ຫຼວງນໍ້າທາ ຈັດງານປີທ່ອງທ່ຽວລາວ-ຈີນ 2019

  ວັນທີ 10 ມິຖຸນາ 2019 ແຂວງຫຼວງນໍ້າທາຮ່ວມກັບກຸ່ມບໍລິສັດພັດທະນາເສດຖະກິດພິເສດບໍ່ເຕ່ນລາວຈຳກັດຈັດງານປີທ່ອງທ່ຽວລາວ-ຈີນ 2019 ຂຶ້ນຢ່າງເປັນທາງການຢູ່ທີ່ບໍ່ເຕ່ນແດນງາມ ແລະເປີດກອງປະຊຸມນໍາສະເໜີແລກປ່ຽນຂ້າມແດນຢູ່ທີ່ໂຮງແຮມຈິງລານ, ເຂດພັດທະນາເສດຖະກິດພິເສດບໍ່ ເຕ່ນແດນງາມ, ເປັນກຽດເຂົ້າຮ່ວມຂອງທ່ານເພັດຖາວອນ ພິລາວັນເຈົ້າແຂວງຫຼວງນໍ້າທາ, ມີເຈົ້າ ແຂວງອຸດົມໄຊ,ແຂວງບໍ່ແກ້ວ,ຮອງເຈົ້າແຂວງຜົ້ງສາລີ,ຜູ້ຕາງໜ້າຈາກກະຊວງ ຖວທ, ທ່ານ ໂຈກຸນປະບໍລິສັດເຂດພັດທະນາເນດຖະກິດພິເສດບໍ່ເຕັ່ນແດນງາມ, ຫົວໜ້າພະແນກຖວທ 4 ແຂວງ, ປະທານບໍລິ ສັດ 12  ປັນນາ, ທ່ານ ເຄນທອງສີສຸວົງຄະນະກໍາມະການຮ່ວມມືລາວ-ຈີນ, ມີກຸ່ມບໍລິສັດສະມາຄົມທ່ອງ ທ່ຽວລາວ-ຈີນແລະແຂກຖືກເຊີນຈາກພັກລັດ-ພາກທຸລະກິດທັງສອງ ຝ່າຍເຂົ້າຮ່ວມ.

ທ່ານ ເພັດຖາວອນພິລາວັນກ່າວວ່າ:ການຈັດງານປີທ່ອງທ່ຽວລາວ-ຈີນ 2019 ແລະກອງປະຊຸມນໍາສະເໜີແລກປ່ຽນຂ້າມແດນໃນຄັ້ງນີ້,ເປັນຂີດໝາຍທີ່ສຳຄັນຍິ່ງໃນການປຸກລະດົມກຳລັງແຮງຂອງທົ່ວສັງຄົມເຂົ້າໃນການສົ່ງເສີມ ແລະພັດທະນາການທ່ອງທ່ຽວໃຫ້ກາຍ ເປັນຂະແໜງບຸລິມະສິດໃນການພັດ ທະນາເສດຖະກິດ-ສັງຄົມຂອງ ແຂວງ, ສະແດງເຖິງຄວາມສາມັກຄີເປັນປຶກແຜ່ນ,ຄວາມພ້ອມພຽງຮຽງໜ້າຂອງຊາວແຂວງຫຼວງນໍ້າທາທຸກຖ້ວນໜ້າ,  ເປັນການສົ່ງເສີມຂະຫຍາຍທ່າແຮງການທ່ອງທ່ຽວທາງທຳມະຊາດ,ວັດທະນະທຳແລະປະຫວັດສາດເພຶ່ອສືບຕໍ່ດຶງດຸດໃຫ້ ນັກທ່ອງທ່ຽວທັງພາຍໃນ ແລະຕ່າງ ປະເທດ ໂດຍສະເພາະນັກທ່ອງທ່ຽວຈາກ  ສປ ຈີນ ໃຫ້ເຂົ້າມາທ່ອງທ່ຽວຢູ່ແຂວງຫຼວງນໍ້າທາ ແລະເຂດພັດທະນາເສດພິບໍ່ເຕ່ນແດນງາມຫຼາຍ ຂຶ້ນ.

ການຈັດງານປີທ່ອງທ່ຽວລາວ-ຈີນ 2019 ແລະກອງປະຊຸມນໍາສະເໜີແລກປ່ຽນຂ້າມແດນ.ເປັນກິດ ຈະກຳ ແລະຂະບວນການທີ່ສຳຄັນທີ່ສຸດ,ເພື່ອສົ່ງເສີມການທ່ອງທ່ຽວ ລາວ-ຈີນ, ການປົກປັກຮັກສາທຳ ມະຊາດອັນສວຍສົດງົດງາມ, ອະນຸລັກວັດທະນະທຳທີ່ເປັນເອກະລັກແລະຮີດຄອງປະເພນີອັນດີງາມ ຂອງສອງພັກ-ລັດຍັງເປັນການສ້າງບັນຍາກາດທີ່ເອື້ອອຳນວຍໃຫ້ ແກ່ການໄປມາຫາສູ່, ແລກປ່ຽນບົດ ຮຽນ ແລະຈຳໜ່າຍສິນຄ້າທີ່ເປັນ ຜະລິດຕະພັນໃນທ້ອງຖິ່ນ, ເພື່ອຊຸກຍູ້ການພັດທະນາເສດຖະກິດຂອງ ແຂວງ ແລະສ້າງລາຍຮັບທາງກົງ ແລະທາງອ້ອມໃຫ້ບັນດາຂະແໜງ ການທ້ອງຖິ່ນ ແລະຄອບຄົວ.ຈະເປັນການກະຕຸກຊຸກຍູ້ແນວຄິດຈິດໃຈຂອງປະຊາຊົນບັນດາເຜົ່າພາຍໃນແຂວງຫຼວງນໍ້າທາເພື່ອສືບຕໍ່ພັດທະນາ ແລະສົ່ງເສີມການທ່ອງທ່ຽວແຂວງ, ທັງເປັນການແລກປ່ຽນວັດທະນະທຳແລະປີທ່ອງທ່ຽວ ລາວ-ຈີນ 2019 ທີ່ເຂດພັດທະນາເສດຖະກິດສະເພາະບໍ່ເຕ່ນ, ແມ່ນ ການສົ່ງເສີມຕໍ່ຍອດໃນການຈັດຕັ້ງ ປະຕິບັດການຮ່ວມມືໜຶ່ງແລວທາງໜຶ່ງເສັ້ນທາງລະຫວາງລາວ-ຈີນ ຕາມນະໂຍບາຍຂອງສອງພັກ-ສອງລັດຖະບານເຂົ້າໃນການຈັດຕັ້ງປະ ຕິບັດມະຕິກອງປະຊຸມໃຫ່ຍຄັ້ງທີ່ X ຂອງພັກກໍ່ຄືຂອງບັນດາແຂວງໃນທົ່ວປະເທດ ແລະການເປີດປີທ່ອງ ທ່ຽວລາວ-ຈີນ 2019 ແມ່ນສ່ອງ ແສງໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອຍາວນານ ແລະການຮ່ວມມືແບບຄູ່ຮ່ວມຍຸດທະສາດ ຮອບດ້ານ, ໜັ້ນຄົງ, ຍາວນານຕາມທິດ 4  ດີຄື:  ເປັນເພື່ອນບ້ານໃກ້ຄຽງທີ່ດີ, ເປັນເພື່ອນມິດທີ່ດີ, ເປັນສະ ຫາຍທີ່ດີ ແລະເປັນຄູຮ່ວມມືທີ່ດີ, ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ.

ການເປີດປີທ່ອງທ່ຽວລາວ-ຈີ 2019  ຖືເປັນກິດຈະກຳໜຶ່ງໃນການ ເພີ່ມທະວີການພົວພັນມິດຕະພາບ ແລະຄວາມເຂົ້າອົກເຂົ້າໃຈເຊິ່ງກັນ ແລະກັນ ຂອງປະຊາຊົນທັງສອງປະເທດ ແລະຈະເປັນໂອກາດທີ່ດີໃນ ການດຶງດູດນັກທ່ອງທ່ຽວຈາກທຸກມຸມໂລກໄດ້ມາຢ້ຽມຢາມ, ທ່ອງ ທ່ຽວ, ສຳພັດສະຖານທີ່ທ່ອງທ່ຽວດ້ານຕ່າງໆຂອງລາວ-ຈີນ, ເວົ້າລວມເວົ້າສະເພາະບັນດາແຂວງ ພາກເໜືອຂອງ ສປປ ລາວ ກັບແຂວງຢູນນານແຫ່ງ ສປ ຈີນ ທີ່ມີ ຄວາມຫຼາກຫຼາຍ, ໄດ້ຮັບຮູ້ ແລະ ເຂົ້າໃຈຕໍ່ສະພາບຄວາມເປັນຈິງທາງດ້ານການພັດທະນາເສດຖະ ກິດ-ສັງຄົມຂອງສອງປະເທດລາວ-ຈີນ, ຈີນລາວຫຼາຍຂຶ້ນກວ່າເກົ່າ.

ໃນງານດັ່ງກ່າວຫົວໜ້າພະແນກຖວທ 4 ແຂວງພາກເໜືອຄື: ຫຼວງນໍ້າທາ, ບໍ່ແກ້ວ, ອຸດົມໄຊ ແລະແຂວງຜົ້ງສາລີ,ຍັງໄດ້ເຊັນສັນຍານຳກຸ່ມບໍລິສັດທ່ອງທ່ຽວ ສປ ຈີນ, ກ່ຽວກັບການຮ່ວມມືກາທ່ອງທ່ຽວ.ກິດຈະກຳໃນການຈັດປີທ່ອງທ່ຽວລາວ-ຈີນ 2019 ໃນຄັ້ງນີ້,ມີການສະແດງສິນລະປະວັນນະຄະດີຂອງສອງຊາດ,ວາງສະແດງສີນຄ້າເອກະລັກ 4 ແຂວງພາກເໜືອ, ກໍ່ກອງໄຟ, ປ່ອຍໂຄມໄຟ ແລະງານລ້ຽງດ້ວຍບັນຍາກາດຄຶກຄືນມ່ວນຊື່ນ.

ພາບ ແລະຂາ່ວໂດຍ:  ໜັງສືພິມເສດຖະກິດ-ສັງຄົມ

แชร์