ອຸດົມໄຊ-ດຽນບຽນ ສືບຕໍ່ຂະຫຍາຍການຮ່ວມມື

   ໃນລະຫວ່າງທ້າຍເດືອນພຶດສະພາ 2019 ນີ້ ການນຳຂັ້ນສູງ ແຂວງອຸດົມໄຊ ຊຶ່ງນຳໂດຍທ່ານ ຄຳພັນ ເຜີຍຍະວົງ ເຈົ້າແຂວງອຸດົມໄຊ ໄດ້ເດີນທາງພົບປະຢ້ຽມຢາມສັນທະວະໄມຕີກັບແຂວງດຽນບຽນໂດຍການຕ້ອນຮັບຂອງທ່ານ ລໍວັນມ່ວນ ຜູ້ປະຈໍາການປະທານສະພາປະຊາຊົນແຂວງດຽນບຽນ.

  ການພົບປະຢ້ຽມຢາມໃນຄັ້ງນີ້ກໍເພື່ອສືບຕໍ່ເສີມຂະຫຍາຍມູນເຊື້ອສາຍພົວພັນຮ່ວມມືຮອບດ້ານ, ຄວາມສາມັກຄີແບບພິເສດລະຫວ່າງສອງພັກ, ສອງລັດ, ປະຊາຊົນສອງຊາດລາວ ຫວຽດນາມ ເວົ້າລວມ, ເວົ້າສະເພາະ ກໍຄື ສອງແຂວງອຸດົມໄຊ ດຽນບຽນ ໃຫ້ນັບມື້ນັບໝັ້ນຄົງທະນົງແກ່ນ ຊົ່ວກາລະນານ. ທັງເປັນການສືບຕໍ່ແລກປ່ຽນບົດຮຽນຮ່ວມກັນ ໂດຍສະເພາະແມ່ນການຈັດຕັ້ງປະຕິບັດຕາມບົດບັນທຶກທີ່ສອງແຂວງໄດ້ຮ່ວມກັນລົງນາມໃນປີ 2016 ຜ່ານມາໃຫ້

ສຳເລັດຕາມລະດັບຄາດໝາຍ. ສໍາລັບສອງແຂວງອຸດົມໄຊດຽນບຽນຖືວ່າໄດ້ມີການຕິດຕໍ່, ພົວພັນ, ໄປມາຫາສູ່, ແລກປ່ຽນບົດຮຽນ ແລະຊ່ວຍເຫຼືອເຊິ່ງກັນ ແລະກັນໂດຍຕະຫຼອດມາຈົນຮອດປະຈຸບັນນີ້ ແຂວງດຽນບຽນກໍໄດ້ສືບຕໍ່ໃຫ້ການຊ່ວຍເຫຼືອແກ່ແຂວງອຸດົມໄຊໃນຫຼາຍດ້ານເປັນຕົ້ນແມ່ນດ້ານກະສິກຳປ່າໄມ້,  ດ້ານການສຶກສາ, ການພັດທະນາພື້ນຖານໂຄງລ່າງ, ການລົງທຶນ ແລະອື່ນໆ.

  ນອກຈາກພົບປະຢ້ຽມຢາມກັບແຂວງດຽນບຽນແລ້ວການນຳແຂວງອຸດົມໄຊຍັງໄດ້ເຄື່ອນໄຫວພົບປະຢ້ຽມຢາມສັນທະວະໄມຕີກັບບັນດາແຂວງແຮກສ່ຽວ ແລະແຂວງມິດຕະພາບອີກຈຳນວນໜຶ່ງຂອງ ສສ ຫວຽດນາມ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 10/06/2019