ຜູ້ກໍ່ຕັ້ງຫົວເຫວີຍຢືນຢັນບໍ່ໃຊ້ຊິພອາເມລິກາ

ທ່ານ ເຫຣິນ ເຈິ້ງເຟຍ ຜູ້ ກໍ່ຕັ້ງບໍລິສັດຫົວເຫວີຍເຕັກໂນໂລຊີຜູ້ຜະລິດອຸປະກອນສື່ສານໂທລະຄົມມະນາຄົມຂະໜາດໃຫຍ່ສັນຊາດຈີນໄດ້ໃຫ້ສຳພາດນິກເກອິໂດຍຍອມຮັບວ່າມາດຕະການລົງໂທດບໍລິສັດແຕ່ພຽງຝ່າຍດຽວຂອງລັດຖະບານອາເມລິກາສົ່ງຜົນຕໍ່ການເຕີບໂຕຂອງບໍລິສັດໃນປີນີ້ພຽງເລັກນ້ອຍເພາະບໍລິສັດຄາດການວ່າຈະພົບບັນຫາລັກສະນະນີ້ຈາກອາເມລິກາມາໄລຍະໜຶ່ງແລ້ວຈຶ່ງບໍ່ແປກເມື່ອມີການປະກາດຢ່າງເປັນທາງການຈາກລັດຖະບານອາ ເມລິກາຕາມທີ່ປາກົດເປັນຂ່າວ.

ຢ່າງໃດກໍຕາມທຸກພະແນກໃນບໍລິສັດຍັງຄົງປະຕິບັດຕາມແຜນການຮັບມືທີ່ກຽມການໄວ້ລ່ວງໜ້າພ້ອມທັງຢໍ້າວ່າບໍລິສັດຈະບໍ່ປ່ຽນແປງຮູບແບບການດຳເນີນທຸລະກິດຕາມຄວາມຕ້ອງການຂອງລັດຖະບານວໍຊິງຕັນທີ່ລວມທັງການປັບໂຄງສ້າງຂອງຝ່າຍບໍລິຫານ ແລະຍອມໃຫ້ມີການກວດສອບ.ນອກຈາກນີ້ຜູ້ກໍ່ຕັ້ງຫົວເຫວີຍຍັງລະບຸວ່າບໍລິສັດບໍ່ມີຄວາມຈຳເປັນທີ່ຈະຕ້ອງໃຊ້ຊິພທີ່ຜະລິດໂດຍບໍລິສັດອາເມລິກາ ໂດຍບໍລິສັດຈະເດີນໜ້າພັດທະນາຊິພຂອງບໍລິ ສັດຕໍ່ໄປ.

ການໃຫ້ສຳພາດສື່ຍີ່ປຸ່ນຂອງ ທ່ານ ເຫຣິນມີຂຶ້ນໃນໄລຍະດຽວກັນກັບທີ່ກະຊວງການຕ່າງປະເທດຈີນອອກຖະແຫຼງການເລື່ອງການສົນທະນາທາງໂທລະສັບລະຫວ່າງ ທ່ານຫວັງອີ້ລັດຖະມົນຕີກະຊວງການຕ່າງປະເທດຈີນກັບທ່ານໄມປອມເປໂອລັດຖະມົນຕີກະຊວງການຕ່າງປະເທດອາເມລິກາຊຶ່ງທ່ານຫວັງກ່າວໃນຕອນໜຶ່ງວ່າລັດຖະບານວໍຊິງຕັນບໍ່ຄວນກະທຳການໃດໆທີ່ຈະສົ່ງຜົນໃຫ້ຂໍ້ຜິດພາດການຄ້າກັບຈີນຂະຫຍາຍວົງກວ້າງອອກໄປກວ່ານີ້ແລະຢືນຢັນວ່າລັດ ຖະບານປັກກິ່ງພ້ອມເຈລະຈາແຕ່ຕ້ອງຢູ່ບົນພື້ນຖານຂອງການໃຫ້ກຽດເຊິ່ງກັນ ແລະກັນ.

ຂະນະທີ່ກະຊວງການຄ້າຂອງອາເມລິກາເປີດເຜີຍວ່າກຽມອອກມາດຕະການຜ່ອນຜັນໃຫ້ຫົວເຫວີຍເປັນເວລາ 90 ວັນເພື່ອບໍ່ໃຫ້ກະທົບກັບບໍລິການທີ່ມີຢູ່ແລ້ວໂດຍສະເພາະໃນພື້ນທີ່ຫ່າງໄກຂອງລັດທີ່ມີປະຊາກອນອາໄສຢູ່ເບົາບາງເຊັ່ນລັດອໍຣິກອນແລະລັດໄວໂອມິງຊຶ່ງມາດຕະການນີ້ລວມທັງການອະນຸຍາດໃຫ້ຫົວເຫວີຍຊື້ສິນຄ້າແລະບໍລິການຂອງອາເມລິກາເພື່ອບໍ່ໃຫ້ລູກຄ້າຂອງຫົວເຫວີຍໃນອາເມລິກາໄດ້ຮັບຜົນກະທົບແຕ່ມາດຕະການຜ່ອນຜັນນີ້ຈະບໍ່ມີຜົນຄວບຄຸມໂຄງການໃນອະນາຄົດ

ພາບ ແລະຂາ່ວໂດຍ: ໜັງສືພິມເສດຸະກິດ-ສັງຄົມ

• 13/06/2019