ເຜີຍແຜ່ຄວາມສຳຄັນວຽກຮັບຮອງລະບົບ

  ວັນທີ 12 ມິຖຸນາ 2019 ທີ່ນະຄອນຫຼວງວຽງຈັນ, ສູນຮັບຮອງແຫ່ງຊາດ, ກົມມາດຕະຖານ ແລະວັດແທກ, ກະຊວງວິທະຍາສາດ ແລະເຕັກໂນໂລຊີໄດ້ ຈັດກອງປະຊຸມສຳມະນາເຜີຍແຜ່ກ່ຽວກັບຄວາມໝາຍຄວາມສຳຄັນຂອງວຽກງານການຮັບຮອງລະບົບເນື່ອງໃນວັນການຮັບຮອງລະບົບສາກົນປະຈຳປີ 2019 ພາຍໃຕ້ການເປັນປະທານຂອງ ທ່ານ ພຸດທະສັກ ວິຈິດຕຣາ

  ຫົວໜ້າຫ້ອງການກະຊວງວິທະຍາສາດ ແລະເຕັກໂນໂລຊີ, ມີຊ່ຽວຊານຈາກໂຄງການສ້າງຄວາມເຂັ້ມແຂງດ້ານເຕັກນິກຂອງປະເທດເຢຍລະມັນ (PTB), ບັນດາຜູ້ຕາງໜ້າພາກລັດ, ເອກະຊົນ ແລະພະນັກງານພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພຸດທະສັກ ວິຈິດຕຣາ ກ່າວບາງຕອນວ່າ: ຈຸດປະສົງຂອງການສຳມະນາດັ່ງກ່າວແມ່ນເພື່ອຍົກລະດັບຄວາມຮັບຮູ້, ຄວາມເຂົ້າໃຈກ່ຽວກັບບົດບາດ ແລະຄວາມສຳຄັນຂອງວຽກງານການຮັບຮອງລະບົບເຊິ່ງວຽກງານການຮັບຮອງລະບົບນັບມື້ນັບມີບົດບາດສຳຄັນຕໍ່ກັບທຸກໆຂົງເຂດວຽກງານ ແລະ ເປັນເສົາຄ້ຳໜຶ່ ງໃນວຽກງານການປະເມີນຄວາມສອດຄ່ອງພ້ອມທັງມີສ່ວນຮ່ວມໃນການພັດທະນາເສດຖະກິດ-ສັງຄົມ ແລະ ມີບົດບາດໃນການສົ່ງເສີມວຽກງານທາງດ້ານການຄ້າອີກດ້ວຍ. ເມື່ອເລັງເຫັນຄວາມສຳຄັນຂອງວຽກງານດັ່ງກ່າວ, ສູນຮັບຮອງແຫ່ງຊາດ, ກົມມາດຕະຖານ ແລະວັດແທກຈຶ່ງໄດ້ຈັດກອງປະຊຸມສຳມະນາຄັ້ງນີ້ຂຶ້ນໂດຍເຊີນຜູ້ຊ່ຽວຊານຈາກໂຄງການສ້າງຄວາມເຂັ້ມແຂງດ້ານເຕັກນິກຂອງປະເທດເຢຍລະມັນ (PTB) ມາເປັນວິທະຍາກອນໃນການສ້າງຄວາມຮູ້ ພື້ນຖານວຽກງານຮັບຮອງລະບົບ ແລະ ຖືເປັນວາລະໂອກາດສຳຄັນໃນການສະເຫຼີມສະຫຼອງວັນຮັບຮອງລະບົບສາກົນປະຈຳປີ 2019 ໄປພ້ອມກັນ.

  ປີ 2019 ນີ້ທາງອົງການຮັບຮອງສາກົນໄດ້ອອກຄຳຂວັນກ່ຽວກັບການສົ່ງເສີມວຽກງານການຮັບຮອງລະບົບວ່າ “ການຮັບຮອງລະບົບເປັນການເພີ່ມມູນຄ່າໃຫ້ແກ່ຕ່ອງໂສ້ການສະໜອງ” ເພື່ອເປັນການສະແດງໃຫ້ເຫັນບົດບາດຄວາມສຳຄັນຂອງວຽກງານການຮັບຮອງຕໍ່ກັບບັນດາຫົວໜ່ວຍການຜະລິດ ແລະການບໍລິການຕ່າງໃນທົ່ວໂລກໂດຍນໍາໃຊ້ບັນດາເຄື່ອງມືທາງດ້ານຄຸນນະພາບເຊັ່ນ: ມາດຕະຖານ, ການວັດແທກ ແລະການປະເມີນຄວາມສອດຄ່ອງເພື່ອມາເປັນບ່ອນອີງພື້ນຖານໃນການຈັດຕັ້ງປະຕິບັດ, ແນ່ໃສຮັບປະກັນສ້າງຄວາມເຊື່ອໝັ້ນໃຫ້ແກ່ຜະລິດຕະພັນ ແລະ ການບໍລິການສາມາດຮັບປະກັນໄດ້ດ້ານຄວາມ ປອດໄພນັບຕັ້ງແຕ່ຂັ້ນຕອນການຜະລິດຈົນເຖິງການສົ່ງອອກຮັບໄດ້ວ່າເປັນການຮັບປະກັນ ແລະເພີ່ມມູນຄ່າໃຫ້ແກ່ຕ່ອງໂສ້ການສະໜອງຢ່າງແທ້ຈິງ.

ຂ່າວ: ກິ່ງລັດຕະນະ 

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์