມປອດໄພຂອງເຂື່ອນເພື່ອຜົນປະໂຫຍດສ່ວນລວມ ແລະ ການພັດທະນາໂຄງການເຂື່ອນໄຟຟ້ານ້ຳຕົກໃຫ້ເປັນແບບຢ່າງທີ່ດີໃນດ້ານສັງ ຄົມ ແລະສິ່ງແວດລ້ອມ.

ຂຽນໂດຍ: ສະເຫຼີມໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์