ງານວາງສະແດງເຄື່ອງເຮືອນລາວ ຈັດຂື້ນຕົ້ນເດືອນໜ້າ

  ເພື່ອປະຕິບັດຕາມທິດນະໂຍບາຍໃນການສົ່ງເສີມການຜະລິດເຄື່ອງເຟີນິເຈີໄມ້ລາວທັງເປັນການໂຄສະນາເຜີຍແຜ່ໃຫ້ສັງຄົມຮັບຮູ້ຜະລິດຕະພັນເຟີນິເຈີໄມ້ລາວຫຼາຍຂຶ້ນໃນວັນທີ11 ມິຖຸນາ ຜ່ານມາສະມາຄົມເຟີນິເຈີລາວໄດ້ມີພິທີຖະແຫຼງຂ່າວກ່ຽວກັບການຈັດງານວາງສະແດງເຄື່ອງເຮືອນລາວຄັ້ງທີ 4 ປະຈຳປີ 2019 ໂດຍມີທ່ານ ກອງມາລາ ພົມມາໄລ ຮອງປະທານສະມາຄົມເຟີນິເຈີລາວ, ມີບັນດາສະມາຊິກສະມາຄົມເຟີນິເຈີ ແລະພາກສ່ວນທີ່ກ່ຽວຂ້ອງເຂົ້າຮ່ວມ, ຊຶ່ງງານວາງສະແດງດັ່ງກ່າວຈະຈັດຂຶ້ນໃນລະຫວ່າວັນທີ6-14 ກໍລະກົດ 2019 ທີ່ສູນການຄ້າລາວ-ໄອເຕັກ.

  ທ່ານ ກອງມາລາ ພົມມາໄລ ກ່າວວ່າ: ເພື່ອເປັນການຈັດຕັ້ງປະຕິບັດ ແລະຜັນຂະຫຍາຍເນື້ອໃນຈິດໃຈຂອງຂັ້ນເທິງວາງອອກໃຫ້ປາກົດຜົນເປັນຈິງໄປເທື່ອລະກ້າວ, ເພື່ອຜັນຂະຫຍາຍຕາມເນື້ອໃນຂອງແຈ້ງການເລກທີ 15/ນຍ ໃຫ້ປາກົດຜົນເປັນຈິງ, ເປັນການຕ້ອນຮັບປີທ່ອງທ່ຽວລາວ-ຈີນ 2019, ເພື່ອເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະມີໄມ້ໄວ້ໃຊ້ຢ່າງຍືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບມາຈາກໄມ້, ຫວາຍ ແລະ ໄມ້ປ່ອງໃຫ້ມີຫຼາກຫຼາຍຜະລິດຕະພັນ,ສ້າງມູນຄ່າເພີ່ມໃຫ້ກັບຜະລິດຕະພັນເຟີນິເຈີໄມ້ລາວ,ສ້າງວຽກເຮັດງານທຳໃຫ້ກັບປະຊາຊົນ,ສົ່ງເສີມ ແລະ ສ້າງຄວາມເຂັ້ມແຂງໃຫ້ກັບສີໄມ້ລາຍມືຂອງຄົນລາວເຮົາ ແລະຫົວໜ່ວຍທຸລະກິດເຟີນິເຈີໄມ້ລາວໃຫ້ຂະຫຍາຍຕົວ ແລະສາມາດເຂົ້າສູ່ຕະຫຼາດພາກພື້ນ ແລະສາກົນໄດ້ໃນອະນາຄົດ.

  ງານວາງສະແດງເຄື່ອງເຮືອນລາວຄັ້ງທີ4 ຈະມີທັງໝົດ 191 ຫ້ອງໃນນີ້ ມີ 20 ຫ້ອງສຳລັບຫົວໜ່ວຍທຸລະກິດໂອດັອບ, ຮອດປະຈຸບັນການຈັບຈອງແມ່ນ 67% ໂດຍຄາດຄະເນຈະມີການຈໍລະຈອນຊື້-ຂາຍສິນຄ້າພາຍໃນງານປະມານ 10 ຕື້ກີບ ແລະຈະມີຜູ້ເຂົ້າຊົມພາຍໃນງານປະມານ 2,5 ແສນຄົນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์