ສູນວັດທະນະທຳເດັກ ໄຊສົມບູນ ຮັບເຄື່ອງຊ່ວຍເຫຼືອ

 ສູນວັດທະນະທຳເດັກພະແນກຖະແຫຼງຂ່າວວັດທະນະທໍາແລະທ່ອງທ່ຽວ (ຖວທ) ແຂວງໄຊສົມບູນໄດ້ຮັບເຄື່ອງຊ່ວຍເຫຼືອດ້ານສິລະປະດົນຕີ,ຊຶ່ງເປັນປະເພດເຄື່ອງສຽງຈຳນວນ 1ຊຸດລວມມູນຄ່າ 10 ລ້ານກວ່າກີບຈາກທ່ານເຈົ້າແຂວງ.

ການມອບ-ຮັບເຄື່ອງຊ່ວຍເຫຼືອດັ່ງກ່າວມີຂຶ້ນໃນວັນທີ 13 ມິຖຸນາ 2019, ໂດຍການກ່າວມອບຂອງ ທ່ານ ພົນຕີຄຳລຽງອທະໄກສອນເຈົ້າແຂວງໄຊສົມບູນແລະກ່າວຮັບໂດຍທ່ານສົມດາວີຄຳເມືອງຄູນຮອງຫົວໜ້າພະແນກຖວທ ແຂວງ, ມີການນຳແຂວງ,ພາກສ່ວນທີ່ກ່ຽວຂ້ອງ ແລະພະນັກງານພາຍໃນພະແນກ ຖວທ ເຂົ້າຮ່ວມເປັນສັກຂີພິຍານ.

ການມອບເຄື່ອງສຽງດັ່ງກ່າວແມ່ນເພື່ອເປັນການຊຸກຍູ້ໃຫ້ສູນວັດທະນະທຳເດັກພະແນກ ຖວທ ແຂວງ ໄຊສົມບູນໄດ້ຝຶກແອບສິລະປະແລະອຳນວຍຄວາມສະດວກໃນການເຄື່ອນໄຫວວຽກງານເພື່ອຮັບໃຊ້ສັງ ຄົມໃຫ້ໄດ້ເຕັມສ່ວນ,ພ້ອມນີ້ຍັງເປັນການສົ່ງເສີມນ້ອງນ້ອຍນັກຮຽນ ແລະຊາວໜຸ່ມ-ເຍົາວະຊົນ ໂດຍສະ  ເພາະແມ່ນຜູ້ທີ່ມີພອນສະຫວັນຫັນມາຫຼິ້ນສິລະປະໃຫ້ຫຼາຍຂຶ້ນເພື່ອຫຼີກ ລຽງສິ່ງເສບຕິດ ແລະກ້າສະແດງຄວາມສາມາດຂອງຕົນອອກສູ່ສັງ ຄົມ. ເຄື່ອງສຽງທີ່ນຳມາມອບໃນຄັ້ງນີ້ປະກອບມີ:ຕູ້ລຳພົງ 4 ໜ່ວຍ, ແອັມ 500 ວັດ 1  ໜ່ວຍ ແລະໄມໂຄໂຟນ 1 ຄູ່ ລວມມູນຄ່າ 10  ລ້ານກວ່າກີບ.

ໂອກາດດັ່ງກ່າວທ່ານສົມດາວີຄຳເມືອງຄູນໄດ້ສະແດງຄວາມຂອບໃຈແລະຮູ້ບຸນຄຸນມາຍັງທ່ານເຈົ້າແຂວງພ້ອມດ້ວຍຄອບຄົວທີ່ມີຄວາມເປັນຫ່ວງເປັນໄຍແລະໄດ້ນຳເອົາເຄື່ອງສຽງມາມອບໃຫ້ສູນວັດທະນະທຳເດັກພະແນກຖວທ ແຂວງໃນຄັ້ງນີ້ ແລະສັນຍາວ່າຈະນຳໃຊ້ເຄື່ອງສຽງດັ່ງກ່າວໃຫ້ເກີດປະໂຫຍດສູງສຸດ ໂດຍສະເພາະແມ່ນການເຄື່ອນໄຫວວຽກງານຂອງສູນວັດທະທຳເດັກ.

ໃນໂອກາດທີ່ມາມອບເຄື່ອງສຽງໃນຄັ້ງນີ້ທ່ານເຈົ້າແຂວງພ້ອມດ້ວຍຄະນະຍັງໄດ້ຮັບຊົມການສະ ແດງສິລະປະຈາກນ້ອງນ້ອຍໃນສູນວັດທະນະທຳເດັກດ້ວຍຄວາມເບີກບານມ່ວນຊື່ນ.

ຂ່າວໂດຍ: ໜັງສືພີມເສດຖະກິດ-ສັງຄົມ 

แชร์