ພູເບ້ຍ ສຸມ 35 ໂຄງການພັດທະນາຊຸມຊົນຢູ່ໄຊສົມບູນ

 ພູເບ້ຍມາຍນິງ ເປັນບໍລິສັດທີ່ລົງທຶນຢູ່ແຂວງໄຊສົມບູນ, ໂດຍມີໂຮງງານຜະລິດ-ປຸງແຕ່ງແຮ່ທອງ-ຄຳພູຄຳ ແລະໂຮງງານຜະລິດ-ປຸງແຕ່ງແຮ່ຄຳ-ເງິນບ້ານຫ້ວຍຊາຍໃນເນື້ອທີ່ສຳປະທານທັງໝົດ 2,6 ພັນກິໂລຕາແມັດ, ຊຶ່ງໃນການພັດທະນາຂອງບໍລິສັດຍັງໄດ້ສຸມໃສ່ພັດທະນາຊຸມຊົນໄປພ້ອມໆກັນໂດຍມາຮອດປະຈຸ ບັນ ມີ 35 ໂຄງການ ແລະ ປະຕິບັດສຳເລັດແລ້ວ 30 ໂຄງການ, ພວມສືບຕໍ່ໃນປີນີ້ 5 ໂຄງການ.

  ທ່ານ ດວງໃຈ ຍະນົງ ຜູ້ຈັດການພະ ແນກພັດທະນາຊຸມຊົນຂອງບໍລິສັດພູເບ້ຍມາຍນິງ ໃຫ້ຮູ້ວ່າ: ວຽກການພັດທະນາຊຸມຊົນແມ່ນວຽກໜຶ່ງທີ່ບໍລິສັດໄດ້ເອົາໃຈໃສ່ຄຽງຄູ່ກັບການພັດທະນາໂຄງການແນໃສ່ເຮັດໃຫ້ຊຸມຊົນອ້ອມຂ້າງໄດ້ມີຊີວິດການເປັນຢູ່ທີ່ດີຂຶ້ນ, ມີອາຊີບທີ່ໝັ້ນຄົງ ແລະ ສາມາດສ້າງລາຍຮັບໃຫ້ກັບຄອບຄົວ, ເພື່ອເຮັດໃຫ້ຊຸມຊົນມີການພັດທະນາພ້ອມທັງສອດຄ່ອງກັບແນວທາງຂອງລັດຖະບານ, ບໍລິສັດຈິ່ງໄດ້ສຸມໂຄງການທັງໝົດ 35 ໂຄງການເຂົ້າໃນການພັດທະນາຊຸມຊົນ,ໃນນັ້ນສາມາດປະຕິບັດໄດ້ສຳເລັດແລ້ວ 30 ໂຄງການ ແລະຍັງສືບຕໍ່ປະຕິບັດໃນປີນີ້ອີກ 5 ໂຄງການ,ຊຶ່ງນອນໃນຂົງເຂດຂະແໜ ງກະສິກຳ 7 ໂຄງການ, ຂະແໜງສຶກສາ 12 ໂຄງການ, ສາທາລະນະສຸກ 5 ໂຄງການ, ຂະແໜງທຸລະກິດຂະໜາດນ້ອຍ 3 ໂຄງການ, ກອງທຶນພັດທະນາບ້ານ ແລະໂຄງການອື່ນໆ 5 ໂຄງການ

  ໂດຍນັບແຕ່ປີ 2008 ເປັນຕົ້ນມາພູເບ້ຍມາຍນິງໄດ້ລົງທຶນຫຼາຍກວ່າ 4,8 ລ້ານໂດລາ ເຂົ້າໃນແຜນງານພັດທະນາຊຸມຊົນ, ໃນນັ້ນໄດ້ປະກອບສ່ວນເຂົ້າໃນການກໍ່ສ້າງ, ການເສີມຕໍ່ ຫຼື ການປັບປຸງໂຮງຮຽນ 19 ຫຼັງ ແລະ ສາມາດຊ່ວຍໃຫ້ເດັກເຂົ້າເຖິງການສຶກສາເກືອບ 1,7 ພັນຄົນ, ພ້ອມນັ້ນຍັງໄດ້ສະໜອງລະບົບນໍ້າລິນໃໝ່ ຫຼື ປັບປຸງໃຫ້ດີຂຶ້ນຢູ່ໃນ 15 ບ້ານ, ສະໜອງຕິດຕັ້ງ 1,22 ພັນຫ້ອງນໍ້າເພື່ອປັບປຸງສຸຂະອະນາໄມ ແລະ ກໍ່ສ້າງສຸກສາລາຢູ່ໃນບ້ານໄດ້ 3 ຫຼັງ,ດັ່ງນັ້ນຈິ່ງເວົ້າໄດ້ວ່າມາຮອດປະຈຸບັນການລົງທຶນຂອງບໍລິສັດທັງໝົດມີ 1,45 ຕື້ໂດລາ,ໃນນັ້ນ 62 ລ້ານໂດລາ ແມ່ນໃຊ້ເຂົ້າໃນພື້ນຖານໂຄງລ່າງເສັ້ນ ທາງຫຼວງຂອງລາວ, ປັບປຸງ ແລະສ້ອມແປງເສັ້ນທາງຂົນສົ່ງ ແລະແກ່ແຮ່ຂອງໂຮງງານພູຄຳ ແລະໂຮງງານບ້ານຫ້ວຍຊາຍລວມທັງເສັ້ນທາງທີ່ຢູ່ເຂດໃກ້ຄຽງການດຳເນີນງານຂອງໂຄງການນັບແຕ່ປີ 2006 ເປັນຕົ້ນມາ, ນອກນັ້ນຍັງໄດ້ປະກອບສ່ວນໃຫ້ກັບຫຼາກຫຼາຍຂະແໜງການທັງເປັນເງິນສົດ ແລະເປັນວັດຖຸປັດໄຈຈຳນວນ 1,58 ແສນໂດລາ.

  ຂໍ້ມູນຍັງໃຫ້ຮູ້ອີກວ່າ: ສຳລັບ 3 ຂະແໜງການຫຼັກໆທີ່ບໍລິສັດສຸມໃສ່ພັດທະນາຊຸມຊົນໂດຍສະເພາະຂົງເຂດກະສິກຳແມ່ນເນັ້ນໃສ່ການສ້ອມແປງຊົນລະປະ ທານນໍ້າເດີນ, ສ້າງຝາຍຊຸມຊົນນໍ້າສັກດ້ວຍກວຍຫີນ, ສ້າງຄວາມສາມາດໃຫ້ຊາວກະສິກອນຕິດພັນກັບການຕະຫຼາດ, ຝຶກອົບຮົມໃຫ້ຊາວກະສິກອນຜະລິດເປັນສິນຄ້າໂດຍສະເພາະການປູກໝາກກ້ຽງ, ປູກໝາກນັດ, ປູກຫຍ້າລ້ຽງສັດ, ການລ້ຽງສັດ, ການປູກຢາງພາລາ ແລະການທົດລອງນຳໃຊ້ເຕັກນິກການ ຜະລິດເຂົ້ານາຢອດເມັດ, ສ້າງຄວາມເຂັ້ມແຂງໃຫ້ວຽກງານສົ່ງເສີມກະສິກຳ, ສ້າງແຜນງງານນຳໃຊ້ທີ່ດິນແບບມີສ່ວນຮ່ວມ, ນອກນັ້ນຍັງມີໂຄງການທາງ ດ້ານການສຶກສາທີ່ສຸມໃສ່ກໍ່ສ້າງໂຮງຮຽນມໍປາຍ, ສ້າງຫໍພັກຄູ, ສ້າງເດີ່ນບານດອກປີໄກ່ ແລະເດີ່ນກະຕໍ້ຢູ່ເດີ່ນບ້ານນ້ຳຍອນ, ສ້າງປ້າຍປະຕູ ແລະ ຮົ້ວໂຮງ ຮຽນ, ສຶກສາຮໍ່າຮຽນພັກແລ້ງ, ພ້ອມທັງສະໜອງອຸປະກອນການຮຽນການສອນ.

 ສຳລັບຂົງເຂດສາທາລະນະສຸກແມ່ນເລັ່ງໃສ່ການກໍ່ສ້າງໂຮງໝໍຊຸມຊົນບ້ານ, ສະໜອງອຸປະກອບການແພດ ແລະຢາໃຫ້ສຸກສາລາບ້ານ,ການໃຫ້ຄວາມຮູ້ດ້ານສຸຂະສຶກສາ, ໂຄງການສ້າງສະໜາມບຳບັດຂີ້ເຫຍື້ອ, ໂຄງການຕິດຕັ້ງເຄື່ອງກອງນໍ້າສະອາດໃຫ້ໂຮງຮຽນ ແລະສຸກສາລາຕໍ່ກັບຂະແໜງທຸລະກິດຂະໜາດນ້ອຍແມ່ນສຸມໃສ່ການສ້າງໜ່ວຍບໍລິການການຄຸ້ມຄອງການເງິນຈຸລະພາກ ແລະການກໍ່ສ້າງຕະຫຼາດຊຸມຊົນຢູ່ບ້ານນໍ້າໂມ້, ພ້ອມດຽວກັນນັ້ນກໍຍັງມີໂຄງການຕິດ ຕາມກວດກາ ແລະ ປະເມີນຜົນໂຄງການ, ສ້າງຄວາມເຂັ້ມແຂງໃຫ້ແກ່ການຄຸ້ມຄອງຢູ່ຂັ້ນບ້ານ, ສ້ອມແປງບຳລຸງຮັກສາລະບົບເຄື່ອງສື່ສານພາຍໃນຊຸມຊົນ, ໂຄງການສົ່ງເສີມກຸ່ມຕໍ່າຫູກເປັນສິນຄ້າ ແລະອື່ນໆ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์