ບຸນນະມັດສະການ ພະທາດແກ່ນທ້າວ-ນາງແພງສີ ຈະຈັດຂຶ້ນໄວໆ

  ເມືອງແກ່ນທ້າວແຂວງໄຊຍະບູລີຈະຈັດງານບຸນນະມັດສະການພະທາດແກ່ນທ້າວ-ນາງແພງສີຊຶ່ງ ເປັນບຸນປະເພນີປະຈໍາເດືອນ 7  ຂຶ້ນໃນກາງເດືອນມິຖຸນານີ້ດ້ວຍຫຼາຍກິດຈະກໍາຕາມຮີດຄອງປະເພນີ.

ອີງຕາມຂໍ້ມູນຈາກເມືອງແກ່ນທ້າວໃຫ້ຮູ້ວ່າ: ບຸນນະມັດສະການພະທາດແກ່ນທ້າວ-ນາງແພງສີເປັນປະເພນີບຸນເດືອນ 7 ໂດຍມີການຈັດຂຶ້ນໃນທຸກໆປີ, ໂດຍປີນີ້ເມືອງແກ່ນທ້າວ ຈະຈັດໃຫ້ມີຫຼາຍກິດຈະກຳປະຕິບັດບຸນມະຫາຊາດ ຫຼື ບຸນພະເຫວດໃນເດືອນ 7 ເພັງ, ຊຶ່ງໄດ້ກາຍເປັນບຸນປະເພນີຂອງຊາວເມືອງແກ່ນທ້າວແຂວງໄຊ ຍະບູລີ ທີ່ໄດ້ສືບທອດກັນມາແຕ່ບູ ຮານນະການ ແລະໄດ້ຮັບການຍົກລະດັບໃຫ້ເປັນເທສະການພ້ອມໆ ກັບການເປີດປີທ່ອງທ່ຽວລາວຂອງເມືອງໃນປີ 2018 ຜ່ານມາແລະໄດ້ໃສ່ຊື່ວ່າ: ບຸນນະມັດສະການພະທາດແກ່ນທ້າວ-ນາງແພງສີບຸນປະເພນີເດືອນ 7.

ສະເພາະບຸນນະມັດສະການພະທາດແກ່ນທ້າວ-ນາງແພງສີໃນປີນີ້ເມືອງແກ່ນທ້າວ ຈະຈັດຂຶ້ນໃນລະ ຫວ່າງວັນທີ 15-18  ມິຖຸນາ 2019 ດ້ວຍຫຼາຍກິດຈະກໍາເຊັ່ນ: ມື້ຂຶ້ນ 13 ຄໍ່າ ເດືອນ 7 ເປັນມື້ຫ້າງຫາກະກຽມ, ຕົບແຕ່ງເຄື່ອງສັກກາລະບູຊາ, ຕົບແຕ່ງປະດັບປະດາວັດວາອາຣາມໃຫ້ມີຄວາມຈົບງາມເປັນລະບຽບຮຽບ ຮ້ອຍ ແລະຄົບງັນພະອຸປະຄຸດຕະ ຫຼອດຄືນ, ມື້ຂຶ້ນ 14 ຄໍ່າ ເດືອນ 7ອາຣາດທະນາພະອຸປະຄຸດ ແລະ ສູດປະລິຕະມຸງຄຸນ, ມື້ຂຶ້ນ 15 ຄໍ່າ ເດືອນ 7 ຕອນເຊົ້າມີພິທີຕັກບາດຖວາຍສັງຄະທານແດ່ພະສົງສາມະເນນ, ພິທີນະມັດສະການພະ ທາດແກ່ນທ້າວ-ນາງແພງສີ, ຈູດບັ້ງໄຟຫາງ, ແຫ່ພະເຫວດເຂົ້າ ເມືອງ, ມີການສະແດງໝໍລໍາເລື່ອງ ແລະຈູດບັ້ງໄຟດອກ, ມື້ແຮມ 1 ຄໍ່າ ເດືອນ 7 ເປັນມື້ອ່ານສັງກາດຫຼວງ, ຟັງເທດພະເຫວດ ແລະແຫ່ກັນຫຼອນ.

 ກ່ອນບຸນລະຫວ່າງວັນທີ 13-15  ມິຖຸນາຍັງຈະມີງານປະກວດສີລະປະວັນນະຄະດີ 4 ເມືອງໃຕ້ທີ່ເມືອງແກ່ນທ້າວເປັນເຈົ້າພາບເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກເມືອງແລະກອງປະຊຸມໃຫຍ່ຄັ້ງທີ  VII ຂອງອົງຄະນະພັກແຂວງໄຊຍະບູລີໃຫ້ມີບັນຍາກາດຟົດຟື້ນມ່ວນຊື່ນນໍາອີກ.

ພາບ ແລະຊາ່ວໂດຍ: ໂດຍໜັງສືພິມເສດຖະກິດ-ສັງຄົມ

แชร์