ອັດຕະປືເລັ່ງສ້ອມແປງເສັ້ນທາງຫຼວງແຫ່ງຊາດ 18 ເອ ແລະທາງຫຼວງທ້ອງຖິ່ນຢູ່ເມືອງສະໜາມໄຊ

  ປະຈຸບັນຄະນະກໍາມະການຟື້ນຟູ ແລະ ແກ້ໄຂຜົນກະທົບໄພພິບັດຢູ່ພາກສະໜາມເມືອງສະໜາມໄຊ ແຂວງອັດຕະປື ພວມກໍາລັງເລັ່ງການສ້ອມແປງຟື້ນຟູເສັ້ນທາງຫຼວງແຫ່ງຊາດ 18 ເອ ແລະທາງຫຼວງທ້ອງຖິ່ນເພື່ອອໍານວຍຄວາມສະດວກໃນການສັນຈອນໄປມາ, ກໍ່ຄືການຂົນສົ່ງວັດຖຸສິ່ງຂອງການຊ່ວຍເຫຼືອໄປຍັງຜູ້ປະສົບໄພພິບັດທີ່ພັກອາໄສໃນແຕ່ລະສູນພັກຊົ່ວຄາວ, ຄາດການສ້ອມແປງຟື້ນຟູໃຫ້ສໍາເລັດພາຍໃນເດືອມິຖຸນານີ້ .

  ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊ ໄດ້ໃຫ້ສໍາພາດວ່າ: ປະຈຸບັນວຽກງານການສ້ອມແປງຟື້ນຟູເສັ້ນທາງຫຼວງແຫ່ງຊາດ 18 ເອ ແລະ ທາງຫຼວງທ້ອງຖິ່ນພາຍໃນເມືອງສະໜາມໄຊ ແມ່ນມີຄວາມຄືບໜ້າເປັນຢ່າງດີ,ສໍາລັບການສ້ອມແປງຟື້ນຟູເສັ້ນທາງແມ່ນໄດ້ແບ່ງອອກເປັນ 11 ຊ້ວງທາງ, ໃນນັ້ນເສັ້ນທາງຫຼວງແຫ່ງຊາດ 18 ເອ ແຕ່ເທສະບານ ແຂວງອັດຕະປື ຫາ ບ້ານປີນດົງ ເມືອງສະໜາມໄຊ ມີຄວາມຍາວ 47 ກວ່າກິໂລແມັດ ໄດ້ແບ່ງການ ສ້ອມແປງຟື້ນຟູອອກເປັນ 5 ຊ້ວງທາງ, ຊຶ່ງໃນຊ້ວງທາງທີໜຶ່ງແຕ່ເທສະບານແຂວງອັດຕະປືຫາຂົວຫ້ວຍໂອດຍາວ 12 ກິໂລແມັດເຄິ່ງສໍາເລັດການສ້ອມ ແປງແລ້ວ 42%, ຊ້ວງທີສອງແຕ່ຂົວຫ້ວຍໂອຫາເທສະບານເມືອງສະໜາມໄຊ ມີຄວາມຍາວ 18 ກິໂລແມັດ ສໍາເລັດການສ້ອມແປງ 99%, ຊ້ວງທີສາມ ແຕ່ຂົວຫ້ວຍກັນຈານຫາສາມແຍກບ້ານໂຄກກ່ອງມີຄວາມຍາວ 7 ກິໂລແມັດ ປະຕິບັດໄດ້ 46% ຊ້ວງທີສີ່ແຕ່ສາມແຍກໂຄກກ່ອງຫາຫົວຂົວເຊປຽນມີຄວາມຍາວ 4 ກິໂລແມັດ 50%, ເສັ້ນທາງແຕ່ຫົວຂົວເຊປຽນຫາບ້ານຕະມໍຢອດໄລຍະທາງ 9 ກິໂລແມັດ ສ້ອມແປງແລ້ວ 36%.

  ເສັ້ນທາງແຕ່ບ້ານຕະມໍຢອດຫາບ້ານໜອງຫີນເປັນທາງເສື່ອມຕໍ່ອອກສູ່ເມືອງປາກຊ່ອງແຂວງຈໍາປາສັກມີຄວາມຍາວ 15 ກິໂລແມັດ ສໍາເລັດການສ້ອມ ແປງ 84%, ເສັ້ນທາງຈາກບ້ານໜອງ ຫີນຮອດເຂດເສື່ອມຕໍ່ກັບເມືອງປາກຊ່ອງແຂວງຈໍາປາສັກມີຄວາມຍາວ 18 ກວ່າກິໂລແມັດ ສ້ອມແປງແລ້ວ 33%, ເສັ້ນທາງ ແຕ່ສາມແຍກຄຸ້ມໂຄກກ່ອງ ຫາ ບ້ານໃຫຍ່ແທໄດ້ແບ່ງອອກເປັນສາມຊ້ວງຈາກໂຄກກ່ອງໄປຫາຄຸ້ມດອນມ່ວງຍາວ 6 ກິໂລແມັດ ສ້ອມ ແປງ 53%, ເສັ້ນທາງຈາກຄຸ້ມດອນມ່ວງຫາຄຸ້ມດອນບົກຍາວ 5 ກິໂລແມັດ ສ້ອມແປງແລ້ວ 45%, ເສັ້ນທາງແຕ່ຄຸ້ມດອນບົກໄປຫາບ້ານທ່ານແສງຈັນເກົ່າຍາວ 3 ກິ ໂລແມັດ ສ້ອມແປງແລ້ວ 51%.

  ທ່ານ ບຸນໂຮມ ພົມມະສານ ຍັງໄດ້ກ່າວຕື່ມວ່າ: ນອກຈາກວຽກງານການສ້ອມແປງຟື້ນຟູເສັ້ນທາງຫຼວງແຫ່ງຊາດ 18 ເອ ແລະ ທາງຫຼວງທ້ອງຖິ່ນແລ້ວດ້ານວຽກງານກໍ່ສ້າງທາງປູດິນແດງບ່ອນທີ່ຈະສ້າງບ້ານຢູ່ຖາວອນຂອງຜູ້ປະສົບໄພພິບັດໃນ 4 ຈຸດກໍມີຄວາມຄືບໜ້າເປັນຢ່າງດີ.

ພາບ ແລະຂ່າວໂດຍ: ພອນປະເສີດ

แชร์