8 ສະໝຸນໄພພື້ນເມືອງ ຊ່ວຍກໍາຈັດສັດຕູພືດ

ແມງໄມ້ ແລະສັດຕູພືດເປັນບັນຫາໃຫຍ່ສຳລັບຊາວກະສິກອນທັງຫຼາຍ, ດັ່ງນັ້ນເຮົາມີສູດນໍ້າຢາພື້ນເມືອງທີ່ຈະຊ່ວຍຂັບໄລ່ ແລະປ້ອງກັນສັດຕູພືດບໍ່ໃຫ້ກັບມາສ້າງບັນຫາໃຫ້ກັບພືດ, ຜັກຂອງທ່ານອີກຕໍ່ໄປ,ເປັນສູດທີ່ສາມາດເຮັດໄດ້ບໍ່ຫຍຸ້ງຍາກ ໂດຍນໍາເອົາສິ່ງຕໍ່ໄປ ນີ້: ໃບນາດເສືອ, ຜັກອີ່ເລີດ, ຫົວສີໄຄ, ໃບສະລັດຂົມ (ຜັກສະລັດ ທີ່ຂາດນໍ້າ), ໃບເຍົາ, ໜໍ່ໄມ້ປ່ອງ, ເຄືອເຂົາຮໍ, ຂີ້ໝິ້ນ.

ສິ່ງທີ່ຕ້ອງມີ:

  1. ຖັງຢາງ 1 ໜ່ວຍ.
  2. ຫີນ ຫຼື ວັດຖຸທີມີນໍ້າໜັກປະ ມານ 2-3 ກິໂລ.
  3. ແຕະໄມ້ທີ່ພໍດີຫຼວມປາກຖັງ 1 ແຜ່ນ.
  4. ຢາງໃນຕີນລົດທີ່ບໍ່ໃຊ້ແລ້ວ 1 ເສັ້ນ.
  5. ນໍ້າຕານຊາຍແດງ 1 ກິໂລ.
  6. ນໍ້າຊີວະພາບ ຫຼື ນໍ້າຖ່ານ 1 ລິດ ແລະພືດທັງໝົດທີ່ກ່າວໄວ້ດ້ານເທິງລວມກັນໃຫ້ໄດ້ 3 ກິໂລ.

ວິທີເຮັດ: ຕັດພືດທີ່ກຽມໄວ້ໃຫ້ ສັ້ນປະມານ 1-2 ຊັງຕີແມັດແລ້ວໃສ່ໃນຖັງແລ້ວນຳເອົານໍ້າຕານຊາຍແດງປະສົມນໍ້າສະອາດ 1 ລິດແລ້ວຕີໃຫ້ແຕກເພື່ອປະສົມລົງ ໄປໃນຖັງ, ເອົານໍ້າຊີວະພາບ ຫຼື ນໍ້າຖ່ານປະສົມລົງໄປ 1 ລິດຫຼັງຈາກນັ້ນຄົນສ່ວນປະສົມຕ່າງໆໃຫ້ເຂົ້າກັນ,ນຳເອົາແຕະໄມ້ ແລະຫີນມາເຕັງ,ເອົາຜ້າຢາງ 2 ຊັ້ນມາປົກແລະໃຊ້ຢາງຕີນລົດມັດໃຫ້ແໜ້ນ ບໍ່ໃຫ້ອາກາດເຂົ້າປະໄວ້ 7-15  ວັນແລ້ວໃຊ້ນໍ້າຢາ 4-5 ບ່ວງແກງ ແລະນໍ້າຕານຊາຍແດງ 2 ບ່ວງແກງ, ປະສົມນໍ້າ 10 ລິດເພື່ອໃຊ້ ສີດພືດ 2 ຄັ້ງຕໍ່ອາທິດ.

ສໍາລັບນໍ້າຢາດັ່ງກ່າວສາມາດເກັບຮັກສາໄວ້ໃຊ້ໄດ້ເຖິງ3 ເດືອນ,ດ້ວຍການບັນຈຸນໍ້າຢາໄວ້ໃນກະຕຸກຢາງ ຫຼື ແກ້ວພ້ອມທັງໃຊ້ຖົງຢາງປິດແລະມັດໄວ້ເນື່ອງຈາກຖົງຢາງສາມາດຫົດຢືດໄດ້,ຖ້າໃຊ້ຝາອັດກະຕຸກຈະເຮັດໃຫ້ເກີດແກ໊ສໃນເວລາປິດ-ເປີດຊຶ່ງຈະສ່ຽງຕໍ່ການລະເບີດຂອງກະຕຸກ,ສິ່ງທີ່ສຳຄັນຄວນເກັບມ້ຽນໄວ້ໃນບ່ອນຮົ່ມ,ອາກາດຖ່າຍເທສະດວກ ແລະຫ່າງໄກຈາກເດັກນ້ອຍ.

ພາບ ແລະຂາ່ວໂດຍ: ໜັງສືພິມເສດຸະກິດ-ສັງຄົມ

 

แชร์