ຈັບ 2 ສ່ຽວສົ່ງຢາບ້າແສນກວ່າເມັດ

  ໃນວັນທີ 8 ມິຖຸນາ 2019 ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງສະຫວັນນະເຂດ ໄດ້ຮັບແຫຼ່ງຂ່າວຈາກພົນລະເມືອງ ດີວ່າ: ມີກຸ່ມຄົນບໍ່ດີຈຳນວນໜຶ່ງກຳລັງເຄື່ອນໄຫວຊື້-ຂາຍຢາເສບຕິດ (ຢາບ້າ) ຢູ່ຂອບເຂດບ້ານສະໜູນໄຊ ເມືອງພະລານໄຊແຂວງສະຫວັນນະເຂດ, ຊຶ່ງໃຊ້ລົດຈັກເປັນພາຫານະໃນການນຳສົ່ງ, ເມື່ອໄດ້ຮັບແຫຼ່ງຂ່າວຄືແນວນັ້ນ, ທາງເຈົ້າໜ້າທີ່ກອງບັນຊາການ ປກສ ແຂວງຈິ່ງໄດ້ຈັດຕັ້ງກຳລັງວິຊາສະເພາະລົງມ້າງລາຍຄະດີດັ່ງກ່າວ.

  ຈົນຕົກມາຮອດເວລາ 15:00 ໂມງ ຂອງມື້ຕໍ່ມາຈິ່ງສາມາດກັກຕົວເປົ້າໝາຍໄດ້ 2 ຄົນຄື: ທ້າວ ແຕງອ່ອນ ອາຍຸ 19 ປີ, ອາຊີບເຮັດນາ ແລະ ທ້າວ ຄຳພອງ ອາຍຸ 19 ປີ, ອາຊີບເຮັດນາ, ທັງສອງຄົນແມ່ນຢູ່ບ້ານສະໜູນໄຊ ເມືອງພະລານໄຊ ແຂວງສະຫວັນນະເຂດ ພ້ອມຢຶດຂອງກາງຢາເສບຕິດ (ຢາບ້າ) ຈຳນວນ 58 ມັດ, ເທົ່າກັບ 1,16 ແສນເມັດ, ລົດຈັກ 3 ຄັນ ແລະໂທລະສັບ 1 ໜ່ວຍ.

   ຜ່ານການສຶບສວນ-ສອບສວນເບື້ອງຕົ້ນພວກກ່ຽວໃຫ້ການຮັບສາລະພາບວ່າ: ຢາບ້າຈຳນວນດັ່ງກ່າວແມ່ນຮັບມາຈາກຜູ້ທີ່ຮ່ວມຂະບວນການຢູ່ບ້ານດຽວ ກັນເພື່ອເອົາໄປສົ່ງຂາຍໃຫ້ເຖົ້າແກ່ທີ່ສັງຊື້, ບໍ່ຮູ້ລາຄາ, ຖ້າຫາກສົ່ງຂາຍສຳເລັດຈະໄດ້ຮັບຄ່າຈ້າງຜູ້ລະປະມານ 5 ແສນກີບ, ສ່ວນເຈົ້າຂອງຢາບ້າແມ່ນຫຼົບໜີໄດ້ທັນ, ປະຈຸບັນທາງເຈົ້າໜ້າທີ່ຍັງສືບຕໍ່ຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์