ເປີດໂຮງງານຜະລິດລິບແຫ່ງທຳອິດໃນລາວ

  ພິທີເປີດໂຮງງານຜະລິດລິບລາວຈຳກັດໄດ້ຈັດຂຶ້ນວັນທີ 9 ມິຖຸນາ 2019 ທີ່ບ້ານໂນນແສງຈັນ, ເມືອງໄຊທານີ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ຂອງທ່ານນາງ ນາລີ ສີສຸລິດ ພັນລະຍາ ທ່ານນາຍົກລັດຖະມົນຕີແຫ່ງ ສປປ ລາວ, ທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ສີສະຫຼຽວ ສະແຫວງສຶກສາ ປະທານໂຮງງານຜະລິດລິບລາວຈຳກັດ, ທ່ານ ພູວົງ ສີຫາປັນຍາ ຜູ້ອຳນວຍການໂຮງງານຜະລິດລິບລາວຈຳກັດ ມີບັນດາແຂກຖືກເຊີນ ແລະພາກ ສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສີສະຫຼຽວ ສະແຫວງສຶກສາ ໄດ້ກ່າວວ່າ: ໂຮງງານຜະລິດລິບລາວແມ່ນໂຮງງານຜະລິດລິບແຫ່ງທຳອິດຂອງລາວຊຶ່ງໂຮງງານນີ້ໄດ້ນຳໃຊ້ສ່ວນປະກອບ ແລະ ເຕັກໂນໂລຊີຈາກຢູໂຣບ, ມໍ ເຕີ້ສັ່ງຈາກປະເທດອິຕາລີ, ລະບົບປະຕູຈາກປະເທດສະເປນ ແລະລະບົບຄວບຄຸມລິບຂຶ້ນລົງເປັນເຕັກໂນໂລຊີຈາກປະເທດຝຣັ່ງ, ມີລະບົບປ້ອງກັນປະຕູໜີບຜູ້ ໂດຍສານ ຫຼືສິ່ງຂອງດ້ວຍແຖບເຊັນເຊີ້ທີ່ບານປະຕູທັງສອງຂ້າງ, ຜະລິດຕະພັນ ຫຼັກຂອງໂຮງງານຜະລິດລິບລາວແມ່ນ ລິບໂດຍສານ, ລິບຂົນເຄື່ອງ ແລະລິບໂຮງໝໍພ້ອມນີ້ໂຮງງານຜະລິດລິບລາວຍັງ ມີຄວາມສາມາດຜະລິດຂັ້ນໄດເລື່ອນ ແລະຕັ່ງຍົກສຳລັບຄົນພິການ ແລະຜູ້ສູງອາຍຸນຳອີກດ້ວຍທັງໝົດນີ້ແມ່ນການຮ່ວມລົງທຶນຂອງນັກທຸລະກິດລາວ 100% ລະຫວ່າງທ່ານ ສີສະຫຼຽວ ສະແຫວງສຶກສາ ແລະ ທ່ານ ພູວົງ ສີຫາປັນ ຍາ ໂດຍແມ່ນທ່ານ ພູວົງ ສີຫາປັນຍາ ເປັນນັກວິສະວະກອນທີ່ມີປະສົບການເຮັດວຽກກັບໂຮງງານຜະລິດລິບຍີ່ຫໍ້ໂອເລໂອດິນທີ່ປະເທດຝຣັ່ງຫຼາຍກວ່າ 30 ປີ .  

  ນອກນີ້ທ່ານຍັງເປັນຜູ້ອຳນວຍການໂຮງງານຜະລິດລິບໂອເລໂອດິນລາວ-ເອເຊຍທີ່ປະເທດໄທອີກ 10 ກວ່າປີ ໃນໄລ ຍະຜ່ານມາທາງໂຮງງານຜະລິດລິບລາວ ແມ່ນໄດ້ຜະລິດລິບສະໜອງໃຫ້ແກ່ຕຶກ ແລະ ອາຄານຕ່າງໆໃນນະຄອນຫຼວງວຽງ ຈັນ ແລະເມືອງວັງວຽງເຊັ່ນ: ລິບແກ້ວທີ່ອາຄານ 6 ຊັ້ນກະຊວງແຜນການ ແລະການລົງທຶນ,ອາຄານໂຮງໝໍ 103 ກອງທັບທີ່ບ້ານໂພນປ່າເປົ້າ, ອາຄານໂຮງແຮມສິມມາແຄມຂອງ, ອາຄານໂຮງແຮມລັດສະໝີ, ອາຄານລັດວິສາຫະ ກິດໄປສະນີລາວທີ່ສາຍລົມ ແລະໂຮງແຮມລີຊາແກຣນທີ່ວັງວຽງ ແລະແຫ່ງອື່ນໆ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์