ຊຽງຂວາງ ສອບເສັງເອົາລັດຖະກອນຄູ

ການສອບເສັງເອົາໂກຕາລັດຖະກອນຄູສົກປີ 2019 ຢູ່ແຂວງຊຽງຂວາງຊຶ່ງຈັດໂດຍພະແນກສຶກສາທິການແລະກີລາແຂວງ (ສກຂ) ມີຂຶ້ນໃນວັນທີ 7 ມິຖຸນາຜ່ານມາທີ່ໂຮງຮຽນມັດທະຍົມສົມບູນຊົນເຜົ່າແຂວງ,ໂດຍໃຫ້ກຽດເປັນປະທານຂອງທ່ານບົວລີພັນນາວົງຫົວໜ້າພະແນກ ສກຂທ່ານນາງສີພອນ ຮອງຫົວໜ້າພະແນກພາຍໃນແຂວງ, ມີຜູ້ຕາງໜ້າພະແນກການທີ່ກ່ຽວຂ້ອງຂອງແຂວງ, ມີຄະນະຮັບຜິດຊອບການສອບເສັງຂັ້ນພະແນກ,ຂັ້ນເມືອງ ແລະນ້ອງນັກສອບເຂົ້າຮ່ວມທັງໝົດ.

ທ່ານ ນາງ ດາວອນ ເດດວົງ ສອນຮອງຂະແໜງຈັດຕັ້ງພະນັກງານພະແນກ ສກຂ ລາຍງານໃຫ້ ຮູ້ວ່າ:ປີນີ້ແຂວງຊຽງຂວາງໄດ້ຮັບໂກຕາລັດຖະກອນຄູທີ່ທາງຂັ້ນເທິງແບ່ງໃຫ້ທັງໝົດ 39 ທຶນ, ເພື່ອໃຫ້ການຈັດແບ່ງທຶນມີຄວາມໂປ່ງໃສບໍລິສຸດຍຸດຕິທໍາ ແລະຫຼິ້ກເວັ້ນຈາກຫາງສຽງທີ່ບໍ່ດີຂອງສັງຄົມທາງພະແນກໄດ້ມີການຈັດສອບເສັງຢ່າງເຂັ້ມຂຸ້ນ ແລະເດັດຂາດໂດຍເອົາຄຸນນະພາບເປັນຫຼັກ,ໃນນັ້ນໄດ້ໃຫ້ບູລິມະສິດຄູອາສາສະໝັກທີ່ສອນພັນທະມາແລ້ວເປັນ ເວລາ 5 ປີ ໄດ້ເຂົ້າມາສອບເສັງ ຄັດເລືອກກັນກ່ອນໃນຊຸດນີ້ (ຍົກເວັ້ນສາຍຄູອະນຸບານຄູຈົບມາໃໝ່ ກໍ່ສະໝັກສອບເສັງໄດ້ແຕ່ເກນຄະແນນບໍ່ໃຫ້ຫຼຸດ3,00 ຂຶ້ນໄປ ແລະ ໃຫ້ບູລິມະສິດ 20%,ຖ້າສອນອາສາສະໝັກເປັນເວລາ 5 ປີມາແລ້ວ ຈະໃຫ້ບູລິມະສິດ 80%); ສ່ວນຄູອາສາສະໝັກສອນພັນທະເປັນເວລາ 4 ປີ ແລະຖັດລົງໄປຕາມໆກັນແມ່ນເອົາໄວ້ສອບເສັງຄັດເລືອກໃນສົກປີຕໍ່ໄປຕາມລໍາດັບ ໂດຍອີງໃສ່ສະພາບຕົວຈິງຂອງທຶນທີ່ໄດ້ຮັບໃນແຕ່ລະປີ.

ສໍາລັບສົກປີ 2019 ນີ້ທົ່ວແຂວງມີຄູອາສາສະໝັກສອນພັນທະເປັນເວລາ 5 ປີ ມາແລ້ວແຕ່ຍັງບໍ່ໄດ້ລັດຖະກອນ ແລະສະໝັກເຂົ້າມາສອບເສັງເອົາລັດຖະກອນໃນຊຸດນີ້ທັງໝົດ 261 ຄົນ, ຍິງ 171 ຄົນ, ແບ່ງເປັນ 9 ຫ້ອງສອບເສັງ ແລະກໍານົດເອົາໂຮງຮຽນ ມສ ຊົນເຜົ່າເປັນສະຖານທີ່ສອບເສັງ ໂດຍຈະໃຊ້ເວລາສອບເສັງທັງໝົດ 2 ວັນ (7-8 ມິຖຸນາ 2019) ໃຫ້ສໍາເລັດ, ໃນນັ້ນມີທັງໝົດ 14 ສາຍ ສອບເສັງຄື:ສາຍຄູອະນຸບານ,ສາຍຄູປະຖົມ,ສາຍຄູທໍາມະຊາດ, ຄະນິດສາດ, ພາສາລາວ, ສາຍຄູ ສັງຄົມ, ພາສາອັງກິດ, ສາຍຄູອາ ຊີວະ, ພູມສາດ, ໄອຊີທີ, ພະລະສຶກສາ,ສິລະປະສຶກສາ,ການເງິນ ແລະປຸງແຕ່ງອາຫານ; ເພື່ອໃຫ້ ການສອບເສັງໄດ້ຕາມມາດຖານ ແລະມີປະສິດທິຜົນທາງພະແນກ ສກຂ ໄດ້ກໍານົດຫົວບົດສອບເສັງອອກເປັນ 3 ພາກຄື:ທໍາອິດເສັງພາກທິດສະດີ,ຖັດໄປແມ່ນເສັງການສອນສາທິດ ແລະສຸດທ້າຍ ແມ່ນສໍາພາດ, ສ່ວນຜົນຂອງການສອບແມ່ນຈະໃຫ້ຮູ້ໃນອາທິດໜ້ານີ້.

  ພາບ ແລະຊາ່ວໂດຍ: ໜັງສືພິມເສດຖະກິດ-ສັງຄົມ

 

แชร์