ຊະນະຄາມມີ 22 ຫົວໜ່ວຍທຸລະກິດລົງທຶນຂຸດຄົ້ນບໍ່ແຮ່

 ເມື່ອບໍ່ດົນມານີ້ຫ້ອງການພະລັງງານ-ບໍ່ແຮ່ ເມືອງຊະນະຄາມແຂວງວຽງຈັນໄດ້ເປີດກອງປະຊຸມວຽກງານບໍ່ແຮ່ປະຈຳປີ 2018 ທີ່ສະໂມສອນໃຫຍ່ຂອງເມືອງໂດຍພາຍໃຕ້ການເປັນປະທານຂອງ ທ່ານ ສະໝານ ວິເສດຍະພົງ ເຈົ້າເມືອງຊະນະຄາມ, ທ່ານ ພອນເພັດ ອຸດົມມີໄຊ ຫົວ ໜ້າຫ້ອງການພະລັງງານ-ບໍ່ແຮ່ ເມືອງຊະນະຄາມ, ມີກໍາມະການພັກເມືອງ, ຫົວໜ້າຫ້ອງການ, ນາຍບ້ານ ແລະບັນດາບໍລິສັດທີ່ມາລົງທຶນຢູ່ເມືອງຊະນະຄາມເຂົ້າຮ່ວມ.

  ໃນກອງປະຊຸມໄດ້ຜ່ານບົດສະຫຼຸບການເຄື່ອນໄຫວຄຸ້ມຄອງວຽກງານບໍ່ແຮ່ປະຈໍາປີ 2018 ຜ່ານມາໂດຍທົ່ວເມືອງຊະນະຄາມມີຫົວໜ່ວຍທຸ ລະກິດດຳເນີນກິດຈະການດ້ານບໍ່ແຮ່ທັງໜົດ 22 ຫົວ ໜ່ວຍໃນນີ້ຂັ້ນສູນກາງອອກອະນຸຍາດ 7 ບໍລິສັດຄື: ຂຸດຄົ້ນ-ປຸງ ແຕ່ງແຮ່ຄໍາ 1 ບໍ ລິສັດ, ຊອກຄົ້ນ-ສຳຫຼວດແຮ່ຄໍາ 5 ບໍລິສັດ, ສຳຫຼວດ ແລະ ຂຸດຄົ້ນແຮ່ບາຣິດ 1 ບໍລິສັດ, ນອກຈາກນີ້ແຂວງອອກອະນຸຍາດການສຳຫຼວດ ແລະ ຂຸດຄົ້ນແຮ່ບາຣິດ 3 ບໍລິສັດ, ໂຮງງານຂົບຫີນປູນ 1 ໂຮງ, ຂຸດຄົ້ນຂີ້ເຈຍ 1 ຫົວໜ່ວຍ ແລະ ເມືອງອອກອະນຸຍາດການຂຸດຄົ້ນດິນແດງ 10 ຫົວໜ່ວຍ, ໃນປີ 2018 ເມືອງຊະນະຄາມໄດ້ຮັບທຶນພັດທະນາຊຸມຊົນຈາກຂະແໜງບໍ່ແຮ່ຈໍານວນ 329,20 ລ້ານກີບ ໄດ້ນຳໃຊ້ ເຂົ້າເຮັດຂົວຂ້າມນໍ້າມີ້ບ້ານນາສັກ ແລະ ໂຄງການຂຸດຂຸມຂີ້ເຫຍື້ອບ້ານນາປາຝາ-ບ້ານນໍ້າພອກຊຶ່ງໄດ້ຈັດຕັ້ງປະຕິບັດສໍາເລັດແລ້ວ.

  ໃນກອງປະຊຸມໄດ້ມີການປະກອບຄໍາເຫັນເພື່ອແລກປ່ຽນຖອດຖອນບົດຮຽນລະຫວ່າງພາກລັດ, ບໍໍລິສັດ ແລະ ບັນດາບ້ານຢູ່ໃນຂອບເຂດຖືກສຳປະທານເພື່ອໃຫ້ມີຄວາມຖືກຕ້ອງ ແລະ ສອດຄ່ອງກັບຄວາມເປັນຈິງກ່ຽບກັບບັນຫາສິ່ງແວດລ້ອມ  ແລະ ການປັກຫຼັກໝາຍຂອບ ເຂດສຳປະທານໄປພ້ອມໆກັນນີ້ຕອນທ້າຍຂອງກອງປະຊຸມຍັງໄດ້ມອບ-ຮັບໃບຍ້ອງຍໍ, ໃບຊົມເຊີຍ ແລະ ໃບກຽດຕິຄຸນໃຫ້ບັນດາບໍລິສັດທີ່ໄດ້ປະກອບສ່ວນຊ່ວຍເຫຼືອສັງຄົມໃນໄລຍະ 1 ປີຜ່ານ.

แชร์